FHN-nin milyonçu rəisi ilə oliqarx oğlu sosial media gündəmində... Xanlarovlar necə varlanıb?

Sosial platformalar Fövqəladə Hallar Nazirliyinin Tikintidə Təhlükəsizliyə Nəzarət Dövlət Agentliyinin rəisi Cəbrayıl Xanlarovun oğlu Nazim Xanlarov haqda danışır.
 Artıq Tik-tok və digər sosial media şəbəkələrində geniş yayılmış paylaşımlarda məmur oğlunun yeniyetmə yaşlarından Avropada necə biznesmenə çevrilməsi müzakirə olunur. Sosial şəbəkə istifadəçiləri qeyd edirlər ki, bu gəncin heç bir xüsusi bacarığı, istedadı və tez bir vaxtda belə varlanmaq üçün potensialı yoxdur, yəni adamlardan fərqlənmir. Sadəcə, onun bəxti gətirib ki, atası məmurdur və FHN-də çox mühüm, gəlirli bir sahədə vəzifə tutur. Bəli, Cəbrayıl Xanlarovun tikintiyə nəzarət sektorunda rəis olması hər şeyi ifadə edir, yəni Bakıdakı bütün yeni tikintilər ondan rəy almaq üçün asılıdırlar. Bax, bu minvalla varlanmış Cəbrayıl Xanlarov oğlunun da erkən yaşlardan xaricdə biznes şəbəkələri qurmasına kömək edib. Anaxeber.info yazır ki, sosial şəbəkələrdə məmur balasının öz gücünə milyonçu olmadığı deyilir.
Əvvəlcə, onu deyək ki, Azəri-Trans” şirkəti əsasən Fövqəladə Hallar Nazirliyinin (FHN) tikinti işlərini görür. Adı çəkilən şirkətlə bağlı vaxtaşırı narazılıq səsləri eşidilir. Şirkətin adı tez- tez korrupsiya olaylarında, eləcə də öz işçilərinin əmək haqlarını vaxtlı- vaxtında verməməsi səbəbindən hallanmışdı. Bununla bağlı mediada gedən məlumata görə şirkətin Cəbrayıl Xanlarov tərəfindən birbaşa idarə olunduğu bildirilir. O, 34 yaşında bu vəzifəyə təyin olunub. Bu təyinata qədər FHN-in özündə adi bir işdə işləyib və qeyri-adi bacarığı ilə diqqəti çəkməyib. C.Xanlarovun nazirlikdə birinci müavin, keçmiş MTN-çi Rəfail Mirzəyevin himayəsi altında olduğu da bildirilir. C.Xanlarovun atası Eldar Xanlarov AMEA institutlarından birində işləyir. Ata məsləhəti ilə alim olmaq qərarına gəlib. Belə ki, 2011-ci ildə yeni qanuna görə dövlət qulluğunda işləyənlər elmi iş müdafiə edə bilməzlər. Ona görə da ata-bala və elmi rəhbəri Ziyad Səmədzadənin məsləhəti ilə tələsik olaraq 2010-cu ildə elmi ad almaq üçün qollarını çırmalayıblar.
İndisə keçid edirik onun özü kimi fərasətli milyonçu oğluna...
Məlum olur ki, İngiltərədə nəşr olunan rusdilli "Англия" qəzeti (https://www.google.com/.../young-business-club-nazim.../amp/) onu öz oxucularına "gənc biznesmen" kimi tanıdıb: "Valideynlərim məni 15 yaşımda İngiltərəyə göndərdilər".

15 yaşlı Nazim Londondakı illik təhsil haqqı 15 min funt-sterlinq və ya 33 min manat olan Mander Portman Woodward yatılı kollecində 2 il oxuyub. Daha sonra o, Londondakı Regents Universitetində təhsil alıb. Burada illik təhsil haqqı (bura yaşam və digər xərclər aid deyil) 21 min funt sterlinq, yaxud 47 min manat təşkil edir.
Təbii ki, Londonda təkcə təhsil haqları ümumilikdə 250 min manata çatan tələbə sıradan biri deyil və qəzetin onun atasının kimliyi barədə məlumatsız olan oxucuları üçün Nazimin "uğur tarixçəsi" qibtə doğura bilər.
Axı Nazimin atası Fövqəladə Hallar Nazirliyinin Tikintidə Təhlükəsizliyə Nəzarət Dövlət Agentliyinin rəsi Cəbrayıl Xanlarovdur... Cəbrayıl Xanlarovun babasının adını daşıyan Nazim 20 yaşında tələbə ikən Londondakı digər məmur balalarından geri qalmırdı və şirkətləri vardı.
2014-cü ilin aprelində o, Slovakiyadan olan tələbə dostu David SKIRKANIC-i özünə ortaq seçərək İngiltərədə SHARK&SHARK LTD-ni təsis edib.

Elə həmin ilin dekabrında Nazim Azərbaycandan olan digər dostu Javlonbek YULDASHEV ilə birlikdə Londonda FRIENDS AND BROTHERS LIMITED-i qeydiyyatdan keçirib. Şirkət Londonun zəngin məhəllələrindən olan Somali Road 34b ünvanındakı təmtəraqlı villada hüququ qeydiyyatdadır.

2015-ci ilin əvvəlində Nazım Əli adlı dostu və Britaniya vətəndaşı Zorab Əfəndi ilə birlikdə Britaniyada üçüncü şirkətini qeydiyyatdan keçirir. O bu dəfə özünü xalça ticarətində sınayır. ALNAZO LİMİTED ortaqların adlarının (ALiNAzimZOrab) birləşməsini ifadə edir.

Nazimin Londondakı 4-cü şirkəti - SYNTAXIS GROUP LIMITED 2016-cı ildə təsis olunub. Bu şirkət meyvə şirələrinin, mineral suların və sərinləşdirici içkilərin topdan satışı ilə məşğul olub, FHN şefi Kəmaləddin Heydərova aid "Jalə" biznesinin Londondakı bir qoludur.

ALNAZO LİMİTED-in qeydiyyatda olduğu London, Spenlow Apartments 24, Wenlock Road ünvanı Britaniya mənbələrində Nazim Xanlarovun qeydiyyat ünvanı kimi də göstərilir. Bu mənzil 2014-cü ildə 642 min funt-sterlinqə alınıb, 2017-ci ildə kirayəyə verilib, ötən ilin iyulundan 825 min funt-sterlinqə yenidən satışa çıxarılıb.
Cəbrayıl Xanlarov vaxtilə Gömrük Komitəsinin “Azərterminlakompleksdə” işləyib. Gömrük Xidməti mayoru olduğu bildirilir. FHN yaranandan sonra, 2005-ci ildən bu nazirliyin Tikintidə Təhlükəsizliyə Nəzarət Dövlət Agentliyində rəisi vəzifəsinə təyin edilib.

2015-ci ildə dövlət başçısının göstərişi ilə Cəbrayıl Xanlarovun Bilgəhdəki 3 mərtəbəli nəhəng villası sökülmüşdü. Amma agentlik rəhbəri həyat yoldaşının adına olan imarəti (564 kv.metr) sonradan yenidən tikdirdi.

Qəbələnin Bum kəndində 1 hektarlıq ərazidə sahəsinə görə sökülən imarətindən geri qalmayan daha bir villa (541.22 kv.m) Nazimin adına ucaldıldı.

Nazim Xanlarovun 18 yaşında Bakıda qurduğu animasiya şirkəti - PROSPER CARTON STUDİO (https://www.prosper.az/) isə İngiltərə, Hollandiya və Belçikaya kimi fəaliyyətini genişləndirib. Ən maraqlısı reklam və multiplikasiya biznesində Nazimin şirkətinin 3 milyon funt-sterlinqlik (!) büdcəyə sahib olmasıdır.

Cəbrayıl Xanlarov sürtgü yağlarının, filtrlərin və soyuducu mayelərin Azərbaycana əsas idxalçılarından biridir, ölkədə onun övladlarına məxsus biznesin əsas özəyini servis və yağlama mərkəzləri təşkil edir.

Bakıdakı MAYSON CAR CLUB avto-servis şəbəkəsi Cəbrayıl Xanlarovun oğluna məxsusdur, avtoklubun Bakı şəhərində 4 servis mərkəzi var.

Nobel prospekti, (Köhnə Volvo servis)
Yasamal ray, M.A.Şərifzadə 196 (Günəş petrolun yanı)
Nəsimi ray, Xəqani 49 (Landmarkın arxası)
Bakıxanov qəs, M.Fətəliyev (Arzu Şadlıq evinin yanı)

Digər avto-servis şəbəkəsi PYM Castrol (Peşəkər Yağlama Mərkəzi) adı altında fəaliyyət göstərir. Paytaxtın müxtəlif yerlərində 5 servis mərkəzi var.

PYM-1 Bakı şəhəri, M.Qaşqay 44 (inqilab).
PYM-2 Bakı şəhəri Şərifzadə 196 (Yasamal).
PYM-3 Gəncə şəhəri Ə.Mehmandarov 104/4.
PYM-4 Bakı şəhəri Z.Bünyadov 38 (Dərnəgül).
PYM -5. Bakı şəhəri, Ə Haqverdiyev 13 (İncəsənət Un-nin arxasi).

Cəbrayıl Xanlarovun oğlunun ingilis mətbuatına ağızdolusu danışdığı daha bir tamamilə fərqli biznes sahəsi xalçaçılıqla bağlıdır. Söhbət Cəbrayıl Xanlarovun ailə biznesinə daxil olan "ZİLİ ART" MƏHDUD MƏSULİYYƏTLİ CƏMİYYƏTİ (https://www.ziliart.az/view.php?lang=en) eyniadlı xalça fabrikinin fəaliyyətini tənzimləyir. 4 il əvvəl təsis edilmiş MMC-nin qanuni təmsilçisi LAÇIN AĞAYEV ŞİRVAN OĞLU olsa da, şirkət Xanlarovlar ailəsinin üzvü olan Aydan Xanlarovaya məxsusdur.

Dövlət Agentliyinin rəhbəri özü isə hələ 2004-cü ildə təsis edilmiş "POLİ-TRANS" MƏHDUD MƏSULİYYƏTLİ CƏMİYYƏTİnin qanuni təmsilçisidir. Şirkət BAKI ŞƏHƏRİ SƏBAİL RAYONU, ƏLİ NƏZMİ, ev 62, m. 6 ünvanında hüquqi qeydiyyatdadır. Bu ünvanda Fövqəladə nallar naziri Kəmaləddin Heydərova məxsus "AZƏRİ STANDART" və "AZƏR KARQO" şirkətləri də hüquqi qeydiyyatdadır.

Cəbrayıl Xanlarovun oğlunun daha bir şirkəti - ANKER CREATIVE SOLUTIONS" Məhdud Masuliyyətli Cəmiyyətidir, şirkət marketinq və reklam bazarında fəaliyyət göstərir.
AnaXeber.info

---

---