Rayon İcra Hakimiyyətləri dayanacağın yerini zəbt edib, hasarlayıb, o yeri satır və şəhər nəqliyyatını iflic vəziyyətinə salır.
Bu sözləri Prezident İlham Əliyev Nazirlər Kabinetinin 2018-ci ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunan iclasındakı çıxışında şəhər nəqliyyatı ilə bağlı danışarkən deyib. Prezident bildirib ki, o səhvləri buraxan məmurlar işdən qovulub:
“Şəhər nəqliyyatı hamımız üçün rahat olmalıdır. Şəhərsalmaq qaydaları elə gözlənilməlidir ki, əngəl törətməsin, əksinə, ona köməklik göstərsin. Bakı, Azərbaycan böyüyür, qonşu ölkələrdən fərqli olaraq, bizim əhalimiz müstəqillik illərində 7 milyondan 10 milyona çatıb. Böyük meqapolislərin vəziyyətinə düşmək istəmirik – saatlarla insanlar tıxaclarda əziyyət çəkir. Biz burda hansısa damarlar, yollar açırıq, ancaq hansısa yaramaz bir məmur pul naminə gedir o yeri satır, orda bina tikirlər, qanunsuz, sonra da o binanın söküntüsünə dövlət böyük vəsait xərcləməli, kompensasiya verməlidir qanunsuz tikən ordan çıxsın ki, yol açılsın.
Ona görə çox ciddi tapşırıq verirəm ki, dövlət orqanları nəticə çıxarsınlar”.