“BU QURUMLAR DA LƏĞV EDİLMƏLİDİR” – 7 nazirliyin ləğvi təklif edilir

Azərbaycanda 12 nazirlik saxlanılmalı, bundan sonra 7 nazirlik də ləğv edilməlidir. “AzPolitika.info” xəbər verir ki, bunu Azərbaycan Demokratiya və Rifah (ADR) Hərəkatının sədri Qubad İbadoğlu yazıb: “Xəbər verildiyi kimi Nəqliyyat nazirliyi ləğv edilib və yeni Nəqliyyat, rabitə və yüksək texnologiyalar nazirliyi yaradılıb. Bu çoxdan gözlənilən qərar siyasi hakimiyyətdaxili proseslərin nəticə olsa da, gec verilsə də iqtisadiyyatın idarəedilməsi strukturunun təkmilləşdirilməsi istiqamətində müsbət addım kimi dəyərləndirilə bilər. Onsuz da Nəqliyat Nazirliyinin tənzimləyici səlahiyyətlərinin çoxu ondan alınmış və müxtəlif strukturlar arasında bölüşdürülmüdür. Əslində Azərbaycan kimi kiçik nəqliyyat şəbəkələrinə malik olan ölkədə ayrı-ayrı sahələr üzrə dövlət şirkətlərinin müstəqil fəaliyyət göstərdiyi halda belə bir nazirliyə ehtiyac da yox idi. Bu nazirlik tənzimləyici və kommersiya xarakterli fəaliyyətləri həyata keçirməklə büdcəyə əlavə yük idi. Onun mərkəzi aparatının saxlanılması və əmək haqqı xərcləri ayrılan büdcənin 80 faizindən çoxunu təşkil edirdi.

Məlumat üçün qeyd edim ki, 2017-ci il üçün Nəqliyyat Nazirliyinə 2,62 milyon manat vəsait ayrılması nəzərdə tutulurdu. Belə olan halda bu istiqamətdə qərarların büdcə ili başlamamış və nazirliklərin büdcəsi bölüşdürülməmiş verilməsi daha məqsəduyğun olardı. Hesab edirəm ki, iqtisadiyyatın idarəedilməsi strukturunun təkmilləşdirilməsi islahatları davam etməlidir. Belə ki, bu günə qədər Azərbaycan Respublikası Nazirlər Kabinetinin sturkturuna 19 nazirlik, 9 dövlət komitəsi, 2 dövlət adminstrasiyası, 4 dövlət xidməti və 1 dövlət fondu daxildir və onların hamısı dövlət büdcəsindən maliyyələşdirilir. Beləliklə də Kabinetin tərkibində müxtəlif adlarla yer alan mərkəzi icra strukturlarının sayı 35-ə çatır. Müqayisələr göstərir ki, Azərbaycanda dövlət nazirliklərinin sayı hətta Avropa ölkələri ilə müqayisədə belə çoxdur. Məsələn, dövlət nazirliklərinin sayı İtalıyada 14, Almaniyada və Belçıkada 11, İspaniyada 9-dur. ABŞ-da da nazirlik səviyyəsində olan 11 federal hökümət qurumu fəaliyyət göstərir.

Həqiqətən də Azərbaycanda 19 nazirliyin olması dövlət idarəetmə xərclərinin optimallaşdırılmasının və idarəetmədə struktur islahatlarının aparılmasının potensialının yüksək olmasının göstərəcidir. Əslində Azərbaycan Nazirlər Kabineti Rusiya Federal höküməti təkrarladığından ölkədə şişman dövlət idarəetmə aparatı yaranıb. Fikrimizcə, bu istiqamətdə aparılmalı olan islahatların 1-ci mərhələsində Azərbaycanda 12 nazirliyin saxlanılması optimal hesab oluna bilər. Bunlar hansılar ola bilərlər.

1) Müdafiə 2) Daxili İşlər 3) Ədliyyə 4) Xarici İşlər 5) Maliyyə 6) İqtisadiyyat 7) Kənd təsərrüfatı və ərzaq 8) Səhiyyə, Təhsil və Rifah 9) Sənaye, Elm və Texnologiyalar 10) Nəqliyyat və Rabitə 11) Vergi və rüsumların tənzimlənməsi 12) Əmək Nazirliyi.

Hesab edirəm ki, bu il martın əvvəlində hökümət parlamentdə hesabat verdiyi zaman bu məsələlər üzrə də ciddi müzakirələr aparılmalıdır.

********

“Nəqliyyat Nazirliyinin ləğv edilərək məhz Rabitə və Yüksək Texnologiyalar Nazirliyinə birləşdirilməsi beynəlxalq praktikaya uyğun atılan addımdır”.



“AzPolitika.info” xəbər verir ki, bu sözləri iqtisadçı Vüqar Bayramov yeni Nəqliyyat, Rabitə və Yüksək Texnologiyalar Nazirliyinin yaradılmasını şərh edərək sosial şəbəkədə yazıb. O, qeyd edib ki, bu adddımdan sonra Azərbaycanda struktur islahatların davam etdirilməsi çox vacibdir: “Finlandiya, Avstriya, Norveç, Almaniya (Nəqliyyat və Digital İnfrastruktur formasında), Bolqarıstan, Masidoniya, Kipr, Türkiyə, Andorra, Çili, Peru, İsveçrə (federal department formasında), Latviya, Bosniya və Herseqovina, Qətər, Oman, Myanmar və bir sıra ölkələrdə nazirliklər bu və ya oxşar adlar ilə fəaliyyət göstərirlər. Bu adddımdan sonra Azərbaycanda struktur islahatların davam etdirilməsi çox vacibdir. Stuktur islahatları çevik idarəetmə, xərclərə qənaət və xeyli dərəcədə şəffaf menecment deməkdir”.

Vüqar Bayramov İqtisadi və Sosial İnkişaf Mərkəzinin (CESD) ləğv olunmalı və birləşdirilmə olan qurumlarla bağlı təkliflərini də açıqlayıb: “”Azərsu”, Meliorasiya və Su Təsərrüfatı səhmdar cəmiyyətlərinin ləğv edilməsi, onların bazasında Dövlət Su Agentliyinin yaradılmasını, Dövlət Gömrük Komitəsinin ləğv edilməsi və ayrıca idarə kimi Vergilər Nazirliyinin tərkibində fəaliyyət göstərməsini, İqtisadiyyat və Sənaye Nazirliyinin tərkibindəki Antiinhisar Departamentinin nazirlikdən ayrılması, onun bazasında Rəqabətin Müdafiəsi Agentliyinin yaradılmasını, Energetika Nazirliyinin ləğv edilməsi və funksiyalarının bir qisminin Neft Şirkətinə, digər qismininsə İqtisadiyyat və Sənaye Nazirliyinə verilməsini (bu nazirliyin bazasında Yanacaq Energetika Departamentinin yaradılması) və digər islahatların aparılmasını təklif edirik”.

Qeyd edək ki, Prezident İlham Əliyev Nəqliyyat, Rabitə və Yüksək Texnologiyalar Nazirliyinin yaradılması haqqında sərəncam imzalayıb.

Sərəncama uyğun olaraq Ramin Namiq oğlu Quluzadə Azərbaycan Respublikasının nəqliyyat, rabitə və yüksək texnologiyalar naziri təyin edilib.

---

---