Rəhman Qədirzadənin YÜKSƏLİŞ ARZUSU... - İLGİNC İDDİALAR...


Bir müddət əvvəl Şəki rayonun Baş Göynük kəndinə gedən körpünün dağılma təhlükəsi ilə üzbəüz qalması barədə araşdırma yazısı vermişdik. Burada əsas diqqət 2019-cu ildən tam qəzalı vəziyyətə düşən Şəki rayonun Baş Göynük kəndinə gedən körpünün dağılma təhlükəsinin aradan qaldırılması vurğulanmışdır. Çox təəssüflər olsun ki, 143 nəfər kənd sakinlərinin imzaladığı və yuxarı orqanlara problemin təcili həll edilməsi ilə bağlı müraciəti bu günədək aidiyyatı orqanlar tərəfindən qulaqardına vurulur. Məsələ tərəfimizdən kəskin olaraq yenidən qaldırıldıqdan sonar isə Azərbaycan Avtomobil Yolları Dövlət Agentliyinin 12 saylı Yol İstismar İdarəsi körpünün çuxurlar və çatlar əmələ gələn hissəsinin 2.5 kub m həcmdə asphalt material göndərməklə səpilməsini təşkil etmişdir. Kənardan baxdıqda körpü yolunun yamaqlı olsa da, kosmetik təmir edilməsi təsəvvürü yaranır. Amma reallıqda bu “maskirovka” əslində ləng partlayacaq minaya bənzətmək olar.

Qeyd edək ki, Şəki ilə müqayisədə ölkənin bütün regionlarında respublikanın yol infrastrukturu tamaimlə yeni, nisbətən göz oxşayan görkəm almasını vurğulamaq olar. Əsasən də turizm zonası hesab edilən Şamaxı, Qax, Zaqatala, Quba, Qusar, Xaçmazda da belədir, Lənkəran, Astara, Masallıda da, Balakəndə də. Respublikanın həmin və digər rayonlarındakı kəndlərarası və kənddaxili yollar adamın ruhunu oxşayır, qəlbə rahatlıq, zövq verir, xoş əhval duyursan. Ancaq Şəki şəhərdaxili yolları barədə (şəhərin özünə aparan magistral yoldan başqa) bunu demək mümkün deyil. Şəkinin özündə də, kəndlərarası və kəndlərdaxili yollar da çox az istisnalarla qətiyyən xoşagələn deyildir, narahatlıq, ikrah doğurur. Bəli, “Yol mədəniyyətdir” kəlamı yalnız Şəkidə keçərli deyil. Baxmayaraq ki, şəhərin yolları su və kanalizasiya xəttlərinin çəkilməsindən sonra əsaslı təmirlərə məruz qalmışdır.

Son vaxtlar bir-neçə foto-fraqmentdə Şəkinin özünün şəhərarası bəzi yollarının da yamaq-salxaq, çala-çuxur olduğunu gördükdə bir daha inanmalı olursan ki, Azərbaycan Avtomobil Yolları Dövlət Agentliyinin rəhbərliyi üçün qədim tarixə malik, Azərbaycanın tarixi mədədniyyətini az çox özündə bu günümüzədək saxlayan, turizmin əsas marşrut xəttinin üstündə yerləşən Şəki şəhəri yol infrastrukturu məsələləri onun “siyahısında” ya heç yoxdur, ya da ki ən son plandadır.

“Şin çayı” üzərindəki körpünün bir hissəsi. Fevral 2023-cü il çəkilmiş bu şəkil özlüyündə çox qaranlıq məsələlərin üstünə işıq sala bilər. Belə ki, körpü istismara 2005-ci ildə verilib. Amma şəkillərdən və videolardan da göründüyü kimi artıq dağılmaq üzrədir və hər an uça bilər. Məlum olduğu kimi Şin daşqınların tez-tez baş verdiyi bir çaydır. Xüsusən də yaz aylarında dağlardan gələn sel suları Şin çayının daşmasına, sakinlərin təsərrüfatına ziyan vurur. Belə olan halda sözügedən körpünün tikintisi zamanı nə üçün bu kimi təhlükələr nəzərə alınmayıb? Şəki rayonunun 6 böyük kəndinə yol aparan, 20 mindən çox sakinin istifadə etdiyi bu körpü niyə birtərəfli inşa olunub? Əldə etdiyimiz məlumatlara görə körpünün tikintintisinə heç də az pul ayrılmayıb. “Körpü-Bina-Tikinti” MMC-nin tikdiyi bu körpüyə ayrılan pulların böyük hissəsinin vaxtı ilə “Azəryolservis” ASC-nin sədri vəzifəsini tutmuş, hazırda isə Azərbaycan Respublikasının Rəqəmsal İnkişaf və Nəqliyyat nazirinin müavini olan Cavid Qurbanov və uzun müddət Baş nazirin müavini olmuş Abid Şərifov arasında bölüşdürülmüşdür.

Bəs görəsən digər rayonlardan fərqli olaraq tarixi Şəkinin yollarının, körpülərinin get-gedə yaxşılaşması əvəzinə, sürətlə yararsız vəziyyətə düşməsinin səbəbinin 12 saylı “Şəki Yol İstismar İdarəsi” Məhdud Məsuliyyətli Cəmiyyətinə bir ildir ki, rəhbər təyin edilən tarix müəllimi cənab Rəhman Qədirzadə bu yöndə nə kimi işlər görməyi planlaşdırır. Apardığımız araşdırmalar zamanı məlum oldu ki, Rəhman Qədirzadə 2009-cu ildə Əmək və Əhalinin Sosial Müdafiəsi Nazirliyi yanında Əlillərin Sosial Müdafiəsi Baş İdarəsinin Şəki, Oğuz və Qəbələ rayonlarında xidmət göstərdiyi 20 saylı zona şöbəsi müdiri olub. Onu yaxından tanıyanların sözlərinə görə burada əlilərə dövlət tərəfindən olunan yardımların çoxunu şəxsi məqsədləri üçün istifadə edib. Daha sonra Rəhman Qədirzadə 113 saylı Şəki şəhər seçki dairəsi dairə seçki komissiyasının sədri olub. Daha sonra Azərbaycan Respublikası Prezidentinin 2021-ci il 3 fevral tarixli Sərəncamı ilə Azərbaycan Respublikasının Rəqəmsal İnkişaf və Nəqliyyat nazirinin müavini təyin edilmiş Rəhman Hümmətovun vasitəçiliyi ilə Şəki şəhəri Nəqliyyat Departamentinə rəis təyin edilib. Bu təyinat qısa zaman içində Şəkidə narazılıqlara səbəb olub. Buna görə də Rəhman Hümmətov onu təcili Azərbaycan Avtomobil Yolları Dövlət Agentliyinin 12 saylı Yol İstismar İdarəsinin rəisi vəzifəsinə gətirib. Məlumatlara görə onlar həm qohum, həm də sinif yoldaşı olublar. Şəki sakinlərinin verdiyi məlumata görə artıq Rəhman Qədirzadənin AAYDA sədrinin müavini vəzifəsinə çəkilməsi gözlənilir. Yol infrastrukturundan xəbəri olmayan, ixtisasca tarix müəllimi olan bir şəxsin bu kimi vəzifələrin başına yüksəlməsi heç də təsadüf olmadığını göstərir. Yəni nazir müavini Rəhman Hümmətovun sağ əlinin daim sinif yoldaşı Rəhman Qədirzadənin çiynində olduğunu təsdiqləyir.

Dövrü mətbuatın yazdığına görə Rəhman Qədirzadə Oğuz şəhərinin ən perspektivli, qaynar yerində, mərkəzində – Heydər Əliyev prospektində ticarət mərkəzi inşa etdirmişdir. Keçmiş DSK sədrinin tikdirdiyi ticarət mərkəzi 2 mərtəbəlidir. Ticarət mərkəzinin ümumi sahəsi min kvadrat metrə yaxın, qiymətinin isə yarım milyon manat civarında olduğu deyilir.

Qeyd etdiyimiz kimi 2022-ci ildə Rəhman müəllim sinif yoldaşı və qohumu olan Rəqəmsal İnkişaf və Nəqliyyat nazirinin müavini Rəhman Hümmətovun AAYDA –nin İdarə heyətinin sədri Saleh Məmmədova birbaşa göstərişi nəticəsində Rəhman Qədirzadə 12 saylı “Şəki Yol İstismar” MMC-yə rəis təyin edilmişdir. Təbii ki, S.Məmmədov da birbaşa nəqliyyat sahəsinə kurasiyalıq edən nazir müavinin göstərişini müzakirə belə etmədən həyata keçirmişdir. Sonradan əldə etdiyimiz məlumatlardan aydın olur ki, Şəkinin yol və körpü dərdi təkcə Rəhman müəllimlik deyil. Buraya Saleh Məmmədova yaxın bir şəxs təyin edilmiş olsaydı, onda Şəkinin kəndarası yollarının təmir tikintisinə pullar ayrılardı. O pulların da müəyyən hissəsi yolların yamanmasına sərf olunar, qalanı isə AAYDA rəhbərliyinə qaytarılardı. Yaxud da inanmaq olmaz ki, yeni yolların salınması məqsədilə də təsdiq edilmiş layihələrə pul ayrılmasında AAYDA rəhbərliyi süründürməçiliyə yol versin və yaxud bürokratiyaya cürət etsin. Axı Rəhman müəllimin arxasında duran məmur onun sinif yoldaşı və qohumu olan Dursunun nazir müavini olan oğludur. Bəs o zaman nə baş verir ki, Rəhman Qədirzadə səlahiyyətindən qanuni formada istifadə edərək idarəsinin balansında olan yolların və körpülərin saxlanması və əsaslı təmirində maraqlı olmasın? Hələlik bu sirrin səbəbi bizlərə aydın olmasa da, orası bəllidir ki, hörmətli Rəhman müəllim sıradan elə də aciz bir dövlət məmuru, ya da qanundan qorxan bir vətəndaş deyildir. Amma hər nə olursa, olan qədim tarixə malik Şəkiyə və onun sakinlərinə olur.

Aktualinfo.org
Tarix: 29-03-2023, 13:13
Xəbəri paylaş



Xəbər lenti

Gündəm

Əyalət

Siyasət

Cəmiyyət

Hadisə

Şou biznes

Sosial

İdman