““Tərtər işi”ni Aprel savaşındakı xəyanətlərini ört-basdır etmək üçün ortalığa atdılar...”
“Aprel döyüşlərinin planlaşdırılmasına və icrasına əsas cavabdeh keçmiş Baş Qərargah rəisi Nəcməddin Sadıkov, Tərtər istiqamətində həmin plana uyğun döyüş əməliyyatları həyata keçirməli olan korpus komandiri isə Hikmət Həsənov idi...”
"Prezident İlham Əliyevin göstərişi ilə yeni istintaq qrupu yaradıldıqdan sonra artıq “Tərtər işi”nin tam açılacağına xalqda, o cümlədən bir vətəndaş və hərbçi olaraq məndə böyük inam var. Bu işin təşkilatçı və icraçıları hamısı tutduqları rütbə və vəzifələrindən asılı olmayaraq qanunun yol verdiyi ən sərt formada cəzalarını çəkməlidir. Çünki bu hansısa şəxsə, hakimiyyətə qarşı yox, bilavasitə Azərbaycan dövlətçiliyinə, ordusuna, xalqına qarşı yönəlmiş bir təxribat olub. Belə təxribatlarla xalqın öz dövlətinə, ordusuna inamını sındırmaq istəyirdilər”.
Bu fikirləri "moderator.az"-a açıqlamasında Müdafiə nazirinin sabiq müavini, ehtiyatda olan polkovnik Mehman Səlimov dilə gətirib.

““Tərtər işi” siyasi bir cinayətdir və burada Azərbaycan dövlətinin, xalqının Qarabağdan, işğal altındakı torpaqlardan birdəfəlik əlini üzməsi üçün qondarma zəmin hazırlanması niyyəti güdülüb. Bununla dövlət rəhbərliyini, şəxsən cənab Ali Baş Komandanı da inandırmağa çalışıblar ki, guya Azərbaycan ordusu yoxdur, dağılır, başdan-ayağa satqınlardan, əxlaqsızlardan ibarətdir və s. Məqsəd İlham Əliyevdə vaxtı yetişəndə Qarabağa hücum əmri verməkdə ciddi tərəddüd yaratmaq olub. Bir sözlə, Tərtər olayları xırda bir cinayət, intriqa-filan deyildi. Bunun hamısı 44 günlük azadlıq savaşının baş tutmaması üçün qurulmuş düşmən planlarının tərkib hissəsi olub”, - polkovnik açıqlamasının davamında bildirib.
Mehman Səlimov daha sonra deyib: “Məndə olan məlumata görə, 2016-cı ilin Aprel döyüşləri artıq torpaqlarımızın azad edilməsi məqsədilə başlanmışdı. Lakin baş vermiş xəyanət nəticəsində xeyli hərbçimiz, o cümlədən xüsusi təyinatlılarımız mühasirəyə salınaraq həlak oldu. Bundan sonra da Ali Baş Komandan genişmiqyaslı hücumu dayandırmağa məcbur qaldı. Odur ki, müəyyən qüvvələr məhz özlərinin təşkil etdiyi o xəyanəti, biabırçılığı “əsaslandırmaq”, öz satqınlıqlarını aşağı təbəqədəki zabit və əsgərlərin üzərinə yıxmaq üçün “Tərtər işi”ni düzüb-qoşdular. Beləliklə, neçə-neçə zabit, gizir və əsgərlərimizi etmədikləri xəyanət və cinayətləri işgəncə altında “boyunlarına almağa” məcbur etdilər. Bununla sübut etməyə çalışırdılar ki, guya Azərbaycan ordusu başdan-ayağa xəyanətə, əxlaqsızlığa qurşanıb, şəxsi heyətdə mənəvi ruh, döyüş ruhu yoxdur, bu ordu torpaqların azadlığı uğrunda müharibə apara bilməz. Gerçəkdən də, Aprel döyüşləri vaxtı xəyanət olmuşdu və ermənilər ordumuzun haradan və necə hücuma keçəcəyini bilirdi. Əməliyyat planı satılmışdı və bunu edən qruplaşma öz xəyanət və cinayətlərini ört-basdır etmək üçün 2017-ci ildə Tərtər təxribatını işə saldı ki, uğursuzluğun bütün günahı, dediyim kimi, orada heç bir əsas olmadan “erməniyə işləməkdə” suçlanan əsgər və zabitlərin üzərində qalsın... 
Xatırladıram ki, 2016-cı il Aprel döyüşlərinin planlaşdırılmasına və icrasına əsas cavabdeh keçmiş Baş Qərargah rəisi Nəcməddin Sadıkov, Tərtər istiqamətində həmin plana uyğun döyüş əməliyyatları həyata keçirməli olan korpus komandiri isə Hikmət Həsənov idi”.

“Sizcə, hər hansı bir orduda genişmiqyaslı döyüş əməliyyatının planı sıravi əsgər və aşağı zabit heyəti tərəfindən düşmənə satılması mümkündürmü?” sualını isə müdafiə nazirinin keçmiş müavini belə cavablandırıb: “Xeyr, əsgər, gizir və zabitlər döyüşdə plana əsasən verilən əmrlərin icraçısı olur. Yalnız aşağı komandir heyəti döyüş planının yalnız kiçik elementlərini bilə bilər...
Sizcə, nəyə görə 44 günlük savaş başlamamışdan öncə Nəcməddin Sadıkovu vəzifəsindən azad etmədilər, amma 3 gün sonra o, işindən faktiki olaraq kənarlaşdırıldı. Deməli, bu dəfə də xainlər tərəfindən plan satılmışdı. Amma cənab Ali Baş Komandan öncədən bilirdi ki, plan satıla bilər. Və iki-üç gün aldadıcı gedişlərlə ermənilər inandırıldı ki, guya ordumuz onlara satılmış plan əsasında hərəkət edir və bütövlükdə hərbi əməliyyatlar həmin plan üzrə gedəcək. Ona görə də Ermənistan bütün əsas qüvvələrini əsasən Ağdam və “Ohanyan səddi” istiqamətinə cəmlədi. Bundan sonra Azərbaycan ordusu tam şəkildə nəzərdə tutulmuş əsl planla hərəkət etməyə başladı və ermənilər çaş-baş qaldı. Onlar yenidən qoşunları digər istiqamətlərə daşımağa çatdırmadılar. Və düşmənin xaotik şəkildə hərəkət edən kalonlarını PUA-larımızın, artilleriyaçılarımızın dəqiq zərbələri məhv etdi...
Yəni 44 günlük savaş başlanmamışdan öncə xəyanət ehtimalı nəzərə alınaraq Ali Baş Komandanın rəhbərliyi ilə iki plan hazırlanmışdı: biri aldadıcı plan idi və onu məlum qruplaşma satmışdı. Digəri isə əsas plan idi. Amma əsas plan yalnız 3-cü gündən sonra ortaya çıxdı və hər şey birbaşa Prezident, Ali Baş Komandan tərəfindən idarə olunmağa başlandı. Aldadıcı planın satılmasında iştirakı ehtimal olunan əsas fiqurlar artıq kənarlaşdırılmışdı. Odur ki, 44 günlük savaşın sonu qələbə ilə bitdi. Və şəhid və qazilərimizin canı, qanı, cəsarət və fədakarlığı hesabına qazanılan qələbə ilə Azərbaycan Ordusu sübut etdi ki, bütün xəyanət və təxribatlara rəğmən, o, döyüşməyə və torpaqlarımızı azad etməyə qadir bir silahlı qüvvədir...

Yalnız o təəccüblüdür ki, həm Aprel döyüşlərində, həm də 44 günlük savaşdakı xəyanətlərdə iştirakına şübhə olmayanlar hələ də azadlıqdadır. Görünür, özünün də dediyi kimi, “nəyi nə vaxt və necə etməyi yaxşı bilən” Ali Baş Komandan məqamında onların da qanuni cəzalarına çatmalarına nail olacaq. Yəqin ki, hələlik şimal qonşumuzu çox da qıcıqlandırmaq məqsədəuyğun deyil. Ancaq hesab edirəm ki, məhz “Tərtər işi” üzrə yaradılmış yeni istintaq qrupu xəyanətin ilmələrini açdıqca əsl xəyanətkarların cinayət və xəyanətləri də fakt və sənədlərlə qarşılarına qoyulacaq. Və bundan sonra artıq şimal qonşumuzun da qıcıqlanmağa, əks-reaksiya verməyə və satqınları himayə etməyə əsası olmayacaq... 
Göründüyü kimi, mediada, sosial şəbəkələrdə xalq Tərtər cinayətinin bütün təşkilatçı və icraçılarının cəzalandırılmasını tələb edir. Odur ki, dövlətimiz buna mütləq nail olmalı, satqın və xainlər öz layiqli cəzalarını almalıdırlar”.

---

---