Son aylar Nizami rayonunun Qara Qarayev prospektində yerləşən obyektlərdə ard-arda yanğınlar baş verib. Yanğın hadisələri əsasən ticarət mərkəzlərində yaşanıb və səbəb kimi də naqillərdə olan qısaqapanma göstərilib.
Yaxın tarixə nəzər salsaq, öncə mart ayında baş verən “Diqlas yanğını”nı qeyd edə bilərik. Belə ki, iri ticarət mərkəzi olan “Diqlas”da baş verən yanğın nəticəsində onlarla sahibkara külli miqdarda ziyan dəydi. Həmçinin alovun ətrafdakı obyektlərə, piştaxtalara keçməsi nəticəsində ticarət mərkəzinə yaxın yerləşən bütün obyektlər külə döndü. Rəsmi açıqlamalara görə binanın yanğından tam şəkildə mühafizə olunan sahəsi isə 275 kvadratmetr təşkil edib. Belə ki, yanğından tam qorunan 175 kvadratmetrlik sahə binanın sağ yan hissəsinə, 100 kvadrat metrlik sahə isə binanın ön hissəsində yerləşən mağazalara aid olub. Binanın ümumi sahəsi 17 559 kvadratmetr olub. Lakin qərar verildi ki, “Diqlas” ticarət mərkəzinin yanğından zərər görmüş binası tamamilə sökülsün. Hazırda da söküntü prosesi davam etdirilir.
Bunun ardınca iyun ayında Qara Qarayev prospektində yerləşən “X-lady” qadın geyimləri mağazasında yanğın baş verdi. Bu yanğın nəticəsində də mağaza sahibinə xeyli ziyan dəydi. Fövqəladə Hallar Nazirliyinin əməkdaşlarının səyləri nəticəsində yanğın ətrafdakı mağazalara keçmədi. Bildirildi ki,yanğına səbəb mağazada olan və normadan artıq işlədilən printer olub. Ərazidə jurnalistlərə açıqlama verən Bakı şəhər icra başçısı Eldar Əzizov isə aşağıdakıları bildirdi:
“Bu cür hadisələr demək olar dünyanın bütün ölkələrində baş verir. Heç bir ölkə belə hadisələrdən sığortalanmayıb. Nizami rayonunun paytaxtın digər rayonlarından fərqi burada ticarət obyektləri baxımından sıxlığın yüksək olmasıdır. Ona görə də gələcəkdə belə hadisələrdən sığortalanmaq üçün lazımi işlər görülür. Yanğının başvermə səbəbləri obyektiv qaydada araşdırılacaq...”
Araşdırma prosesinin getdiyi dönəmdə bu ilin iyul ayında yenə də Qara Qarayev prospektində yerləşən “Ağ Çiçəyim” gül mağazasında yanğın baş verdi. Yanğın nəticəsində mağazaya xeyli ziyan dəydi. Bildirdildi ki, yanğının baş vermə səbəbi, gecədən işlək vəziyyətdə buraxılan kondisioner olub. Baş verən qısaqapanma nəticəsində mağazada alışma yaranıb və yanğın genişlənib. Yenə də Fövqəladə Hallar Nazirliyinin əməkdaşları tərəfindən yanğın lokallaşdırıldı və ətraf ərazilərə keçməsinin qarşısı alındı.
Bəs Qara Qarayev prospekti niyə yanır? Yanğınlardan sonra hansı işlər aparılır?
“Yeni Müsavat”ın əməkdaşı olaraq hələ “Diqlas” ticarət mərkəzində baş verən yanğından sonra prospekt boyunca bir neçə mağazada olmuşduq. Həmin zaman da müşahidə etdmişdik ki, obyektlərin əksəriyyətində yanğın təhlükəsizliyi qaydalarına əməl edilməyib. Yanğın çıxışlarını göstərən işarələr qoyulmayıb, avtomatik işə düşən siqnalizasiyalar, su xətləri quraşdırılmayıb, obyektlərin qarşısında yanğın şitləri, qolları yaradılmayıb.
Bununla yanaşı mütəxəssislər bildirirlər ki, mağazaların və bu kimi obyektlərin əksəriyyətində naqillərin “n” kəsiyinə diqqət edilmir. Nazik kabellər normadan artıq yüklənir, qığılcım yarana biləcək hissələr yanar konstruksiyalara birləşdirilir, yanğın təhlükəsizliyinə biganə yanaşılır. Mütəxəssislərə görə bunun nəticəsidir ki, yay aylarında xüsusilə də sübh çağında evlərdə, obyektlərdə yanğınlar baş verir. Səbəb isə gecədən yüklü qalan naqillərin isinməsi, əriməsi və yanğına səbəb olmasıdır.
Yeri gəlmişkən onu da qeyd edək ki, Qara Qarayev prospektində ard-arda yanan yuxarıda qeyd etdiyimiz obyektlərin hamısı, sübh çağında alışıb...
Nizami Rayon İcra Hakimiyyətinin icra başçısının müavini Qərib Məmmədov “Yeni Müsavat”a bildirib ki, müvafiq qurumlar tərəfindən işlər aparılır, tapşırıqlar verilir:
“Yanğınların çoxu qısaqapanmadan baş verir. Yanğından sonra Dövlət Yanğından Mühafizə Xidmətinin əməkdaşları baxış keçirib, yanğının yaranma səbəbi ilə bağlı rəy verirlər. Fövqəladə Hallar Nazirliyinin Dövlət Yanğından Mühafizə Xidmətinin özünün xüsusi əməkdaşları var ki, onlar obyektlərə baxış keçirib, tapşırıqlar verirlər. Bundan əlavə Nizami Rayon İcra Hakimiyyəti tərəfindən də məsələ ilə bağlı göstərişlər olub. Biz rayon elektrik şəbəkəsinə göstəriş vermişik ki, monitorinqlər həyata keçirsinlər. İnsanların cəm toplaşdığı yerlərdə, xətlərdə, şitlərdə yoxlama aparsınlar. Onlar bu işlə məşğuldurlar. Ümumiyyətlə, həmin qurumlar mütəmadi şəkildə bu cür yoxlamaları aparırlar. Hadisədir, baş verəndə verir. Dediyim kimi, biz üzərimizə düşən öhdəliklərin yerinə yetirilməsi üçün lazımı qaydada çalışırıq. Obyekt sahibləri də gərək diqqətli olub, elektriklə, qazla davranışlarında qaydalara əməl etsinlər”.
