Rayon rəhbərinin Sarov kəndində növbəti səyyar qəbul-görüşü keçirilib

Azərbaycan Respublikasının Prezidenti cənab İlham Əliyevin tapşırıq və tövsiyyələrinə
uyğun olaraq mütəmadi surətdə bölgələrdə icra başçılarının səyyar qəbul görüşləri
keçirilir. Keçirilən səyyar qəbul-görüşlərin məqsədi vətəndaşları narahat edən məsələləri
bilavasitə yerində öyrənmək və onların rastlaşdıqları problemləri vaxtında aradan
qaldırmaqdır.
Tərtər Rayon İcra Hakimiyyətinin başçısı Müstəqim Məmmədovun təsdiq olunmuş
qrafikə uyğun olaraq növbəti səyyar qəbul-görüşü Sarov kəndində keçirilib.
Qəbulda YAP Tərtər rayon təşkilatının sədri Eldar Əsədov, səhiyyə, təhsil, mədəniyyət,
digər xidmət təşkilatlarının rəhbərləri, ərazi icra nümayəndəsi, bələdiyyə sədri və kənd
sakinləri iştirak ediblər.
Əvvəlcə icra başçısı kənddə torpaqlarımızın ərazi bütövlüyü uğrunda canını fəda etmiş
şəhidlərin xatirəsinə ucaldılmış abidənin önünə gül-çiçək dəstələri düzüb, şəhidlərin
xatirəsi bir dəqiqəlik sükutla yad edilib.
Rayon rəhbəri qəbulda bildirib ki, Azərbaycan daha bir tarixi hadisəyə imza atdı.
Xalqımızın bayram əhval - ruhiyyəsi ilə keçirdiyi növbədənkənar prezident seçkiləri
müasir tariximizin növbəti şanlı səhifəsinə çevrildi. 7 fevral seçkiləri sıradan bir seçki
prosesi deyildi. Müstəqillik tariximizdə ilk dəfə olaraq suveren haqlarını bərpa edərək
ərazi bütövlüyünü tam təmin etmiş ölkəmizdə vətəndaşlar növbəti 7 il üçün dövlət
rəhbərini seçirdilər. Bu baxımdan növbədənkənar prezident seçkiləri 44 günlük Zəfər
savaşının və uğurlu antiterror tədbirlərinin xalq iradəsi ilə təsdiqlənəcək möhürü oldu və
bu səbəbdən 7 fevral seçkiləri Zəfər seçkisi kimi tarixə yazıldı. Bu seçkilərin tariximizdə
analoqu olmayan hadisə sayılmasının daha bir özəlliyi isə qalib Xalq-qalib Lider tandemi
idi.
Müasir dünya siyasi düzənində ən inkişaf etmiş, hətta super güc sayılan dövlətlərdə
belə vətəndaşların seçkiyə marağında aktivlik və lidersizlik problemi yaşanır.
7 fevral seçkilərində Azərbaycan seçicisinin öz iradəsini böyük fəallıq və coşqu ilə ifadə
etməsi, mütləq əksəriyyətlə Qalib Liderə səs verməsi dünya üçün müqayisəsi olmayan
nümunə oldu. Əslində, xalqımızın seçimi dünya üçün də öncədən bəlli idi və rəsmi
nəticələrdə seçkidən əvvəl keçirilən rəy sorğuları təsdiqini tapdı. 200 illik tariximizi
şərəfləndirərək Vətəni bütövləşdirən xalqın mütləq qəhrəmanına çevrilmiş cənab İlham
Əliyev 92,5 faiz - böyük səs çoxluğu ilə qalib gəldi.
Bütün beynəlxalq və yerli müşahidəçilərin, həmçinin, digər namizədlərin rəylərində əks
olunduğu kimi tam ədalətli, şəffaf şəkildə keçirilən seçkilər dünya demokratiyası üçün də
bir örnək oldu.
Rayon rəhbəri fevralın 14-də Milli Məclisdə keçirilən respublika prezidentinin andiçmə
mərasimindən, onun andiçmə mərasimində Azərbaycanın daxili və xarici siyasəti ilə
bağlı hazırkı durum və gələcək illərdə ölkənin tutacağı xətt ilə bağlı söylədiyi geniş
nitqdən danışıb.
“Güclü iqtisadiyyat, güclü ordu, daxili sabitlik, xalq-iqtidar birliyi xarici siyasətimizin əsas
amilləridir”, prezident növbəti illərin əsas prioritetləri kimi bunları qeyd etdiyini
vurğulayıb.

7 fevral prezident seçkilərinin nəticələri xalqımızın qalib liderinə olan sevgisinin təzahürü
ilə bərabər, həm də gələcəyə inam mesajı oldu. Bu gələcək bu gündən bizə böyük və
qüdrətli Azərbaycanı göstərir. Ölkəmizin problemlərini, milli dərdlərini həll edərək
Azərbaycanı həmin hədəflərə aparan ümumxalq rəhbərinə sevgi əbədidir.
İlham Əliyevin 20 illik fəaliyyəti onu göstərdi ki, O, təkcə ölkəmizdə sevilmir. Dünyanın
dörd tərəfində yaşayan soydaşlarımızın da vahid namizədi, alternativi olmayan lideridir.
Xarici ölkələrdə səsvermədən sonra ictimaiyyətin gözü qarşısında açılan sandıqlar
bunun bir daha sübutudur!
44 günlük Vətən müharibəsində və 23 saat 43 dəqiqə çəkən antiterror tədbirlərində
olduğu kimi 7 fevral seçkilərində qazanan Azərbaycan oldu.
İcra başçısı əhalinin sosial durumunun yaxşılaşdırılması üçün həyata keçirilən geniş
həcmli layihələrdən, qələbədən sonra bərpa olunan kəndlərə, eləcə də rayonun Talış
kəndinə əhalinin köçürülməsindən, şəhid və qazi ailələrinə, vətən müharibəsi
veteranlarına dövlət tərəfindən göstərilən dəstəkdən də bəhs edib. Ölkə rəhbərinin
diqqət və qayğısı altında respublikamızda, eləcə də rayonumuzda aparılan tikinti-
quruculuq-abadlıq işlərini dilə gətirib.
Sonra rayon rəhbəri qəbulda kəndin sosial-iqtisadi inkişafı, əhalisi, onların məşğuliyyəti,
görülən işlər barədə məlumat verib.
Bildirilib ki, Sarov kəndinin 797 hektar ərazisi, 337 təsərrüfatı, 1581 nəfər əhalisi var.
Ərazidə 1 məktəb, 1 kitabxana, 1 tibb məntəqəsi, 1 poçt, 29 ticarət oyekti, 2 iaşə
obyekti, 3 məişət obyekti faəliyyət göstərir. Kənd sakinləri əkinçilik və maldarlıqla
məşğul olurlar. Kənd daimi işıq, qaz və içməli su ilə təmin olunub.
Sakinlər 651 baş iribuynuzlu, 548 baş xırdabuynuzlu heyvan, 6938 baş quş, 58 arı ailəsi
saxlayırlar.
Son üç ildə Sarov kəndində 3 km məsafədə kəndarası yollar təmir edilib, su arxları 5,5
km lildən təmizlənib, kənd ərazisində 1500 ədəd çəkil və 200 ədəd müxtəlif növ ağac
əkilib, suvarma üçün 1 ədəd subartezian quyusu istfadəyə verilib, yol kənarları alaq
otlarından təmizlənərək səliqə-səhmana salınıb.
Rayon rəhbəri sakinlərə Elektron Hökumət Portalı tərəfindən yaradılmış Rəqəmsal İcra
Hakimiyyəti platforması barədə məlumat verərək, xidmətin əlçatanlıq və üstünlüklərini
qeyd edib və https://rih.gov.az/ platformasından istifadə etmələrini tövsiyə edib. Erkən
nikah və onun fəsadlarından söhbət açıb, əlaqədar qurumları, hər kəsi erkən nikaha
qarşı mübarizəyə çağırıb, bu sahədə güclü maarifləndirmə işlərinin aparılmasına ehtiyac
olduğunu bildirib.
İcra başçısı sonra sözü sakinlərə verib.
Kənd sakinlərindən Ülfət Süleymanov işlə təmin olunma, Tağı Nəsirov subartezian
quyusunun təmiri və Bildirçinli-Sarov yolunun təmiri, Rövşən Şirinov kəndə verilən
suyun normasının artırılması, Elşən Mirzəyev suvarma arxının təmizlənməsi, Babək
Əliyev işıq sayğacının dəyişdirilməsi və digər məsələlər ilə bağlı müraciət ediblər.
Qaldırılan məsələlərin bəziləri yerində həll olunub, bir qismi nəzarətə götürülüb, rayon
rəhbəri tərəfindən əlaqədar qurumlara aidiyyəti tapşırıqlar verilib.
Qəbulda iştirak edən sakinlər onların problemlərinin həllinə həssaslıqla yanaşıldığına,
şəhid ailələri və qazilərə göstərilən diqqət va qayğıya görə Azərbaycan

Respublikasının Prezidenti cənab İlham Əliyevə və Birinci vitse-prezident Mehriban
xanım Əliyevaya öz minnətdarlıqlarını bildiriblər.