“Vurulmuş” Mahmudovları yenidən “dirçəldən” səbəb

Eldar Mahmudov “MTN işi” başa çatmamış başını dikəltməyə çalışır; ekspert: “Onun oğlunun hansısa biznesini inkişaf etdirməsi heç də təəccüblü deyil”

Ləğv olunmuş milli təhlükəsizlik nazirliyinin sabiq rəhbəri Eldar Mahmudovun oğlu Anar Mahmudov ailə biznesini genişləndirməkdədir. Oğul Mahmudovun idarə etdiyi “Caspian Crystal” LLC şirkəti ilə Fransanın məşhur armanyak (konyakın bir növü, Fransanın Armanyak bölgəsində yetişdirilən xüsusi üzüm sortlarından hazırlanır) içkisi istehsal edən “Chateau de Bordeneuve” şirkəti müqavilə bağlayıb. Müqaviləyə əsasən bu şirkətin istehsal etdiyi armanyak Azərbaycanda “Caspian Crystal” şirkəti tərəfindən satılacaq. Virtualaz.org xəbər verir ki, bu haqda Fransa şirkətinin yaydığı press-relizdə bildirilir.

Orada qeyd olunur ki, “Caspian Crystal” Bakıda mənzillənən, 12 mərtəbəli plazaya, üç ticarət nöqtəsinə, iki şərab anbarına və güclü anbar-paylama şəbəkəsinə malik olan şirkətdir. Chateaux Bordeneuve & Collections şirkətinin kommersiya direktoru Jerom Kastedine bildirib ki, bu sövdələşmə nəticəsində “Collection Privee” və “Baron de Sigognac” markalı armanyak beynəlxalq arenada daha çox tanınacaq, prestij qazanacaq.

“Bizim məhsulların yüksək keyfiyyətini, qüsursuz, beynəlxalq və peşəkar imicini nəzərə alaraq biz əminik ki, uzunmüddətli və davamlı tərəfdaşlığa başlayırıq. Mən ”Caspian Crystal" şirkətinə daha çox uğurlar arzu edirəm və onlara qəti özünəinamlarına görə təşəkkür bildirirəm"-direktor əlavə edib. Fransız konyaklarının Azərbaycanda satışını təşkil etmək üçün müqavilə bağlayan “Caspian Crystal” şirkəti keçmiş milli təhlükəsizlik naziri Eldar Mahmudovun ailə biznesinə daxildir. Bu holdinqi keçmiş nazirin oğlu Anar Mahmudov idarə edirdi.



“Caspian Cyristal” şirkəti Azərbaycanda dünyanın hər bir yerindən gətirilmiş eksklüziv şərablar və alkoqollu içkilər təklif edən ilk butikin - “Wine City”nin yaradıcısıdır. Hazırda Bakıda bu adla 3 butik fəaliyyət göstərir. “Wine City” mağazasında 18 min şüşənin saxlanıldığı şərab anbarı qurulub. Şərab butikinin layihəsi və dizaynı fransızlarla birgə hazırlanıb. Bu şərablar elit müəssisələrə təqdim edilir və VİP müştərilər üçün nəzərdə tutulub. Habelə “Caspian Crystal” şirkəti 2008-ci ildən etibarən lüks qədəhlər istehsalçısı “Riedel Crystal” şirkətinin Azərbaycanda rəsmi distribütorudur. “Caspian Crystal” şirkətinin fəaliyyətinin bir istiqaməti Avropanın ən yaxşı istehsalçılarından eksklüziv qida məhsullarının idxalıdır. 2007-ci ildə şirkət öz ərzaq bazasını yaradıb və “Gastronomy” pərakəndə və topdansatış üzrə ilk mağazasını açıb.


Hazırda “Gastronomy-1, ”Gastronomy-2? və “Gastronomy-3? mağazaları fəaliyyət göstərir. Öz fəaliyyətinə restoran biznesi ilə başlayan ”Caspian Crystal" - “Beluga”, “Salvador Dali”, “Lord”, “VİP”, “Velluto” və “Crystal Shikhovo” kimi dəbdəbəli restoranlar şəbəkəsi yaradıb. “Caspian Crystal” şirkəti müəssisə və təşkilatların əməkdaşlarının qida ilə təmin olunmasının təşkili üzrə podrat xidmətlərinin göstərilməsi üzrə də ixtisaslaşıb. Azərbaycanda “Range Rover”, “Jaquar”, “Maserati” avtomobillərinin və “Dicati” motosikletlərinin rəsmi təmsilçisi olan “Crystal Motors” şirkəti də “Caspian Crystal” holdinqə bağlıdır. “Caspian Crystal”ın baş ofisi Bakıda Yusif Səfərov küçəsində “Caspian Crystal” plazada yerləşir.


Xatırladaq ki, Eldar Mahmudovun işdən çıxarılmasından və onun MTN-dəki mütəşəkkil qruplaşmasının zərərsizləşdirilməsindən sonra “Caspian Crystal” şirkətinin də fəaliyyətini dayandırdığı haqda məlumatlar gəlirdi. Lakin daha sonra məlum oldu ki, şirkət işləyir və onun tərkibinə daxil olan müəssisələr fəaliyyətini davam etdirir. Bəs şirkət hələ də Eldar Mahmudovun oğluna məxsusdurmu? Yoxsa Azərbaycan bazarına elit alkoqollar, elit qədəhlər, “Range Rover”lər və s. idxal edən şirkət hazırda başqa əllərə keçib?


Virtualaz.org bu suallarla şirkətin ofisinə zəng vurub, Anar Mahmudovun hələ də bu şirkətə rəhbərlik edib-etmədiyi ilə maraqlanıb. Telefon zənginə cavab verən əməkdaş bu suala cavab vermək istəməyib, “bizdə rəhbərlik və şirkətin sahibləri barədə hər hansı informasiyalar məxfidir” deyib. Eyni zamanda şirkətlə maraqlanıldığından təəccübləndiklərini də gizlətməyiblər.


Oğul Mahmudovun Fransa şirkəti ilə müqavilə bağlaması ictimai rəydə birmənalı qarşılanmayıb. Bunu Eldar Mahmudovun dirçəlməsi, yenidən meydana qayıtması kimi qəbul edənlərlə yanaşı sabiq nazirə görə oğluna qarşı addımların atılmamasından narazılıqlarını bildirənlər də var.


Anar Mahmudovun biznesi atasına görə əlindən alınmalı idimi? A.Mahmudov atasına, onun hərəkətlərinə cavabdehlik daşıya bilərmi?



Sabiq MTN polkovniki, təhlükəsizlik üzrə ekspert İlham İsmayıl deyir ki, Azərbaycan daha çox yazılmış qanunlarla deyil, yazılmamış qanunlarla idarə olunur: “Hüquqi baxımdan yanaşanda Eldar Mahmudovun oğlunun biznesini davam etdirməsində heç bir problem yoxdur. Oğul atasına cavabdeh deyil, oğul azad və hüquqi bir dövlətdə biznesini davam etdirir. Yazılmamış qanunlara görə Eldar Mahmudov necə azadlıqdadırsa, onun oğlu da həmin formada biznesini genişləndirir. Eldar Mahmudovun MTN-də baş verən cinayətlərdə nazir kimi dolayı və birbaşa əli olduğu bilinən cinayətlər haqda çoxsaylı məlumatlar var. Amma Eldar Mahmudov heç bir məsuliyyətə cəlb olunmur. Bu adamı qoruyurlar. Onun oğlunun hansısa biznesini inkişaf etdirməsi, qoruması, fəaliyyətini davam etdirməsi heç də təəccüblü deyil.


Düzdür, ölkədə başqa praktika hökmrandır. Kimsə “vurulursa” onun bütün əmlakları, qohum-qardaşının əmlakları əllərindən alınır, bank hesabları, mal-mülklərinə əl qoyulur. “Vurulanın” çoxsaylı qohum-qardaşı vəzifələrdən çıxarılır, təqib olunur. Eldar Mahmudova münasibət isə fərqlidir. Onunla bağlı proses başqa xətlə inkişaf edir. Ata ilə bağlı proses necə inkişaf edirsə, oğlu ilə bağlı da o yöndə davam edir".




İ.İsmayıl deyir ki, kimsə E.Mahmudovun yaxın perspektivdə məsuliyyətə cəlb olunacağını gözləməsin: “Barəsindəki xüsusi qərardad da məsləhət xarakterli idi. Məhkəmə elan edir ki, bu materialların əsasında məsləhətdir ki, cinayət işi başlansın. İttiham tərəfi bunu rədd də edə bilər, necə ki, indiyə qədər edir. Göründüyü kimi ittiham tərəfi bundan uzaqdır, Eldar Mahmudovun barəsində hər hansı bir addım atmır. Bunu edə bilmir, etmək istəmir göz önundədir. Hüquqi nəticəsi olmayan addımların atılması da E.Mahmudov üçün heç nə vəd etmir”.


İ.İsmayıl deyir ki, hakimiyyətin E.Mahmudovla bağlı perspektiv planları var: “Bu planların gerçəkləşməsi üçün Eldar Mahmudovun azadlıqda olması vacibdir. Onun oğlunun biznesinin inkişaf etdirməsi də bu planlara mənfi təsir etmir və bu baxımdan ona kimsə də mane olmur. Eldar Mahmudovla söhbət bəzi maliyyələrin geri qaytarılması istiqamətində gedir. Necə ki, başqaları ilə, eyni qaydada Eldar Mahmudovla da iş aparılır”.


İ.İsmayıl hesab edir ki, E.Mahmudovla aparılan işin üzərindən vəzifəyə qaytarılması mümkün deyil: “Eldar Mahmudovun vəzifəyə qoyulması hakimiyyətə zərər gətirər. Düzdür, Azərbaycanda ictimai rəylə əksərən hesablaşmırlar. İctimai rəy bunu Eldar Mahmudovun qələbəsi kimi qəbul edər. Yəni onu vəzifəyə qoymazlar. Digər tərəfdən Eldar Mahmudovunu özü də vəzifəyə təyin olunmasını istəməz. Onun ən böyük vəzifəsi azadlıqda olmasıdır”.


E.MƏMMƏDƏLİYEV

---

---