Ağcəbədidə fermer sahəsinə su verilmədiyi üçün idarə rəisini söydü - Həbs olundu

Azərbaycan Meliorasiya və Su Təsərrüfatı Açıq Səhmdar Cəmiyyəti Ağcabədi Suvarma Sistemləri İdarəsində rəis və müavinini söyən fermer həbs edilib. 

Qaynarinfo-nun məlumatına görə, 1981-ci il təvəllüdlü Ağcabədi rayonunun Qaravəlli kənd sakini Cəfər (şərti ad) əkin sahələri susuz qaldığı üçün məhsulu yararsız hala düşüb. Cəfər buna etiraz etmək üçün Ağcabədi Suvarma Sistemləri İdarəsinə gedib. Əkin sahəsinə su fasilələrlə və gec-gec verildiyi üçün öz etirazını idarənin rəisi və müavininə bildirib. 


Daha sonra fermer əsəbləşərək Suvarma Sistemləri İdarəsinin rəisi və müavininin ünvanına nalayiq ifadələr işlədib. O, şikayət əsasında saxlanılıb və barəsində İnzibati Xətalar Məcəlləsinin 510-cu maddəsi ilə protokol tərtib edilib. İş baxılması üçün məhkəməyə göndərilib. 

Məhkəmənin qərarı ilə fermer İnzibati Xətalar Məcəlləsinin 510-cu maddəsi ilə təqsirli bilinib və 5 gün müddətinə inzibati qaydada həbs edilib. Həbs müddəti 30 aprel 2024-cü il tarixdən hesablanıb. 

---

---