Sumqayıt səhiyyəsində “Ərəbzəngi” peyda olub- İLGİNC FAKTLAR

Hal-hazırda Sumqayıt Şəhər Səhiyyə Şöbəsində və bu şöbənin tabeliyində fəaliyyət göstərən səhiyyə müəssisələrində baş alıb gedən biabırçılıqların, özbaşınalıqların, həddi-hüdudu bilinməyən anarxiyanın, süründürməçiliklərin varlığı Azərbaycan media qurumlarının, sosial şəbəkə istifadəçilərinin, geniş xalq kütləsinin, aktiv zümrənin və s. əsas müzakirə etdiyi mövzulardan biridir desək, heç də yanılmarıq. 
Sumqayıt səhiyyəsinin bu qədər “dilə-dişə düşməsi”nin əsas səbəbi, bəlkə də bu şəhərin paytaxt Bakıdan az da olsa aralı məsafədə yerləşməsidir. Amma, media üzərindən apardığımız araşdırmalardan, ümumi müşahidələrimizdən, bəzi şəhər sakinlərinin söz-söhbətlərindən  aydın olur ki, Sumqayıt səhiyyəsinin daha çox “dərdə düşməsinə” səbəb, bu şöbəyə rəhbərlik edən Səkinə xanım Sadıqovanın ruhi xəstə olması, normal tibbi təhsilə malik olmaması, idarəçilik işlərini bacara bilməməsi, kadr təyinatlarında ciddi səhvlərə yol verməsi, qohumbazlıq, dosbazlıq amilini daha çox öndə tutması, şəxsi maraqlarının həlli naminə istənilən qanunsuzluqlara qol qoyması və s. kimi halların varlığıdır. Belə bir səbəblərdəndir ki, bu gün Sumqayıt Şəhər Səhiyyə Şöbəsində çoxsaylı problemlər yaşanır, hər cür özbaşınalığa, haqsızlığa, soyğunçuluğa qol qoyulur. Adicə bir faktı qeyd edək ki, şöbə müdiri Səkinə Sadıqovanın normal tibbi təhsilə malik olmayan bacısı Sədaqət həkim, bu gün Sumqayıt səhiyyəsində əməlli-başlıca “at oynadır”. Söylənilənlərə görə ona bu qədər “volya”nı bacısı Səkinə Sadıqova verib. Şöbə müdirinə isə “volya”nın Nazirlər Kabineti yanında İcbari Tibbi Sığorta üzrə Dövlət Agentliyində vəzifə sahibi olan Rəşad müəllim tərəfindən verildiyi bildirilir. Amma, onu da qeyd etmək yerinə düşər ki, əgər Rəşad müəllim Səkinə Sadıqovaya himayədarlıq edirsə, onu da bilmək lazımdır ki, narazı sakinlərə himayədarlığı isə, onların vətəndaşı olduqları dövlət edir. O halda sual oluna bilər ki, bu Rəşad müəllim nə dərəcədə təsir imkanına, hansı gücə malikdir ki, hal-hazırda Sumqayıt səhiyyəsini “tarmar edən” Səkinə Sadıqovanın qol qoyduğu qanunsuzluqlara göz yumulur?. Faktdır ki, bu dövlət səhiyyə müəssisəsində ədalətli yoxlamalar aparılarsa, o halda şöbə müdirinin həbsi yüz faiz qaçılmaz olacaq.
    Düşündürücü hal odur ki, Sumqayıt səhiyyəsinə rəhbərlik edən xanım şöbə müdiri orda-burda danışır ki, mənə Allah-Təala tərəfindən vergi verilib. O halda ortaya belə bir sual çıxır ki, əgər ona vergi verilibsə, niyə və hansı səbəbə görə Səkinə Sadıqova təcili-tibbi yardım maşınlarının yanacağını, ehtiyat hissələrini və s. satıb “həzmi-rabedən” keçirir?  Belə bir səbəbdən də, canüstə olan xəstələri vaxtında səhiyyə müəssisələrinə çatdırmaq olmur? Bəzi şəxslər arasında dolaşan söz-söhbətlərə görə xanım şöbə müdiri ruhi xəstədir və Səkinə Sadıqovanın şöbə müdiri vəzifəsinə təyinatı, məhz qol qoyulan cinayət əməllərindən biridir. Sual oluna bilər ki, bu gün ölkəmizin ən böyük şəhərlərindən birinin səhiyyə şöbəsinə rəhbərlik edən Səkinə Sadıqovanın əməlləri ilə bağlı, görəsən cənab səhiyyə naziri Teymur Musayev heç düşünürmü?
    Digər tərəfdən, səbəb nədir ki, Hesablama Palatası bir dəfə də olsun belə, Səkinə Sadıqovanın külli miqdarda dövlət vəsaitlərini hara xərclənməsi haqda ondan hesabat tələb etmir? Faktdır ki, bu gün Şəhər Səhiyyə Şöbəsinin müdiri özünün düşüncə tərzinə uyğun olan şəxsləri ətrafına yığmış və o, həmin şəxslərin vasitəsilə dövlətin ayırdığı vəsaitləri talan etməklə məşğul olur. Məsələn, xanım şöbə müdiri Oqtay adlı şəxsi özünə hüquqi məsələlər üzrə müavin təyin edib. Oqtayın əmisi qızı isə, rəfiqəsi Qızılgülü şöbədə vəzifəyə təyin etdirib. Hal-hazırda Səkinə Sadıqovanın rəfiqələrindən biri, hansı ki, Sumqayıt şəhərində adı rüşvət qalmaqallarında hallanan Sevinc xanım, Səhiyyə Şöbəsinin kadrlar şöbəsində müavin vəzifəsini daşıyır. Faciə odur ki, Səkinə Sadıqova tibb bacısı ixtisasına sahib olan qızına ilk əvvəl Odlar Yurdu Universitetində təhsil verdirir və daha sonra onu M.A.Qasımov adına Respublika Klinik Xəstəxanasında həkim vəzifəsinə təyin etdirir. Bundan başqa, Səkinə Sadıqovanın bacısı Sədaqət Əfəndi, demək olar ki, bu gün Sumqayıt şəhərindəki bütün xəstəxanaları idarə edir. Bəli, normal tibbi təhsili olmayan, əvvəllər isə Vərəm Dispanserində işləyən Sədaqət həkim, hal-hazırda Sumqayıtdakı 3 saylı Poliklinikada həkim vəzifəsində çalışır. Buna baxmayaraq o, şəhər səhiyyəsini əməlli-başlıca “barmağına dolayır”. Bu gün şöbə müdiri Səkinə Sadıqova həddini o qədər aşıb ki, onun “müntəzir əmrləri”ni yerinə yetirmək istəməyən baş həkimlər işdən çıxarılır, bəzən isə onların rəhbərlik etdikləri xəstəxanaları şöbələrə çevirir. Hansı ki, belə bir səlahiyyət yalnız Səhiyyə Nazirinə aid olsa da, Səkinə Sadıqova qanunun tələbinə əhəmiyyət vermir və istədiyi vaxt belə bir addımını atır. Bir kimsə də ona “qaşın üstə qara var” demir.
    Bu xanım Səhiyyə Şöbəsinə müdir təyin olunduqdan sonra, dövlətin ayırdığı büdcə vəsaitləri hesabına özü üçün bahalı maşınlar, neçə-neçə mənzillər alır, həddi-hüdudu bilinməyən ölçüdə var-dövlətə sahib olur. Hətta, onun son vaxtlar yeni inşa olunmuş hündür mərtəbəli binalardan yeni mənzillər aldığı da söylənilir. Hələ bunlar harasıdır? Kimsə Səkinə Sadıqovanın qol qoyduğu çoxsaylı qanunsuzluqları tam dəqiqliyi ilə eşidərsə, yəqin ki, o halda həmin şəxs şoka deyil, birbaşa “şökə” düşməli olacaq. Sual oluna bilər ki, görəsən şöbə müdiri vəzifəsini daşıyan bu xanım daha hansı vəzifə sahiblərinə güvənir ki, o, arxayınlıqla belə bir əməlləri törədir?
   Hal-hazırda Sumqayıt Şəhər Səhiyyə Şöbəsində baş verənləri, çoxsaylı narazılıqları əsas tutaraq belə bir qənaətə gəlmək olar ki, hal-hazırda Sumqayıt səhiyyəsində rüşvətxorluğa, korrupsiyaya, hər cür əyintilərə və s. qarşı həyata keçirilən ciddi mübarizə tədbirləri sıfır həddindədir. Belə bir səbəbdən də, şəhərin bütün səhiyyə müəssisələrində “bezpredel” ab-hava hökm sürür. Deməli, şəhərin səhiyyə ocaqlarında əmələ gələn bu cür ab-havanı aradan qaldırmaq üçün “qara maskalılar”ın şəhərin Səhiyyə Şöbəsinə baş çəkmələrinə zərurət yaranıb. Yoxsa, ... Yazıda adı çəkilən hər kəsin mövqeyini dinləyə bilərik.
 Problemlərin varlığını diqqətdə saxlayıb, yenidən mövzuya qayıdacağıq.
xeberfakt.az

---

---