Hər il 1 iyun Uşaqların Beynəlxalq Müdafiəsi Günü ilə əlaqədar Dənizkənarı Milli Parkda karusellər və əyləncəli atraksionlar azyaşlı uşaqlar üçün pulsuz olur. Bu il də belə olacağı gözlənilirdi. Lakin bu dəfə işbazlar gəlirsiz işləmək əvəzinə ümumiyyətlə işləməmək qərarına gəliblər. Bulvara axışan vətəndaşlar karusellərin və əyləncəli atraksionların bağlı olduğunu görüblər.  Konkret olaraq 229 saylı orta məktəbin 2 "d" sinfinin şagirdləri və onların valideynləri ANAXEBER.info-a bildiriblər ki, iyunun 1-də Dənizkənarı Milli Parkda işlək vəziyyətdə karusel və atraksionlara rast gəlməyiblər. "Heç bir karusel və atraksion işləmirdi. Camaat deyirdi ki, pulsuz olduğuna görə bağlayıblar" -, deyə valideynlər bildirib. Onlar bu hadisədən narazılıqlarını da ifadə ediblər: "Uşaqları sevindirməkdən gözəl nə ola bilər? Amma bu adamlar hətta ildə bir dəfə bunu etmək istəmirlər. Əvvəlki illərdə də elə edirdilər ki, böyük növbələr yaranırdı, adam bura uşaq gətirməyə peşman olurdu".Valideynlər  Dənizkənarı Milli Parkın rəhbərliyini də ittiham ediblər. "Bəs onlar hara baxır?! Niyə tədbir görmürlər? İnandırıcı deyil ki, onların məsələdən xəbəri olmasın",- deyə valideynlər bildirib.
ANAXEBER.info