İş şlyapadadır... - Melaniya Tramp baş geyimini 250 min dollara satmağa çalışdı və lağa qoyuldu

Amerikanın keçmiş birinci xanımı Melaniya Tramp ilk rəsmi qəbulda qoyduğu şlyapasıını 250 min dollara satmaq istədiyi üçün jurnalistlər və sosial şəbəkə istifadəçiləri tərəfindən tənqid edilib. Bir çoxları ölkə tarixi üçün geyimlərini arxivlərə və kitabxanalara bağışlayan digər eks-prezidentlərin arvadlarından fərqli olaraq, onun həyat yoldaşının keçmiş dövlət başçısı statusundan qazanc üçün istifadə etmək cəhdini “ədəbsizlik” və “abırsızlıq” hesab ediblər.
 
Moderator.az bu barədə “The İndependent” nəşrinə istinadla xəbər verir. Nəşr yazır ki, Melaniya Tramp 2018-ci il aprelin 24-də Fransa prezidenti Emmanuel Makron və xanımı ilə rəsmi görüşdə geyindiyi şlyapasını hərraca çıxarıb. Bu xəbərdən sonra keçmiş birinci xanım öz mənfəətini ənənədən üstün tutduğuna və oynamaq şansı qazandığı rola hörmətlə yanaşmadığına görə tənqid atəşinə tutulub.

Nəşrin məlumatına görə, 51 yaşlı Melaniya aksesuarın satışını yanvarın 4-də elan edib. Hərraca həmçinin onun bu şlyapada Mark-Antuan Kulon tərəfindən çəkilən akvarel portreti və rəssamın NFT nişanı da əlavə olunub. Bütün əşyalar ABŞ-ın keçmiş prezidentinin həyat yoldaşı, iki rəsm əsəri isə onların müəllifi tərəfindən imzalanıb. Onlar vahid lotda 250 min dollar ilkin qiymətlə satışa qoyulub.
 
"Dövlət başçısı” kolleksiyası Tramp administrasiyası dövründə ilk rəsmi səfəri xatırladır və imzalanmış üç mühüm və unikal əşyanı ehtiva edir", - deyə Melaniya Trampın mətbuata açıqlamasında bildirilir. Qeyd olunur ki, ənənəvi qarşılanma mərasimindən sonra ABŞ və Fransanın birinci xanımları Milli İncəsənət Qalereyasını ziyarət edərək Ağ Evdə birgə mətbuat konfransına qatılıblar, axşam saatlarında isə Ağ Evdə Tramp cütlüyünün ilk rəsmi nahar mərasimi keçirilib.
 
“Bu düzgün deyil. Bu, abırsızlıqdı. O, amerikalıların ərinə layiq gördükləri rolun hesabına özünə maliyyə yastığı yaratmağa çalışır”, - deyə Tramp administrasiyasının keçmiş rəsmisi CNN-ə açıqlamasında bildirib. Trampın başqa bir keçmiş əməkdaşı da bildirib ki, keçmiş prezidentin həyat yoldaşı “şəxsi pula sahib olmaq istəyir”, qarderob əşyasını satmaq isə onu əldə etməyin “tez və asan yoludur”.
 
Ağ Ev barədə kitabın müəllifi, jurnalist Keyt Andersen Brauer eyni televiziya kanalına bildirib ki, şlyapanın satışı “Trampların həmişə utanmadan pul qazandıqlarını söyləməyə tam əsas verir, Melaniya isə iliyinə qədər Tramp olduğunu sübut etməyə davam edir. "O, birinci xanım olanda onun sadəcə kar olduğunu və ətrafında baş verənləri başa düşmədiyini düşünürdüm. İndi görürəm ki, o, hər şeyi gözəl görürmüş, sadəcə laqeyd yanaşarmış. O, hərracda iştirak etmək qərarına gələrkən rəsmi səfərlərdən qalan əşyaları satmağın nə qədər görünməmiş bir şey olduğunu bilməmiş olmazdı”, - deyə Brauer bildirib.
 
“LBJ” fondunun prezidenti və baş icraçı direktoru Mark Apdeqrouv CNN-ə müsahibəsində qeyd edib ki, Melaniya şlyapasını satmaq hüququna malikdir, lakin onun qərarı tarixə və amerikalılara təşəkkür olaraq milli arxivlərə və prezident kitabxanalarına oxşar əşyalar bağışlayan digər keçmiş birinci xanımların davranışlarına "uyğun deyil". Konnektikut Universitet Arxivinin prezidenti və qurucusu Con Reznikoff CNN-ə bildirib ki, bu işdəki təcrübəsinə əsaslanaraq deyə bilər ki, "həyatda olan məşhurlar müflis olmadıqları təqdirdə, adətən ev əşyalarını hərraca çıxarmırlar".
 
Mətbuata verilən məlumata görə, gəlirin bir hissəsi uşaq evlərindəki təhsilə yönəldiləcək. Sosial şəbəkə istifadəçiləri Melaniyanı şlyapanın satışından əldə ediləcək pulun yalnız bir hissəsinin xeyriyyə məqsədlərinə yönəldilməsinə görə məsxərəyə qoymaqdan çəkinməyiblər və Tramp cütlüyünü “fırıldaqçı” adlandırıblar. Bəziləri keçmiş prezidentin ailəsinin maddi imkanlarının olmadığı fərziyyəsini də irəli sürüblər. "Trampların tez pul qazanmaq üçün etməyəcəyi bir şey varmı?" - deyə “Twitter”də bir şərhçi soruşur. “Cəlbedicidir. Melaniya qaraj satışı təşkil edib”, - deyə digər biri lağ ılə şərh edib.
 
Melaniyanın uzun illər onun yanında işləyən keçmiş köməkçisi CNN-ə müsahibəsində bildirib ki, o, “qapalı” insandır və əşyalarını niyə satdığını “heç vaxt açıqlamayacaq”. "Başqalarının onun haqqında nə düşündükləri onu heç vaxt maraqlandırmayıb, ona görə də bütün bu tənqidlər onun üçün heç bir əhəmiyyət kəsb etmir", - deyə "The Independent" nəşri keçmiş birinci xanımın tabeliyində işləmiş əməkdaşın sözlərini sitat gətirir.

---

---