Dünyaya üç cümləlik şahanə Türk mesajı!

Elməddin Behbud

Qardaş Türkiyə Cümhuriyyəti Suriyada vətəndaş müharibəsi başlayar-başlamaz demək olar ki, bütün regional və qlobal geosiyasi aktorların onun əleyhinə istifadə etdikləri "kürd kartı"na hazırda "Fırat qalxanı" əməliyyatından sonra növbəti və daha mühüm zərbəni vurmaqdadır. Türk ordusunun bu əməliyyatı uğurla başa vuraraq güney sərhədlərinin etibarlı mühafizəsinin təmin etməklə ölkəsinin təhlükəsizliyini gücləndirməsi təbii haqqıdır.

"Zeytun budağı" adlı verilən Afrindəki antiterror əməliyyatını bütün tərəfləri ilə geniş analiz etmək, onu zəruri edən şərtləri ətraflı təhlil etmək mümkündür. Ancaq mənim məqsədim bu deyil.

Bu gün Türkiyə mediasında məlum əməliyyata yola düşən xüsusi təyinatlı hərbiçilərdən birinin üç cümləlik açıqlaması yayıldı. Sadəcə 3 qısa cümlə... Ancaq köksümü qabardan, oxuyandan sonra "bunu yalnız bir türk əsgəri belə dəqiq və məğrurluqla deyə bilərdi" qənaətini qüvvətləndirən 3 verbal mesaj!

Dostlar, bu 3 cümləlik cavab nəinki bir zabitin zirehli texnikanın üzərində, hazırlıqsız şəkildə ona verilən sualı cavablandırarkən bildirəcəyi ən qüvvətli fikirdir, mübaliğəsiz şəkildə deyə bilərəm ki, dünyanın güclü siyasi xadimlərinin, ən peşəkar PR menecerlərinin xüsusi həssaslıqla ölçülüb biçilmiş çox korrekt və hədəfi dəqiq nişan alan və situasiyanı mükəmməl izah edən nitqinə bərabərdir.

Beləliklə mehmetçik jurnalistin 3 sualını cavablandırıb:

I) "İstiqamət haradır?" Cavab: Qızıl alma!

Türk mifologiyasında "qızıl alma" türk milləti, xüsusi ilə də Oğuz Türkləri üçün ona doğru getdikcə uzaqlaşan və səni daha böyük hədəflərə çatmağa çağıran, cazibəsi heç zaman əskilməyən qutsal ideyanı simvolizə edən bir ifadədir. Daha konkret ifadə etsək, dünya dediyimiz bu planetdə yaşayan türkləri vahid çatı altında birləşdirərək, böyük bir imperatorluq qurmağı hədəfləyən, Turan sözünə sinonim sayılan bir simgədir. Zabit bu lakonik cavabı ilə bəlkə də xüsusi məqsəd güdmədən böyük və şanlı tarixə malik millətin mənsubu olduğunu bir daha dünyaya bəyan etdi və Türkiyənin əməliyyatın rəsmi elan edilən coğrafi hüdudlarından daha uzaq məsafəli hədəflərinin olduğunu bildirdi. Düşmənlərə başlanğıcdaca necə deyərlər "göz dağı" verdi!

II) "Ailənə sözün nədir?" Cavab: Gözləməsinlər!

Türk ordusunun müzəffərliyi, rəşadəti, vətəni, milli maraqları şərtsiz və ən çətin şərtlər altında mətinlik və əlahiddə qəhrəmanlıqla müdafiə etdiyinə dair tarixdə onlarla nümunə var. Göytürk şahzadəsi, Şərqi Göytürk xaqanı Şibi xaqanın oğlu Kürşad 639-cu ildə 39 silahdaşı ilə Çin imperatorunun sarayına daxil olub yüzlərlə düşmən əsgərini məhv edərək misilsiz qəhrəmanlıq göstərir. Bu hadisə bütün Çini titrədir və Göytürklər yenidən müstəqilliklərinə qovuşurlar. Belə misalların sayını xeyli artırmaq mümkündür. Müasiri olduğumuz Mübariz İbrahimovun qəhrəmanlığı da belə nümunələrdəndir. İndi isə Anadolu torpaqlarındakı bir mehmetcik adlıq cümləlik cavabıyla dillərdə əzbər olan Kürşadın şücaətindən 1500 il sonra ölümə, savaşa meydan oxuyaraq qarşılarına qoyulan məqsədə çatmaq üçün geriyə baxmadan son nəfəsinədək mücadiləyə başladıqlarını vurğulamış olur.

III) "Türkiyəyə bir mesaj göndərin". Cavab: Bu vətəni kimsə bölə bilməz!!!

Heç kimə sirr deyil ki, 1923-cü ildə Osmanlının külləri üzərində dünyaya yenidən meydan oxuyan, sələfindən daha müstəqil, dünyəvi, çağdaş tələblərlə ayaqlaşan və yalnız Anadolu insanının deyil, bütövlükdə bütün Türk-İslam coğrafiyasının avanqard qüvvəsinə çevrilən bir dövlətin - Türkiyənin qurulması o zamanın şərtləri ilə bir möcüzə idi. Bəli, möcüzə. İngilis sərkərdəsi Vinston Çörçilin dediyi "Çanaqqalada zəfər qazanmaq üçün əsgəri, maliyyə, hərbi təchizatı və digər zəruri olan hər şeyi nəzərə almışdıq, biz çox üstün idik. Mütləq qalib gələcəkdik. Yalnız bir məsələni hesaba qatmamışdıq... Mustafa Kamalı" fikri bunun ən bariz sübutlarından biridir.

O tarixdən ötən 95 il ərzində Türkiyə tarixi nəhəng gesosiyasi güclərin ən cazibədar maraq mərkəzi, kəskin siyasi, iqtisadi və hərbi mübarizə poliqonlarından biri kimi çoxsaylı sınaqlardan keçib. 2011-ci ildən üzü bəri Türkiyə yenidən hərəsi azından bir onilliyə yetəcək qədər olan, ssenari və rejissor işinə xarici antitürk dairələrinin müəlliflik etdiyi nəhəng siyasi çalxalanmalarla müşahidə olunan hadisələrə şahidlik edir. Atılan bütün addımlar xüsusi dəqiqliklə ölçülüb-biçilməsə də və xətalardan (erməni açılımı, "demokratik açılım", Suriya böhranına münasibət və s.) yan keçməsə də, Türkiyə dövləti irili, kiçikli bütün təxribatların öhdəsindən böyük mətinliklə gəlib. Bu, bir tərəfdən Türkiyə dövlətini idarə edən siyasi hakimiyyətin qətiyyəti, dünyanı idarə edən xarici düşmənlərin qarşısında dik duruşu, onların diktəsinə boyun əyməməsi, çoxsaylı daxili xəyanətkarlara (bir dövlətin parlamentində onu keçmişdə və hazırda soyqırım törətməkdə suçlayan, böhtançı mövqe tutan, minlərlə mülki vətəndaşın və dövlət rəsmilərinin öldürülməsinə, terrora haqq qazandıran bir fraksiyanın olmasının nə demək olduğunu güman edirəm dərk etməyən yoxdur) qarşı göz qırpmaması sayəsində, digər yandan alt qruplardakı etnik mənsubiyyətindən asılı olmayaraq yüksək dərəcədə milli şüura, həssaslığa və identikliyə sahib olan Türk millətinin vətən mövzusu ətrafında vahid güc kimi birləşməsi nəticəsində mümkün oldu.

1984-cü ildə Eruhda başlanan terror hadisəsilə yarandığını bəyan edən KFP-yə (PKK) verilən böyük ölçüdə siyasi, ideoloji, maliyyə dəstəyinin fonunda 33,5 il sonra nəinki Türkiyənin ərazi bütövlüyünü bölmək, parçalamaq mümkün olmadı, onlara çirkin hədəflərinə çatmağa imkan verilmədi, əksinə müxtəlif istiqamətlər üzrə atılan addımlar bu terror təşkilatına rəğbət bəsləyənlərin azalmasına gətirib çıxardı. Bu konteksdən baxanda Türkiyə prezidenti R.T. Ərdoğanın illərdən bəri müxtəlif yerli və beynəlxalq auditoriyalarda açıq mətnlə bəyan etdiyi qardaşlıq, bir millət, bir dövlət, bir bayraq, bir vətən şüarlarına bir daha rəsmi dövlət strukturlarının, o cümlədən Cümhuriyyətin ana qoruyucularından olan, hər fürsətdəcə yıpradılmağa çalışılan ordunun, həmçinin Türkiyə cəmiyyətinin onurğasını təşkil edən bütün sosial, mədəni, siyasi qüvvələrin sahibləndiyini göstərir. Bəli, böyük Mehmet Akif Ərsoyun misralarında ifadə edildiyi kimi "Sahibsiz olan bir vətənin batması haqdır, sən sahib çıxarsan, bu vətən batmayacaqdır".

Nə qətiyyətlə müstəqil siyasətini qoruyub saxlayan, dövlət maraqlarını birmənalı şəkildə müdafiə edən Azərbaycanı, nə də milli sərhədləri siyasi sərhədlərinə sığmayan, Türk Dünyasının ən qüdrətli ölkəsi olan Türkiyəni bölmək heç bir düşmənə nəsib olmayacaq. Bu gün sərhədlərindən kənarda özünü müdafiə haqqından uğurla və yüksək peşəkarlıqla yararlanan Türkiyəni sabah, bəlkə də sabah açılmadan hər ötən gün gücünə güc qatan qəhrəman Azərbaycan ordusunun Xankəndinə üç rəngli bayrağı sancması ilə nəticələnəcək müzəffər yürüşü izləyəcək. Ona görə bizi yaralaya, incidə, ağrıda, enerjimizi istədikləri istiqamətə yönəldə, diqqətimizi daha böyük hədəflərdən müəyyən zaman kəsiyində yayındıra bilərlər, ancaq heç zaman mehmetçiyimizin də dediyi kimi BU VƏTƏNİ BÖLƏ BİLMƏZLƏR!!! Damarlarımızda daşıdığımız müqəddəs qanın bizə verdiyi ədalət, inam və mübarizə ruhu tükənməyənə qədər...

---

---