SİAM.AZ-ın yazısına DİN-dən REAKSİYA – Zaqatala sakininin iddiası ilə bağlı rəsmi açıqlama verildi

Hurriyyet.az saytında dərc olunan “Zaqatalada həyatda olan insana “ölüm kağızı”nı kim və necə verib? – RAYON SAKİNİNİN TORPAĞINI ƏLƏ KEÇİRMƏK ÜÇÜN ŞOK SAXTAKARLIQ” sərlövhəli yazıya Daxili İşlər Nazirliyindən (DİN) reaksiya verilib.
DİN Mətbuat Xidmətinin Şəki regional qrupundan SİAM.AZ-a bildirilib ki, Zaqatala rayonunun Göyəm kənd sakini Qurban Məmmədovun ölümlə hədələnməsi barədə etdiyi müraciət əsasında polis şöbəsində araşdırma aparılıb. Qurban Məmmədov, arvadı və şikayət etdiyi Ramin Şərifovun izahatları alınıb. Araşdırma zamanı məlum olub ki, R.Şərifov Q.Məmmədovun atası Laçın Məmmədovla notarial qaydada alqı-satqı müqaviləsi bağlayaraq ona məxsus 81 sot torpaq sahəsini alıb.
Tərəflər arasındakı torpaq mübahisəsi ilə bağlı müraciətlərə Zaqatala Rayon Məhkəməsində, daha sonra isə Şəki Apellyasiya Məhkəməsində də baxılıb və R.Şərifovun xeyrinə qərar qəbul edilib. O, ifadəsində torpağın ona məxsus olduğunu təsdiq edən məhkəmə qərarının olmasına baxmayaraq Q.Məmmədovun onunla davamlı şəkildə mübahisə etdiyini, həmin torpaq sahəsində işləməyə imkan vermədiyini bildirib. Şikayətçinin isə ölümlə hədələnməsi barədə iddiaları öz təsdiqini tapmadığından cinayət işi başlanılmayıb. Tərəflər arasındakı mübahisə predmeti mülki xarakterli olduğu üçün məhkəməyə müraciət etmələri tövsiyə olunub.
Vəfat edən Fatimat Xaşalovanın 2017-ci ildə Laçın Məmmədovla nikah bağlaması məsələsinə gəlincə isə, Zaqatala Rayon Qeydiyyat Şöbəsindən daxil olmuş məktub əsasında onun şəxsiyyət vəsiqəsi elə öldüyü, yəni 2014-cü ildə fəaliyyətsizləşdirilib”.
SİAM.AZ
P.S. Qeyd edək ki, yazıdan da göründüyü kimi, polisin reaksiya verməsinə səbəb şəxsiyyət vəsiqəsinin deaktiv olunduğunu təsdiqləmək və qarşı tərəfin təhdid iddiasının təsdiqini tapmadığını diqqətə çatdırmaqdır…

---

---