"Kəndli, fermer əkdiyi məhsulu becərə bilmir" - FAKT BUDUR!

Regionlarda torpaq istifadəçilərinin suvarma suyu ilə təminatını qanunsuz məhdudlaşdıran vəzifəli şəxslər barəsində cinayət işləri başlanıb. Bu barədə Baş Prokurorluqdan məlumat verilib. Məlumata görə, baş verən iqlim dəyişiklərinə baxmayaraq, ölkəmizdə su təchizatının yaxşılaşdırılması istiqamətində həyata keçirilən mütərəqqi dövlət siyasəti nəticəsində ekoloji tələblərə uyğun müasir su infrastrukturu formalaşdırılıb, əhalinin suya olan tələbatı ən etibarlı şəkildə təmin olunub.

Prokurorluq orqanları tərəfindən sudan istifadəyə dair qanunvericiliyin tələblərinə əməl edilməsi daim diqqətdə saxlanılmaqla, bu sahədə qanunsuz hərəkətlərə yol verən, habelə yaradılmış şəffaf istehlak mühitindən sui-istifadə edən vəzifəli şəxslərə qarşı effektiv mübarizə tədbirləri aparılmaqdadır.Həyata keçirilmiş belə tədbirlərin davamı kimi bu sahədə ayrı-ayrı regionlardan Baş Prokurorluğa daxil olmuş çoxsaylı vətəndaş müraciətlərinin əlaqəli şəkildə təhlili nəticəsində müəyyən edilmiş qanunsuz hallarla bağlı Baş prokuror yanında Korrupsiyaya qarşı Mübarizə Baş İdarəsi tərəfindən təxirəsalınmaz əməliyyat-axtarış tədbirləri həyata keçirilib. Keçirilmiş tədbirlərlə Şəmkir rayon icra hakimiyyəti başçısının Çinarlı qəsəbə inzibati ərazi dairəsi üzrə nümayəndəsi - “Acı arx” Sudan İstifadəedənlər Birliyinin İdarə heyətinin sədri Abbasov Elçin İsmayıl oğlunun 2021-2022-ci illər ərzində vəzifəli şəxs kimi xidməti vəzifələrinin icrası ilə əlaqədar həmin qəsəbə ərazisində yaşayan ayrı-ayrı şəxslərdən istifadələrində olan əkin sahələrinin suvarılmasının təşkil edilməsi üçün kütləvi şəkildə hər hektar torpaq sahəsinə görə 500 manat olmaqla müxtəlif məbləğlərdə pul vəsaitini rüşvət qismində almasına, eləcə də torpaq istifadəçilərinə suvarma üçün suyun verilməsini qismən həyata keçirib təsərrüfatlarına qəsdən ziyan vurmasına əsaslı şübhələr müəyyən edilib.

Qeyd edilən hallarla bağlı cinayət işi başlanmaqla toplanmış ilkin sübutlar əsasında Elçin Abbasova Cinayət Məcəlləsinin 308.2 (ağır nəticələrə səbəb olan vəzifə səlahiyyətlərindən sui-istifadə) və 311.3.2-ci (təkrar rüşvət alma) maddələri ilə ittiham elan edilib və barəsində məhkəmənin qərarı ilə həbs-qətimkan tədbiri seçilib. Bundan başqa, eyni xarakterli əməllərə görə torpaq istifadəçilərindən pul vəsaitinin alınması və təsərrüfatlara ziyan vurulması xüsusatları üzrə Neftçala rayon “Bərəkət”, “Qaravəlli” və digər sudan istifadəedənlər birliklərinin, habelə Neftçala Suvarma Sistemləri idarəsinin vəzifəli şəxsləri barəsində də cinayət işi başlanıb. Hazırda hər iki cinayət işi üzrə təqsirləndirilən şəxslərin, onların əlbir olduğu digər şəxslərin və zərərçəkmişlərin dəqiq dairəsinin, habelə təsərrüfatlara vurulmuş ziyan məbləğinin müəyyən olunması istiqamətində istintaq davam etdirilir. Azərbaycan Respublikasının Baş Prokurorluğu bu qəbildən olan qanunazidd hallarla üzləşən vətəndaşlardan Baş Prokurorluğun “961” Çağrı Mərkəzinə və ya Baş prokuror yanında Korrupsiyaya qarşı Mübarizə Baş İdarəsinin “161-Qaynar xətt” əlaqə mərkəzinə məlumat vermələrini xahiş edir. Dia.az-ın məlumatın agörə, Baş Prokurorluğun həyata keçirdiyi tədbirlərlə bağlı “Şərq”ə danışan sosioloq Elçin Bayramlı qeyd etdi ki, suvarma məsələsində qanunsuzluqlara, təəssüf ki, regionlarda tez-tez rast gəlinir:

- Dəfələrlə biz də mediada və sosial şəbəkələrdə belə fakrları işıqlandırmışıq, həyəcan təbili çalmışıq. Bu, qlobal ərzaq böhranı zamanında ölkəyə və xalqa qarşı ağır sabotajdır və bu şəxslər çox sərt cəzalandırılmalıdırlar. Yaxşı haldı ki, prokurorluq orqanları belə cinayətləri araşdırmağa başlayıb. Bu, konkret olaraq dövlətə xəyanətdir və əhaliyə qəsdən ağır zərər vurmaqdır.

Hazırda dünyada qida qıtlığı və böhran davam edir. Belə bir vəziyyətdə biz mümkün qədər daha çox məhsul istehsal etməyə məcburuq, lakin belə hallar kəndliləri əkib-biçməkdən yayındırır və nəticədə əkinçiliyə, heyvandarlığa, bostan məhsullarının yetişdirilməsinə, ümumilikdə kənd təsərrüfatına ciddi zərər vurulur.

Kəndli, fermer əkdiyi məhsulu becərə bilmir. Regionlarda, kənd yerlərində yaşayan əhali heyvanlarını da normal, lazım olduğu qədər su ilə təmin edə bilmir. Yonca sahələri quruyur, ot tədarükü edə bilmirlər. Meyvələr budaqda, tərəvəzlər tağlarda qalır. Bu vəziyyətdə, əlbəttə, daxili tələbatı ödəmək çətindir.

Bu kimi halların araşdırılması və tədbir görülməsi çox vacibdir. Arzu edərdim, bu proses genişlənsin və bütün ölkəni əhatə etsin. Əks halda biz ərzaq istehsalı cəhətdən çox çətin vəziyyətə düşə bilərik.
Siam.az

---

---