Aidiyyatı qurumlara müraciət edilsə də, heç bir tədbir görülmür. Elə məmurlar var ki, ölkə qanunlarına əhəmiyyət vermədən öz “qanunlarını” həyata keçirməklə məşğuldurlar.Goranboy rayon Maliyyə İdarəsində də bu cür vəziyyət yaşanır. İdarənin rəhbəri İltifat Sadıqovun digər məsul şəxsləriylə əlbir olaraq, büdcə vəsaitlərini necə mənimsədiyinə dair redaksiyamıza faktlar daxil olub. Söhbət İltifat Sadıqovun qanunsuz əməlləri, saxta sənədlər əsasında büdcə vəsaitlərini talaması və digər qanuna sığmayan hərəkətləri, eyni zamanda Bakıda və rayonda sahib olduğu əmlaklar, şadlıq evi və s. barədədir. Eyni zamanda, hazırda rayonda aparılan abadlıq-quruculuq işlərində, 3 nömrəli Magistral Yol İdarəsi tərəfindən çəkilən rayon daxili yollara ayrılan vəsaitdə də İltifat Sadıqovun yaxşı “pay sahibi” olduğu bildirilir.Goranboyda maliyyə yeyintilərini gizli şəkildə həyata keçirmək İltifat Sadıqovu varlandırıb. O, Goranboyda bütün dövlət layihələrinin icrasında maliyyə maxinasiyalarını ustalıqla həyata keçirir. Maliyyə İdarəsinin rəisi Goranboyu çapıb talamaq hesabına bu rayonda villa, Bakıda evlər və obyektlərə sahib olub. Konkret olaraq İltifat Sadıqovun Goranboy rayonunda, Bakı-Gəncə yolunun kənarında sahib olduğu “Buta Mebel salonu”, “Çinar” Şadlıq evi və restoranı, digər bir sıra obyektlər, habelə rayonun Həmənli kəndində qurduğu böyük heyvandarlıq fermer təsərrüfatını qeyd etmək olar. Onun sahib olduğu “Lexus” və “BMV” kimi bahalı avtomobillər və “22-222” kimi “zerkalni nömrələr” isə daşıdığı vəzifə ilə heç cür uyğun gəlmir. Onun varidatını günbəgün genişlənməsi heç də idarə rəisi kimi aldığı əmək haqqı ilə də uzlaşmır. Bu zaman sual olunur, bəs kiçik bir rayonun maliyyə rəisi bu qədər varidatı aldığı 600-700 manat əməkhaqqı qarşılığında necə əldə edib? Yəyqin ki, aidiyyəti qurumlardan əvvəl bu suala Maliyyə Nazirliyi aydınlıq gətirəcək!
Goranboy rayonunun Maliyyə rəisi və digər dövlət məmurları ilə bağlı araşdırmamız davam edir, qısa zamanda əhatəli yazılarımız olacaq.
(Press-az.com)
