Bildiyimiz kimi, bu ilin fevral ayının 7-də Azərbaycanda növbədənkənar prezident seçkiləri keçiriləcək.
Yeniavaz.com xəbər verir ki, bundan əvvəlki prezident seçkiləri 2018-ci ilin aprel ayında keçirilib.
Məlumat üçün bildirək ki, 2018-ci il seçkilərindən sonra ən yadda qalan hadisələr arasında uzun illər mərkəzi icra hakimiyyəti orqanlarına rəhbərlik etmiş şəxslərin tutduqları vəzifələrdən azad olunması oldu.
Belə ki, 2018-ci il prezident seçkilərindən sonra baş nazir Artur Rasizadə, Qaçqınların və Məcburi Köçkünlərin İşləri üzrə Dövlət Komitəsinin sədri Əli Həsənov, əmək və əhalinin sosial müdafiəsi naziri Səlim Müslümov, kənd təsərrüfatı naziri Heydər Əsədov, ekologiya və təbii sərvətlər naziri Hüseynqulu Bağırov, Dövlət Gömrük Komitəsinin sədri Aydın Əliyev, baş nazirin müavinləri Abid Şərifov, İsmət Abbasov və Elçin Əfəndiyev tutduqları vəzifələrdən azad ediliblər.
Qeyd edək ki, adları qeyd olunan eks-məmurlar uzun müddət vəzifədə olmaları ilə diqqət çəkirdi.
Əgər fevral ayının 7-də baş tutacaq prezident seçkilərindən sonra 2018-ci ildə olduğu kimi hökumətin tərkibində dəyişiklikər olarsa, ehtimal edilir ki, uzun müddətdir vəzifədə olan məmurlar işdən çıxarıla bilər.
Onu da bildirək ki, hazırda hökumətin tərkibində olan və uzun illərdir yüksək vəzifə tutan nazir və komitə sədrləri arasında 68 yaşlı baş nazir Əli Əsədov, baş nazirinin 78 yaşlı birinci müavini Yaqub Eyyubov, baş nazirin 71 yaşlı müavini Əli Əhmədov, 68 yaşlı ədliyyə naziri Fikrət Məmmədov, 63 yaşlı fövqəladə hallar naziri Kəmaləddin Heydərov, 63 yaşlı maliyyə naziri Samir Şərifov, 65 yaşlı müdafiə naziri Zakir Həsənov, Dini Qurumlarla İş üzrə Dövlət Komitəsinin 70 yaşlı sədri Mübariz Qurbanlı, Ailə, Qadın və Uşaq Problemləri üzrə Dövlət Komitəsinin 62 yaşlı sədri Bahar Muradova və Dövlət Sərhəd Xidmətinin 57 yaşlı rəisi Elçin Quliyev yer alır.
