Özünü nazirliyin işçisi kimi təqdim edən şəxsin torpaq sahələri müsadirə olundu - QƏRAR

Şirvan Apellyasiya Məhkəməsində Biləsuvar rayonunda dələduzluq və rüşvətə təhrik etməkdə təqsirləndirilən Elman Nuriyevin barəsindəki hökmdən dövlət ittihamçısı tərəfindən verilən apellyasiya protesti üzrə məhkəmə iclası başa çatıb.
 
Pravda.az-ın əldə etdiyi məlumata görə, hakim Elşad Əliyevin sədrliyi ilə keçiriləcək prosesdə qərar elan olunub. 
 
Qərara əsasən, protest qismən təmin edilib, Lənkəran Ağır Cinayətlər Məhkəməsinin çıxardığı 5 il müddətinə azadlıqdan məhrumetmə cəzası dəyişdirilib. Təqsirləndirilən şəxs məxsus 7 nəfər ailə üzvləri ilə ümumi birgə mülkiyyətində olan 3.71 ha kənd təsərrüfatı təyinatlı torpaq sahəsi və ailə üzvləri ilə ümumi birgə mülkiyyətində olan 0,22 ha həyətyanı torpaq sahəsinin Elman Nuriyevə məxsus olan hissəsi dövlət nəfinə xüsusi müsadirə olunub. Hökm qalan hissədə dəyişdirilmədən saxlanılıb.
Qeyd: Biləsuvar Rayon Prokurorluğun yaydığı məlumata görə, rayonun Aşağı Cürəli kənd sakini Elman Nuriyevin qanunsuz əməlləri barədə rayon prokurorluğuna daxil olmuş vətəndaş müraciətləri əsasında araşdırma aparılıb.
 
Aparılan araşdırmalarla 24 avqust 2021-ci ildən “DOST İş Mərkəzi” MMC-də ictimai işlərə cəlb olunmuş Elman Nuriyevin özünü Əmək və Əhalinin Sosial Müdafiə Nazirliyi tabeliyində Dövlət Məşğulluq Agentliyinin işçisi kimi, yəni özünü vəzifəli şəxs kimi təqdim edib, dövlət özünəməşğulluq proqramı çərçivəsində iş və ünvanlı dövlət sosial yardımla təmin edəcəyi barədə yalan vədlər verməklə 29 nəfər şəxsdən ümumilikdə 16 min manat məbləğində pul vəsaitini etibardan sui-istifadə etmə və aldatma yolu ilə ələ keçirməsinə, eyni zamanda həmin şəxsləri rüşvət verməyə təhrik etməsinə əsaslı şübhələr müəyyən edilib.

Faktla bağlı Biləsuvar rayon Prokurorluğunda Cinayət Məcəlləsinin 178.2.2, 178.2.4 (xeyli miqdarda ziyan vurmaqla təkrar dələduzluq) və 32.4, 312.1-ci (rüşvət verməyə təhrik etmə) maddələri ilə cinayət işi başlanıb.
 
Elman Nuriyeva Cinayət Məcəlləsinin qeyd edilən maddələri ilə ittiham elan edilməklə barəsində məhkəmənin qərarı ilə həbs qətimkan tədbiri seçilib.

---

---