Sülhməramlılar Qarabağı vaxtından əvvəl tərk edə bilər - TƏHLİL


“Bu yaxınlarda Rusiya prezidenti Putin Qərb mediasına müsahibəsində deyib ki, bizi uşaq kimi aldatdılar. “SSRİ dağılan ərəfədə söz verilmişdi ki, NATO genişlənməyəcək. Habelə köhnə sovet respublikaları mədəni şəkildə “boşanma” həyata keçirdikdən sonra əvvəlki təsir dairəsində qalacaq”.

Yəni ruslar şikayət edirlər. NATO isə artıq Moldova, Ukrayna, Gürcüstanda tədricən güclənir. Bu da istər-istəməz Rusiyanın təsirlərini zəiflədir”.

Bu sözləri Vəhdət Partiyasının sədri, deputat Tahir Kərimli Reyting.az-a açıqlamasında bildirib.

T. Kərimli ehtimal edir ki, Rusiyanın Qarabağdakı müddətli sülhməramlıları regionu vaxtından əvvəl tərk edə bilər: “Çünki ermənilər getdikcə məğlubiyyətləri ilə barışmaq məcburiyyətindədir. Üstəlik, zaman keçdikcə ermənilər Xankəndini tərk edəcəklər. Bu halda sülhməramlıların sülh yaratması üçün tərəflərdən biri olmayacaq”.

Deputat deyib ki, Rusiyanın dünyada təsiri getdikcə azalır. O, buna səbəblərdən biri kimi Qərbin Rusiyaya sanksiyalarını göstərir:

“Digər tərəfdən, Qərb dövlətləri inkişaf edir. Rusiya isə hərbi imkanlarına və xammalına güvənir. Ancaq texnologiyalar baxımından da Qərb ciddi inkişaf edir. Zənnimcə, Rusiya bu inkişafla barışmaq və hesablaşmaq məcburiyyətində qalacaq”.

T. Kərimli əlavə edib ki, Rusiya və Türkiyə arasında əməkdaşlıq olmasına baxmayaraq bu ölkələr bəzən fərqli mövqedən çıxış edirlər. O, buna misal kimi Liviyanı göstərir:

“Türkiyə və Rusiya Liviyada fərqli qüvvələri dəstəkləyirlər. Əslində dünyada bir oyun gedir və burada Türkiyənin xüsusi rolu görünür, üstəlik, gücü getdikcə artır”.

Bu iki ölkə arasında mümkün qarşıdurmaya gəlincə, deputat bunu real saymır, ancaq deyir ki, hər bir ölkənin öz siyasəti var:

“Məsələn, Rusiya istəmirdi ki, Türkiyə Ukraynaya dron satsın. Ancaq Türkiyə bunu həyata keçirdi. Suriyada da onlar tərəf kimi çıxış edirlər.

Qarabağ məsələsində də dialoq var.

Siyasət gücə bağlıdır. Güc artıqca, danışıqlarda da ona uyğun üstünlük qazanırsan.

Mən hesab edirəm ki, son illər Türkiyə böyük inkişaf yolu keçib. Hətta Fransa kimi dövlət Türkiyənin güc kimi varlığını qəbul edir, son Brüssel görüşündə nəhayət bitərəf qaldığını ifadə etdi.

Türkiyə inkişaf edir, elektron hərbi sənaye, dronlar, təyyarələr kimi məsələlərlə məşğuldur. Türkiyə dünyanın ilk 20 dövlətləri sırasına daxildir. Bu isə onun gücünü və əhəmiyyətini ortaya qoyur”.
Tarix: 30-06-2021, 11:47
Xəbəri paylaş



Xəbər lenti

Gündəm

Əyalət

Siyasət

Cəmiyyət

Hadisə

Şou biznes

Sosial

İdman