"DOST Agentliyindən deyirlər ki, get, işini işlə, amma..." - GİLEY


Mingəçevir sakini Elçin Qarayev iş yerində təzyiqə məruz qaldığını, son aylarda maaşının kəsildiyini, hətta işsiz qalmaq təhlükəsiylə üzləşdiyini deyir. Kirayə qaldığını, himayəsində xəstə və yaşlı valideynlərinin olduğunu deyən Elçin Qarayevin sözlərinə görə, mart ayında maaşı o qədər kəsilib ki, ona cəmi 95 manat pul verilib:

“95 manatla mən kirayə pulu verim, kommunal xərcləri ödəyim, nəqliyyat xərclərimi qarşılayım?! Bəs mən nə yeyim, nə içim? Hələ başqa xərclərimdən, ailə üzvlərimdən danışmıram. Bu qədər insafsızlıq olmaz axı. Aydın məsələdir ki, bütün bunlar məni bezdirib uzaqlaşdırmaq üçündür. Kadrlar şöbəsinin müdiri, briqadir deyir ki, get, hara istəyirsən, şikayət elə. Bunlar kimə güvənir ki, vətəndaşla belə danışır?”.

“Haqqımda şər-böhtanlar yazmağa başladılar”

41 yaşlı Elçin Qarayev xeyli vaxtdır ki, Dayanıqlı və Operativ Sosial Təminat (DOST) Agentliyi vasitəsilə Mingəçevir şəhər Yaşıllaşdırma və Sanitar Təmizlik İdarəsinə işə düzəlib, orada bağban kimi işləyir. Aylıq maaşı 326 manat olub.

Son aylarda onunla idarənin kardlar şöbəsinin rəisi və briqadir arasında problemlər yaranıb. Elçin Qarayev iddia edir ki, bu problem onun başqa bir məsələ ilə əlaqədar prokurorluğa məktubundan qaynaqlanır:

“İşləmək üçün mənə üç sahə ayrılıb. Sahədə açıq tok xətləri gördüm. Bu, təhlükəlidir. Bu haqda əvvəl briqada rəhbərinə məlumat verdim. Tədbir görülmədi. Sonra idarə rəhbərliyinə məlumat verdim. Yenə tədbir görülmədi. Ona görə də təhlükəsizliyi nəzərə alıb, prokurorluğa məlumat verdim. Bundan sonra briqadir Vahid Kərimov, kadrların müdiri mənimlə düşmən oldu. Mənim haqqımda ardıcıl şər-böhtan xarakterli ərizələr yazmağa başladılar. Təsəvvür edin, briqadir idarə rəisinə məktub yazır ki, onu işdən çıxarın, yaxşı işçi deyil”.

“Qalmışam iki yol ayrıcında…”

Elçin Qarayev əlavə edib ki, rəsmi qaydada işdən çıxarılmayıb, amma digər tərəfdən də işə buraxılmır: “DOST Agentliyindən deyirlər ki, get, işini işlə. Amma Mingəçevirdə də deyirlər ki, Bakıdan arayış gətir ki, işdən çıxarılmamısan. Qalmışam iki yol ayrıcında…”.

Mingəçevir şəhər Yaşıllaşdırma və Sanitar Təmizlik İdarəsindən isə Meydan TV-yə bildirilib ki, Elçin Qarayevin işə yanaşmasında, davamiyyətində ciddi problemlər var. Onun maaşının kəsilməsi də bir çox hallarda işdə olmaması, üzərinə düşən vəzifələri yerinə yetirməməsiylə bağlı olub. İdarədən vurğulanıb ki, onun işi buraxması üçün göstərdiyi səbəblər də əsaslı olmayıb, öhdəliklərinə məsuliyyətsiz yanaşıb.

Elçin Qarayev bu ittihamlarla razılaşmır, işdən çıxarılması üçün şərləndiyini deyir.

Meydan TV

"DOST Agentliyindən deyirlər ki, get, işini işlə, amma..."
Tarix: 3-04-2023, 10:55
Xəbəri paylaş



Xəbər lenti

Gündəm

Əyalət

Siyasət

Cəmiyyət

Hadisə

Şou biznes

Sosial

İdman