Cahan.info-nun məlumatına görə, N.Zeynalov rayonda narazılıq yaradır, vətəndaşların problemlərini həll eləmir. Elə Cəlilabadın deputatları da ondan geri qalmırlar.
Fəzail İbrahimli və Malik Həsənov seçicilərin, problemli sakinlərin dərd-səri ilə maraqlanmırlar. Bu haqda bolgexeber.com-a rayonun Göytəpə şəhəri 5 saylı uşaq xəstəxanasında anası ilə birlikdə yaşayan Hüseynov Ağasəf bildirib.
O, ağır şəraitindən şikayət edir. A.Hüseynov bu yaxında Cəlilabad icra hakimiyyətində olub. O, bununla üçüncü dəfədir icra başçısının qəbulundadır. Amma xəstəxanaya sığınan ailəyə köməklik göstərilmir.
Onun sözlərinə görə, İH başçısı onları dinləyib: “Bildirdik ki, 25 ildir yaşadığımız evin altı sudur, divarlar çatlaqdır, işıq, qaz, su yoxdur. Çox çətinliklə, zülmlə yaşayırıq.
Dedik bir sığınacaq verin, heç nəyimiz yoxdur. Torpağımız, imkanımız yoxdur ki, ev tikək. Biz də bu ölkənin vətəndaşlayırıq. Ancaq nəticəsi yoxdur”.
Məsələdən Göytəpənin icra nümayəndəsi də agahdır: “Deputat Fəzail İbrahimliyə müraciət etmişik. Deyirlər ki, bizdə belə fond yoxdur sizə köməklik göstərək.
Bəs onda biz nə edək, kimə deyək dərdimizi?! Prezident dəfələrlə məmurlara müraciət edərək vurğulayıb ki, məmurlar vətəndaşların qayğısı ilə məşğul olmalıdır”.
Cahan.info xəbər verir ki, icra başçısı nəinki sıravi vətəndaşları, hətta Komanlı kənd sakini, I qrup əlil olan Rəşad adlı şəxsə qarşı belə saymamazlıq etmişdi.
Əlil arabasında icra başçısı ilə görüşə can atan Rəşad idarənin işçiləri tərəfindən də təzyiqlərə məruz qalmışdı. Ona nə köməklik etmişdilər, nə də problemlərini dinləmişdilər.
Cəlilabadın mütləq-hakimi Namiq Zeynalov Əmlak Komitəsinin Dövlət Reyestri Xidmətinin rəis müavini vəzifəsində çalışıb. Sadə dildə desək, komitə sədri Kərəm Həsənovun kadrıdır.
Ancaq son aylarda N.Zeynalov K.Həsənovun adamlarına savaş açmağa başlayıb. O, həm Cəlilabadın keçmiş icra başçısı Əziz Əzizovun əleyhinə süjet hazırladır, həm K.Həsənovun dayısı olan kənd təsərrüfatı idarəsi müdiri Rahib Kərimovu sıxışdırır.
bu günlərdə “D” TV efirində yayımlanan reportajda Cəlilabadda son günlər görülən işlərdən, ötən dövrdən qalan problemlərdən bəhs olunub.
Bununla Ə.Əzizovu “vuran” və onun heç bir iş görmədiyi mesajını verməyə çalışan hazırkı icra başçısı K.Həsənovun kadrına ilişmiş olur.
N.Zeynalov özünü işləyən məmur kimi nümayiş etdirməyə cəhd göstərməklə bərabər kuratorun adamlarını gözdən salmaqla məşğuldur.
Halbuki, Ə.Əzizov pis xidmət göstərsəydi, onu Cəlilabaddan Bakının strateji rayonlarından olan, bir çoxlarının arzusunda olduğu Yasamala icra hakimi təyin etməzdilər.
N.Zeynalov isə prezidentin etimad göstərib vəzifə verdiyi Ə.Əzizovu telekanalda yarıtmaz məmur kimi təqdim etməyə can atıb. Reportajda yol kənarlarının abadlaşdırılması, işıq dirəklərinin yenilənməsi, yolların düzəldilməsi göstərilir.
Və sakinlərin, eləcə də müxbirin dilindən bu problemlərin Ə.Əzizovun dövründən qaldığı diqqətə çatdırmağa cəhd göstərilir.
Cəlilabad icra başçısının müharibə elan etdiyi adamlardan biri də K.Həsənovun dayısıdır. Kənd təssərrüfatı idarəsinin müdiri olan Rahib Kərimov rayonda böyük nüfuz və hörmət sahibidir.
Komitə sədrinin dayısı Cəlilabadda əkinçiliklə məşğul olanlara, aztəminatlı ailələrə əl tutur. Hətta pay torpağında əkdiyi məhsuldan əldə olunan gəliri imkansızlara xərcləyir, fermerlərə yardım edir.
Amma N.Zeynalov onu küncə sıxışdıraraq, fəaliyyətinə məhdudiyyət qoyur, gördüyü işlərə hasarlar yaradır. İcra başçısının Kərəm Həsənova yaxın adamlara müharibə elan etməsinin səbəbi bilinmir. Bu narazılığın onun əleyhinə işləyəcəyini hesablamır.
.jpg)
