Lavrovun sözlərinə görə, Qərb münaqişənin tənzimlənməsindəki maraqlarını Rusiya ilə fikir ixtilafına qurban verib
Rusiyanın xarici işlər naziri Sergey Lavrov Moskvada ermənistanlı həmkarı Ararat Mirzoyanla keçirdiyi birgə mətbuat konfransında deyib ki, ATƏT-in Minsk qrupunun ABŞ və Fransadan olan həmsədrləri Rusiya ilə bu qrupda əməkdaşlıqdan imtina ediblər.
Lavrovun sözlərinə görə, Qərb münaqişənin tənzimlənməsindəki maraqlarını Rusiya ilə fikir ixtilafına qurban verib:
“Mən Minsk qrupunun gələcək taleyinin necə olacağını bilmirəm, çünki bizim bu qrupdakı, belə demək mümkündürsə fransalı və amerikalı həmkarlarımız, rusofob tozanağında, Rusiya Federasiyasına aid nə varsa hər şeyi ləğv etmək canatımında ATƏT-in Minsk qrupu həmsədrlərinin üçlüyünü də ləğv ediblər və bildiriblər ki, bu formatda təmaslarda olmayacaqlar. Əgər onlar Qarabağı tənzimləməsindəki və ümumilikdə Cənubi Qafqazdakı maraqlarını, bu halda isə erməni tərəfinin maraqlarını qurban verməyə hazırdırlarsa, bu onların öz işidir”.
Qərb getsə də, Rusiya burda qalacaq
Qərbin bu hərəkətini “məsuliyyətsiz” adlandrıan Lavrov bildirib ki, Rusiya özünün Qarabağ və Cənubi Qafqaz üzrə öhdəliklərinə sadiq qalacaq:
“Bu, bizi yolumuzdan döndərməyəcək, biz Rusiya, Ermənistan və Azərbaycan liderləri arasında imzalanmış üçtərəfli bəyanat formatında razılaşmaların həyata keçirilməsində səy göstərməyə sadiqik”.
AzadlıqRadiosunun Erməni xidməti – Azatutyunun yazdığına görə öz növbəsində Ararat Mirzoyan deyib ki, dünyada hazırkı geosiyasi vəziyyət ATƏT-in Minsk qrupu həmsədrlərinin işini əhəmiyyətli dərəcədə mürəkkəbləşdirib:
“Amma mənə başqa xəbərlər də çatır. Azərbaycanlı həmkarlarımızın ATƏT-in Minsk qrupu həmsədrlərinin fəaliyyətinin dayandığını, Dağlıq Qarabağ münaqişəsinin olmamasına, Dağlıq Qarabağ adında regionun olmamasına görə onların görə biləcəkləri bir işin qalmadığını təkrar etmələrinə baxmayaraq, başqa ölkələrin həmsədrlərindən alınan konkret siqnallar və məlumatlar var. Bütün bunlara baxmayaraq beynəlxalq birlik Dağlıq Qarabağ münaqişəsinin tənzimlənməsini ATƏT-in Minsk qrupu həmsədrlərinin çərçivəsində görür və bu çox ümidlər yaradır”.
“Bütün zəruri məsələlər”
Lavrovun bu bəyanatından əvvəl, aprelin 6-da Azərbaycan və Ermənistan liderləri Avropa İttifaqı Şurasının prezidenti Şarl Mişelin iştirakı ilə Brüsseldə danışıqlar aparmışdılar.
Bu danışıqlardan sonra Mişel tərəflər arasında sülh müqaviləsinin hazırlanmasına start verildiyini bəyan etmişdi.
Bu arada Azatutyun Avropa İttifaqından adının çəkilməsini istəməyən yüksək vəzifəli diplomatla danışdığını yazır.
Həmin rəsmi Azatuyunun “gələcək müzakirələrə Dağlıq Qasrabağ münaqişəsi də daxil ediləcəkmi” sualına konkret cavab verməyib.
O deyib ki, tərəflər “bütün zəruri məsələləri” müzakirə edəcəklər.
Mişel Erdoğanla da, Putinlə də danışıb
Azatutyunun regionun başqa əsas oyunçularının – Rusiya və Türkiyənin Avropa İttifaqının bu bölgədə aktivləşməsinə necə baxacaqları barədə sualına Avropa diplomatı cavab olaraq deyib ki, bu məsələni Şarl Mişel prezidentlər Putin və Erdoğanla ayrı-ayrılıqda müzakirə edib:
“Türkiyə paralel olaraq Ermənistanla münasibətlərin normallaşması prosesinə başlayıb. Bizim fəaliyyətimiz isə həm də türklər üçün əlverişlidir, çünki onlar Azərbaycan və Ermənistan arasında münasibətlərin normallaşması olmadan Ermənistanla münasibətlərini normallaşdıra bilməzlər. Odur ki, bu iki proses bir-birini tamamlayır”.
Avropa diplomatı bildirib ki, “biz başqalarının hesabına addım atacaq qədər sadəlövh deyilik”.
O əlavə edib ki, Şarl Mişelin də bəyanatında 26 noyabr Soçi razılaşmalarına istinad var. Avropalı diplomat rusiyalı sülhməramlılar məsələsinə də toxunub:
“Rusiya sülhməramlıları birgə sərhəd komissiyasının delimitasiya, stabilliyin təmin olunması və təhlükəsiz şəraitin yaradılması istiqamətində fəaliyyəti həqiqi nəticə verənədək orada qalacaqlar”.
Diplomat əlavə edib ki, sözü gedən birgə sərhəd komissiyası öz fəaliyyətinə çox tezliklə, artıq aprelin sonlarında başlayacaq.
O bildirib ki, bu istiqamətdə əldə olunmuş irəliləyişin müzakirə olunması üçün Aİ çərçivəsində Azərbaycan və Ermənistan liderlərinin daha bir görüşü təşkil ediləcək.
Rusiyanın xeyrinə olmayan rəy sorğusu
Bu arada SOCIES ekspert mərkəzi Yerevan Universitetinin iştirakı və Konrad Adenauer fondunun maliyyə dəstəyi ilə Ermənistanda rəy sorğusu keçirib.
Bu rəy sorğusunun nəticələrinə görə respondentlərin 69.7 faizi Ermənistanın Rusiya ilə münasibətləri məhdudlaşdırmalı, Avropa İttifaqı və ABŞ-la münasibətləri isə genişləndirməli olduğunu bildirib.
Rəyi soruşulanların 34.1 faizi deyib ki, Ermənistan NATO-ya üzv olmalıdır.
Respondentlərin yalnız 29.1 faizi “təhlükəsizlik çətirinin” Rusiyanın rəhbərlik etdiyi Kollektiv Təhlükəsizlik Müqaviləsi Təşkilatında (ODKB) olduğunu deyib.
Respondentlərin 41 faizi ölkənin gələcəyini Avropa İttifaqında gördüyünü bildirib.
Rəyi soruşulanların 28.7 faizi Avrasiya İqtisadi İttifaqında üzvlüyə tərəfdar olduğunu deyib.
Azadlıq radiosu

---

---