Bayden: "Rusiya görür ki, artıq "Patriot"lar Ukraynada işləyirlər"

"Patriot" hava hücumundan müdafiə sistemi

"Ukraynada döyüşlər kritik məqamdadır və Qərb Kiyevi dəstəkləmək üçün əlindən gələni etməlidir".

Bizimyol.info xəbər verir ki, ABŞ prezidenti Co Bayden cümə axşamı belə bəyanatlarla çıxış edib.
“İndi Ukraynada müharibə kritik nöqtədədir. Biz ukraynalılara Rusiyanın təcavüzünə müqavimət göstərmək üçün əlimizdən gələni etməliyik, çünki Rusiya işğalı dayandırmaq fikrində deyil - Amerika lideri kabinetin iclasında bildirib.
Onun sözlərinə görə, bir neçə saat əvvəl o, Almaniya kansleri Olaf Şolzla Ukraynadakı vəziyyət və Qərbin “Avropadakı alyansları” çərçivəsində əməkdaşlıq barədə “uzun müzakirə” aparıb: “Nə edəcəyimizi danışdıq. Və bu gün biz Ukraynaya birgə dəstəyi genişləndirəcəyimizi elan etdik”,- Bayden vurğulayıb.
“Biz, Birləşmiş Ştatlar Ukraynaya "Bradley" piyada döyüş maşınları, almanlar isə Ukraynaya özlərində olan "Marder" piyada döyüş maşınları verəcək. Bundan əlavə, biz Ukraynaya Rusiyanın hava zərbələrindən müdafiə olunmasına kömək edəcəyik. Həmçinin Almaniya Ukraynaya "Patriot" hava hücumundan müdafiə sistemlərinin əlavə akkumulyatorlarını vermək niyyətindədir”,- deyə Amerika prezidenti əlavə edib.
 Volodimir Zelenski və Co Bayden
Eyni zamanda, Bayden bildirib ki, bu Amerika sistemləri Ukraynada artıq öz effektivliyini nümayiş etdirib, baxmayaraq ki, Ukraynanın xarici işlər naziri Dmitri Kuleba yanvarın 4-də "Patriot" sistemlərinin Kiyevə təhvil verilməsi üçün hazırlıqlara yenicə başlandığını bildirib.
"Rusiya görür ki, artıq "Patriot"lar Ukraynada işləyirlər, onlar bu silahın necə yüksək səviyyədə xidmət etdiyini izləyirlər və Ukrayna ordusuna çox kömək etdiyini anlamağa başlayırlar", - Bayden bildirib.
Dekabrın sonunda “Politico” qəzeti öz mənbələrinə istinadən yazıb ki, ukraynalı hərbçilərə “Patriot”u öyrətmək üçün bir neçə ay lazım olacaq və Pentaqon Ukrayna hərbçiləri tam hazırlığı başa vurana qədər onları Kiyevə köçürməyəcək. Cümə axşamı keçirilən brifinqdə Pentaqonun sözçüsü Hərbi Hava Qüvvələrinin briqada generalı Patrik Rayder bildirib ki, ABŞ hakimiyyəti Ukrayna hərbçilərinin Birləşmiş Ştatların ərazisində "Patriot" sistemlərinin istifadəsi üzrə döyüş təlimi keçirmək variantını nəzərdən keçirir.
Dekabrın 21-də Ukrayna prezidenti Vladimir Zelenski Baydenin dəvəti ilə Vaşinqtonda bir neçə saat olub, dövlət başçısı Konqresin rəhbərliyi ilə görüşüb və orada çıxış edib. Zelenskinin səfəri ABŞ-ın 1,85 milyard dollarlıq yeni hərbi yardım paketinin elanı ilə eyni vaxta təsadüf edib.

---

---