“İctimai rəyi məhz internet mediası formalaşdırır” - Əflatun Amaşovdan saytlara dəstək

“Təxminən 10 il əvvəl internet medianın rolu və perspektivi barədə tam qənaətə gəlmək, yekun fikir bildirmək bəlkə də mümkünsüz idi. Ancaq indi qətiyyətlə söyləmək olar ki, dünyada ictimai rəy məhz internet üzərindən yayımlanan media resursları vasitəsilə formalaşır. Azərbaycanda da durum eynidir. Yəni ölkəmiz də təbii prosesdən, həm onun müsbət, həm də mənfi tərəflərindən uzaq deyil”. Bu sözləri Milli Məclisin deputatı, Mətbuat Şurasının sədri Əflatun Amaşov Modern.az-a açıqlamasında deyib.

Mətbuat Şurasının sədri bildirib ki, internet medianın müsbət tərəfləri barədə yetərincə söhbət açılıb:“ İlk növbədə informasiyalı vətəndaş cəmiyyət quruculuğunu qeyd etmək mümkündür. Bəli, internet media daha ələçatımlıdır. Bu cəhət imkan verir ki, hər bir şəxsin orada yayımlanmış materiallara görə vətəndaş mövqeyi yaransın və güclənsin. Ancaq vətəndaş mövqeyi, baxışı düzgün formalaşırmı, yaxud formalaşa bilirmi? Məncə, əsas sual bundan ibarətdir və bu sual ətrafındakı müzakirələr istər-istəməz internet media ilə bağlı mənfi təmayülləri də aktuallaşdırmaqdadır. İnternet medianın müsbət tərəfləri barədə söz açdığımız kimi, mənfi cəhətləri ilə bağlı da fikirlərimizi bildiririk. Özü də daha çox. Elə indi də bu mənada bir çox məqamlardan söz aça bilərik. Mən sadəcə onlardan birini qeyd edəcəm – müstəqillik. Bəli, biz ilk növbədə çalışmalıyıq ki, internet media tam müstəqil olsun, ayrı-ayrı şəxslərin, bir-birinə qarşı çıxan qütblərin mübarizə vasitəsinə çevrilməsin, hansısa məqsədli xarici maliyyə mənbələrinə üz tutmasın. Bunun ən optimal yolu isə dövlət dəstəyidir”.

Deputat deyib ki, jurnalist ictimaiyyəti internet medianın dövlət dəstəyindən faydalanmasının zəruriliyinə dair çoxsaylı müzakirələr aparıb və aparmaqdadır:“Mənim Milli Məclisin deputatı kimi parlamentdə də bununla əlaqədar çıxışlarım olub. Düşünürəm ki, məsələyə yenidən qayıtmağa ehtiyac var. Bir daha bildirirəm ki, internet medianın dövlət dəstəyindən faydalanması yalnız onlara maliyyə vəsaitinin ayrılması demək deyil. Bu, eyni zamanda internet medianın cəmiyyətimiz üçün prioritet olan istiqamətlərə yönləndirilməsidir. Cəmiyyətin düzgün formalaşması təbii ki dövlətimizin də maraqlarından irəli gələn prosesdir”.

Cebhe.info

---

---