Zahid Oruc “MTN işi” ilə bağlı məsələ qaldırdı: Spiker irad bildirdi

"Cinayət yolu ilə əldə edilmiş pul vəsaitlərinin və ya digər əmlakın leqallaşdırılmasına və terrorçuluğun maliyyələşdirilməsinə qarşı mübarizə haqqında" qanunda çox gözəl maddə var

9.1.4-cü maddədə göstərilib ki, monitorinq iştirakçılarının xarici dövlətlərin siyasi xadimləri ilə davam edən işgüzar münasibətləri daimi olaraq nəzarətdə saxlanılmalıdır. Bu çox düzgün bir maddədir. Bu günkü reallıq bundan ibarətdir ki, Azərbaycan bu öhdəlikləri, sənədləri tam ratifikasiya etməmiş də onlara əməl edirdi. Amma beynəlxalq qurumlar bunu edirmi?”

Bunu Milli Məclisin iclasında deputat Zahid Oruc deyib.

O bildirib ki, “MTN işi” çərçivəsində baş verən cinayətləri istintaq və məhkəmə materiallarından izləmək mümkündür.

“Bəlli olur ki, o vəsaitləri Avropa ölkələrində leqallaşdırıblar. Orada da vicdanlı alıcı və vicdanlı satıcını tapmırlar. Sadə bir şəkildə hansısa əmlaka qoyurlar.
Belə çıxır ki, bu adamlar çirkli vəsaitin bir hissəsini qoyurlar, digər hissəsini isə sanki qanuniləşdirirlər. Azərbaycan dövləti isə bu proseslərin qarşısını almasına baxmayaraq, o vəsaitləri və şəxsləri qanun qarşısında hesabat verməyə gətirə bilmir. O vəsaitlər iqtisadiyyata qoyulur, ölkənin həyatında rol oynayır deyə hətta bir sıra hallarda həmin şəxslər Avropa ölkələrində vətəndaşlıq qazanırlar. Özlərinin hüquqi müdafiəsini çox sistemli şəkildə qurmaq üçün çox bahalı vəkillər tuturlar.

Burada yazılıb ki, elan olunmalıdır. Amma biz o şəxslərin adını haradan oxuyaq? İndiyə qədər o şəxslərin adı harada verilib? Elə fakt varmı ki, onlar qeyri-leqal yolla əldə olunan vəsaiti gedib Avropa ölkələrində istifadə ediblər və həmin ölkədən həmin şəxsləri tutub təhvil veriblər. Elə fakt varmı? Mən buna rast gəlməmişəm”.

Milli Məclisin sədri Oqtay Əsədov isə Z.Oruca irad tutub.

“Sən dediyin başqa şeydir, gündəlikdə olan başqa. Sən dediyin məsələ üçün İnterpol var. Onlar işləyirlər. Bunlar tamam başqa-başqa şeylərdir. Biz beynəlxalq qurumlara hansı şübhələri etməliyik? Bu qərarları bütün dünya qəbul edib”. (Modern.az)

---

---