Şabran rayon İcra Hakimiyyəti iki tender elan edib. TİA.Az-ın xəbərinə görə, hər iki müsabiqədə eyni şirkət qalib gəlib.
Əvvəlcə yolların əsaslı təmiri üçün tenderdə iştirak edən “Şabran-D” MMC-yə 269 992.26 manat ayrılıb.
Ardınca, həmin şirkət abadlıq işlərinin satın alınması tenderində nə hikmətdirsə, yenə qalib olub.

Bu məqsədlə 299 958.83 manat nəzərdə tutulur. Deyəsən, icra başçısı Asif Hüseynovun “Şabran-D” MMC-dən xoşu gəlir.
“Şabran D” MMC-nin direktoru Bədəlov Cəlal Bayram oğludur. O, bundan öncəki başçıs Novruz Novruzova şikayət yazmışdı.
Onun sözlərinə görə, başçının birinci müavini Mehdi Balabəyov ondan 227 000 manat mənimsəyib. Çox maraqlıdır ki, indi də M.Balabəyov Şabran İH-də birinci müavin vəzifəsini tutur.
Görəsən, müavin tərəfindən pulu yeyilən şirktə rəhbərinin yenidən İH-in elan etdiyi tenderdə iştirak etməkdə niyyəti nə olub? Yeni icra başçısı Asif Hüseynovun bu məsələdən cəbəri varmı? Ümumiyyətlə, Şabranda əksər tenderləri bu şirkət udur.

Bu da maxinasiya və korrupsiya şübhələrinə böyük meydan açır. Üstəlik, şirkətin rəhbəri ilə müavin arasında 227 minlik qalmaqal olub.
Sitat: “Şabran rayon İcra Hakimiyyəti başçısının 1-ci müavini Mehdi Balabəyov rayonda aparılan quruculuq işlərinin və yeni layihələrin tenderindən iştiraka razılıq vermək məqsədi ilə məndən pul istəmiş və mən də bu tenderin uğurlu nəticələrinə və onun yalan vədlərinə inanaraq 227.000 (iki yüz iyirmi min) manat pul verdim. Sonradan bu şəxs tərəfindən aldandığımı görüb pulları geri istədim. Mehdi Balabəyov çox get-gəldən sonra 5 nəfərin iştirakı ilə məndən aldığı puldan 50.000 (əlli min) manatı qaytardı və yenə də gözləməyi təklif etdi. Lakin qalan pulumu qaytarmadı”.
Buyurun, tenderdə qalib olmaq üçün iş adamı məmura rüşvət verib, sonra pulu batıb, aləm qarışıb, məsələ hüquq-mühafizə orqanlarına qədər gedib çıxıb, indisə yenə eyni şirkət 2 tenderin qalibi olur. Deməli, başçının əvvəldən xeyir-duası olub ki, bu şirkətlə iş görülsün, heç bir şəffaf tenderdən söhbət gedə bilməz.