Gəncədə İdman Sarayının tikintisi üçün 53 milyon manat xərcləndiyinə Niyazi Bayramovun özü necə, inanırmı? - İcazə verin, şübhələnək...


Dünən Gəncə şəhər İcra Hakimiyyəti Gəncə şəhərində İdman Sarayının tikintisi işlərinin davam etdirilməsi üzrə keçirdiyi tenderə yekun vurması ilə bağlı dövlət satınalmalarının vahid internet portalında “Rövşən Oğuz Qrup” Məhdud Məsuliyyətli Cəmiyyəti ilə 10 000 000 manat məbləğində satınalma müqaviləsinin bağlanılması barədə məlumat yerləşdirib.

Məlum olduğu kimi Prezident İlham Əliyev 30 yanvar 2022-ci ildə Gəncə şəhərinə səfəri zamanı Gəncə Dövlət Dram Teatrının yeni binasının, 2 saylı Gəncə regional “ASAN xidmət” mərkəzinin açılışlarında iştirak edib, Gəncə İdman Sarayında aparılan tikinti işlərinin gedişi ilə tanış olmuşdu. Dövlətimizin başçısının tanış olduğu Gəncə İdman Sarayında tikinti işlərinin artıq yekunlaşdığı görsənir. Lakin Prezidentin səfərindən sonra Gəncə şəhər İcra Hakimiyyəti sözügedən idman sarayında tikinti işlərinin davam etdirilməsinə mart-sentyabr aylarında tam 25 milyon manat vəsait ayırır. Burada suallar yaranır. Hara gedir bu milyonlar?

Xatırladaq ki, Gəncə şəhərində İdman Sarayı inşa edilməsi haqqında sərəncamı Prezident İlham Əliyev hələ 13 noyabr 2017-ci ildə vermişdi. Sərəncama əsasən İdman Sarayının layihələndirilməsi və tikintisi üzrə sifarişçi funksiyaları, habelə obyektin inşası prosesində həyata keçiriləcək işlərin təşkili və əlaqələndirilməsi Gəncə şəhər İcra Hakimiyyətinə həvalə edilmişdi. İdman Sarayının tikintisinə 2018-ci ilin mart ayında, sabiq İcra başçısı Elmar Vəliyevin dönəmində başlanılıb. Gəncədəki məlum hadisələrdən sonra, 28 avqust 2018-ci ildən Niyazi Bayramov Gəncə şəhər İcra Hakimiyyətinin başçısı təyin edilir və İdman Sarayının sifarişçi funksiyaları da bir başçı kimi onun nəzarətinə keçir.

Bəs 2018-ci ilin mart ayından inşasına başlanan tikilidə işlər niyə ləng gedir və hər il külli miqdarda dövlət vəsaiti ayrılmasına baxmayaraq İdman Sarayının istifadəyə verilməsi nədən uzadılır? Bu kimi suallara mətbuat vasitəsi ilə bir neçə dəfə cavab axtarmağa çalışmışıq. Lakin Gəncə şəhər İcra Hakimiyyətinin rəsmiləri bu suallara cavab verməmişlər. Artıq beşinci ilinə keçmiş İdman Sarayının tikintisinin başa çatdırılmasının niyə bu qədər uzandığına aydınlıq gətirilmir, açıqlama verilmir. Burada vəsait çatışmazlığından söhbət gedə bilməz. Çünki rəsmi dövlət qurumları işin davam etdirilməsi üçün müqavilələrin bağlınıldığı barədə məlumatlar yayıb və ayrılan vəsiatlər də, görülən işlər də ortadır.

Aktualinfo.org-un dövlət satınalmalarının vahid elektron portalına yerləşdirilmiş məlumatlar əsasında apardığı araşdırmalarda son üç il ərzində tender yolu ilə sözügedən idman sarayının tikintisinə külli miqdarda vəsaitin ayrıldığı ortaya çıxır. Belə ki, Gəncə şəhər İcra Hakimiyyəti Gəncə şəhərində İdman Sarayının tikintisi işlərinin davam etdirilməsi məqsədi ilə “Rövşən Oğuz Qrup” MMC ilə 14.03. 2019-cu il tarixdə 4 000 000,00 manat, 09.04.2020-ci il tarixdə 4 600 000 manat, 06.10.2020-ci il tarixdə 1 800 000 manat, 19.03.2021-ci il tarixdə 9 400 000 manat, 12.08.2021-ci il taixdə 5 000 000 manat, 17.12.2021-ci il tarixdə 181 600 manat (milyonların müqabilində bu yüz səksən min nəyə lazım olub görəsən- red.), 09.03.2022-ci il tarixdə 15 000 000 manat, 28.09.2022-ci il tarixdə 10 000 000 manat məbləğində satınalma müqavilələrinin bağlanıldığını açıqlayıb ki, ümumi olaraq 49 981 600 manat təşkil edir.

Yerli mətbuat orqanlarının 03.09.2019-cu il tarixdə yaydığı məlumatda bildirilir ki. Ölkə prezidentinin imzaladığı sərəncam əsasında inşa edilən tikili 3 hektara yaxın ərazini əhatə edir. Sarayda müxtəlif növ olimpiya və qeyri-olimpiya idman növləri üzrə yarışların, təlim-məşq toplanışlarının keçirilməsi üçün zallar, həmçinin üzgüçülük hovuzu yaradılacaq. Regionun ən böyük idman sarayının 2021-ci ilin sonuna qədər istifadəyə verilməsi nəzərdə tutulur. Təqdim olunan şəkildən də göründüyü kimi idman sarayının bünövrəsi 2018-ci ildən qoyulub. Sonrakı şəkillər isə 2021-ci ilə aiddir və beton karkasdan ibarət olan bu tikiliyə çəkilən xərci təxmin etmək olar.

Gəncə şəhər İcra Hakimiyyətinin başçısı Niyazi Bayramovun “Rövşən Oğuz Qrup” MMC-nin rəsmisi ilə İdman Sarayının tikintisi işlərinə baxış keçirdiyi zaman çəkilən bu şəkildən göründüyü kimi karkasların arası adi qırmızı kərpiclə hörülüb. Sarayın tavanının isə dəmir konstruksiyalarla inşa edildiyini aşağıdakı şəkildə görsənir. Son dörd ildə bütün bu işlərin görülməsinə 49 981 600 manat vəsatin xərclənməsi inandırıcı gəlirmi?

Bu hələ son deyil. Qeyd edək ki Gəncə şəhər İcra Hakimiyyəti İdman Sarayının layihələndirilməsi işlərinə də 30.04.2020-ci il tarixdə 400 000 manat, 15.04.2021-ci il tarixdə isə tikintinin layihə-smeta səndlərinin hazırlanması ( əlavə və dəyişikliklərə əsasən) işlərinin satın alınması üzrə 418 400 manat məbləğində satınalma müqavilələrini “BAŞAK PROJE VƏ DİZAYN” Məhdud Məsuliyyətli Cəmiyyəti ilə bağlayıb. Bu isə idman sarayının tikintisinin layihələndirilməsinə 818 400 manat vəsaitin ayrılması deməkdir. Tikintisinə 50 milyon xərc çəkilmiş Sarayın layihələndirilməsinə çəkilən bu cüzi xərc isə heç inandırıcı deyil.

Biz buraya Azərbaycan Respublikası Prezidentinin ehtiyat fondundan Gəncə şəhər İcra Hakimiyyətinə Gəncə şəhərində İdman Sarayının tikintisi işlərinin davam etdirilməsi məqsədilə ayrılan vəsaitləri əlavə etməmişik. Bu məqsədlə 24 iyun 2020-ci ildə 3,0 (üç) milyon manat vəsaitin ayrıldığı məlumdur. Bunula birgə son 4 ildə Gəncə şəhərində İdman Sarayının tikintisi işlərinin davam etdirilməsinə tam 53 800 000 manat vəsait ayrılıb, amma işlər hələ də yekunlaşmayıb.

Qeyd etdiyimiz kimi bütün bu məlumatlar İqtisadiyyat Nazirliyi kimi ciddi bir dövlət qurumunun rəsmi portalında yerləşdirilib. Yəni, demək istəyirik ki, İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti sözügedən portala yanlış, qeyri dəqiq məlumatlar yerləşdirməz. Bütün bunlar tenderlər keçirildikdən sonra qalib şirkətlə bağlanan müqavilələr üzrə ayrılan dövlət vəsaitləridir ki, “Dövlət Satınalmaları Haqqında” Azərbaycan Respublikası Qanununa görə satınalma prosedurları yekunlaşdıqdan sonra mütləq göstərilməlidir.

Göründüyü kimi son dörd il ərzində. yəni Niyazi Bayramov Gəncə şəhər İcra Hakimiyyətinin başçısı təyin olunduqdan sonra Gəncədə İdman Sarayının tikintisinə 53 milyon 800 min manat ayrılıb. Amma İdman Sarayının tikintisi hələ başa çatdırılmayıb. Tikintisi hələ başa çatdırılmamış, şəkillərdə gördüyünüz İdman Sarayına bu qədər vəsaitin xərcləndiyi nə dərəcədə realdır, istərdik Niyazı Bayramov aydınlıq gətirsin. Bir də çox istərdik ki, Niyazi Bayramov bir məsələyə də aydınlıq gətirsin. Əgər gətirə bilərsə. Gətirə bilməyəcək də. Çünki bu milyonların çox hissəsi Niyazi Bayramovun şəxsi məqsədlərinə xərclənib. Məsələn oğlunun bahalı avtomobillərinə, xarici səyahətlərinə və daha nələrə…

Aktualinfo.org
Tarix: 29-09-2022, 22:14
Xəbəri paylaş



Xəbər lenti

Gündəm

Əyalət

Siyasət

Cəmiyyət

Hadisə

Şou biznes

Sosial

İdman