Brüssel “diktator” saydığı prezidentə dəvət göndərdi –Avropa İttifaqı Lukaşenkoya da qucaq açır

Brüssel Belarus prezidenti Aleksandr Lukaşenkonu Şərq Tərəfdaşlığı (ŞT) qrupunun gələn ay keçiriləcək sammitinə dəvət edib.

Strateq.az xəbər verir ki, bu haqda məlumatı Azadlıq Radiosu Avropa İttifaqındakı mənbələrinə əsasən yayıb.

Məsələdən xəbərdar olan mənbələr Azadlıq Radiosuna deyiblər ki, Belarus noyabrın 24-də keçiriləcək bu sammitə təşkilatın başqa beş üzvü kimi “heç bir məhdudiyyət qoyulmadan” dəvət edilib.

Şərq Tərəfdaşlığının beş üzvü Ermənistan, Azərbaycan, Gürcüstan, Moldova və Ukraynadır.

Sammitə dəvətnamələr üzv ölkələrə oktyabrın 6-da göndərilib.

ŞT-nin bundan əvvəlki sammitləri ərəfəsində Avropa İttifaqı açıq şəkildə bildirirdi ki, Belarusa 21 ildir prezidentlik edən və “Avropanın son diktatoru” adını qazanmış Lukaşenko bu qrupda təmsil oluna bilməz.

2015-ci ildə tərəfdaşlığın Riqada keçirilən son sammitində Belarusu ölkənin xarici işlər naziri Uladzimer Makey təmsil etmişdi.

Avropa İttifaqı Şərq Tərəfdaşlığı təşəbbüsünü 2009-cu ildə 6 Şərqi Avropa və Qafqaz ölkələrinin iqtisadi inteqrasiyası və Avropa dəyərlərinin yayılması məqsədilə başlayıb.

Belarusa 1994-cü ildən rəhbərlik edən Aleksandr Lukaşenko 2015-ci ildə Qərbin “nə azad, nə də ədalətli” adlandırdığı seçkidə beşinci müddətə prezident seçilib.

Avropa İttifaqı iki müxalifət siyasətçisi, bir jurnalist və bir biznesmeninin müəmmalı şəkildə yoxa çıxması ilə bağlı 2004-cü ildə Belarusa qarşı məhdudlaşdırıcı tədbirlərə əl atmışdı.Avropa Şurası Belarusda bundan əvvəl, 2010-cu ildə keçirilmiş prezident seçkisindən sonra müxalifətin təqib olunması ilə əlaqədar Minskin üzərinə yeni sanksiyalar elan etmişdi.

Lakin Avropa İttifaqı 2016-cı ilin fevralında Belarus üzərinə qoyulmuş əksər sanksiyaları qaldırıb. Bu sanksiyalara görə, 170 Belarus vətəndaşının aktivləri dondurulmuş və onlara viza qadağası qoyulmuşdu. Bundan başqa, ölkənin 14 şirkətinə məhdudiyyətlər tətbiq edilmişdi. Lakin 2016-cı ilin avqustunda Belarus bütün siyasi məhbusları azad etdikdən sonra Brüssel də cavab olaraq sanksiyaları qaldırıb.

---

---