Həmkarlar ittifaqları konfederasiyası.

Bu qurum nə üçün yaradılıb?

Ümumiyyətlə bu qurumun məqsədi, məramı və fəaliyyəti nədən (yaxud nələrdən) ibarətdir?
Bu sualın cavabını heç hər ayın axırında bir aylıq zəhmətinin qarşılığı olaraq, aldığı əmək haqqının hazırından 2 % qurumun büdcəsinə köçürən şəxslər də bilmir.
Əslində nələrdən ibarət olmalı olduğunu bilirlər də həmin öhdəliklərini icra etmədikləri üçün, onların hazırkı fəaliyyətinin nələr olduğunu kimsə bilmir. Təbii ki, "putyovka" (yollayış) alveri xaric.

"Putyovka alveri" demişkən, heç kimə sirr deyil ki, bütün dövlət idarələri və müəssisələrində işçiləri "könüllü"adı altında Həmkarlar İttifaqları Konfederasiyasına üzv olunur və onların əmək haqlarının 2%-i bu komitənin balansına köçürülür. Əvəzində də verdikləri vəd budur ki, güya bayramlarda onlara hədiyyələr verilir, yay aylarında hər hansı bir istirahət mərkəzinə, yaxud sanatoriyaya güzəştli qiymətlə "putyovka" (yollayış) verilir.

Amma, gəlin reallığa nəzər salaq, görək verdikləri vədə əməl edirlərmi?

Tibb işçiləri "DogruXeber.az" bildirir ki, "Bizdə Naftalana və digər sanatoriyalara yollayış olmur " deyən AHİK əməkdaşları 1200-1500 (min iki yüz - min beş yüz) manat arası dəyişən qiymətlə hər kəsə, elə tibb işçilərinin özünə belə satırlar.

Günəşli sanatoriyasına isə 600-dən başlayan qiymətlər təklif olunur.

Yeri gəlmişkən, "100 eşitməkdənsə, 1 görmək yaxşıdır" deyib, özümüz AHİK-nin Bakı şəhərindəki rayonlardan birinin sədri ilə iltifata keçdik. Şəhər ərazisindəki sanatoriyalardan birinə tək nəfərlik yollayış istədik. O da qiyməti birbaşa özü deməyə tərəddüd etdi və "səhv etmirəmsə ora 500 (beş yüz) manatdır deyib, digər həmkarına zəng etdi. Telefondakı şəxs ora yollayışların bitdiyini bildirdi. Ümumiyyətlə, qiymətini soruşduqda isə "610 (altı yüz on) manatdan başlayır" cavabını verdi. Təbii ki, biz bu qiymətlə razılaşmadıq. Bundan sonra bizimlə danışan şəxs minimum 580 (beş yüz səksən) manata qədər endirim edə biləcəyini bildirdi.

Deyirik, "Axı tanışlarımız 200 (iki yüz) manata alıb.
Deyir, - "O yəqin lap çoxdan olub, ya da o yollayışı ona verən onun çox yaxın qohumu filan olub ki, öz qiymətinə verib, yoxsa həyatı boyu ola bilməz. Yəqin o, həkim "putyovka"sı olub"

Tibb işçilərindən biri isə "DogruXeber.az" əməkdaşlarından birinə danışıb ki, "Mənə Naftalana putyovka vermədilər ki, yoxdur. Bir istirahət mərkəzinə verdilər, o da ki, şəraiti, xidməti çox bərbad. Heç verdiyim pula dəymədi. Çox peşman oldum".

Bölgələrimizdən birində yaşayan təhsil işçisi deyir, - "Nəinki putyovka, heç öz pulumuzla bayramlarda bir dənə hədiyyə də vermirlər. Cəmi bircə dəfə hədiyyə verdilər, gəldim evdə açdım, içindəkiləri hesabladım, cəmi 70 qəpiklik şirniyyat var idi içində. Bu pulumuzu alıb, üstəlik də bizi ələ salmaq deməkdir. Mən üzvlükdən imtina etmək üçün dəfələrlə AHİK-nın məktəbdəki nümayəndəsinə müraciət etmişəm. Hər dəfə də xahiş-minnət edir ki, "çıxma, sən çıxsan mənə söz gələcək".
Adını "könüllü" qoyublar, amma məcbur etmək üçün hər vasitədən istifadə edirlər. Hələ üstəlik üzvlükdən çıxmamaq üçün mənə pul da təklif edirlər.".

Maraqlıdır, üzvlərin üzvlükdən çıxması onları bu qədər narahat edirsə, niyə onun müqavilə şərtlərinə uyğun tələblərin yerinə yetirilməsi üçün yalnız üzvlükdən çıxmaq istədikdə hər hər hansı addımların atılmasına cəhd edilir?

Onsuz da bütün dövlət idarələrində bütün çalışanlar bu quruma məcburi üzv olunur, heçolmasa müqavilənin digər şərtlərinə uyğun şəkildə əməl edilə bilməzmi?

Əgər bu şərtləri yerinə yetirmək çətin, yaxud mümkünsüzdürsə, o zaman müqavilədə niyə şərt olaraq qeyd edilib?

Təbii ki, bütün bu suallara cavab verməli olan qurumun - AHİK-nın məsul şəxsləri yenə də susacaq.
Həmişə hər verilən sualın, yazılan haqlı iradların qarşısında susduqları kimi.

Möhbalıyevin "menyu"sundan...

Qeyd edək ki, Bakı şəhər ərazisində də Təhsil üzrə Həmkarlar komitələri nöqsanlarla fəaliyyət göstərirlər. Hər il eyni vaxtda (yay tətilində) sanki, sözü bir yerə qoyub, kütləvi şəkildə təhsil işçilərinin haqqını mənimsəyir, onlara güzəştli qiymətlə verilməli olan yollayışları, baha qiymətə başqalarına satırlar. Hansı ki, əslində heç o qiymətə "güzəşt" demək də düzgün deyil, çünki, onlar zatən işə qəbul olduqları gündən bəri hər ay əmək haqlarının müəyyən hissəsini bu qurumun büdcəsinə köçürürlər.
Amma, görünən...
DogruXeber.az

---

---