Moskvanın Qarabağla bağlı “B” PLANI – Rusiya niyə Ağdam-Xankəndi yolunu SEÇDİ?

Moskvanın Qarabağla bağlı “B” PLANI
Xəbər verdiyimiz kimi, Rusiya hökumətinin təşəbbüsü ilə Azərbaycan Qızıl Aypara Cəmiyyəti və Rusiya Qızıl Xaç Cəmiyyətinin (RQXC) birgə əməkdaşlıq memorandumuna əsasən, Moskva tərəfindən Azərbaycanın Qarabağ iqtisadi rayonunda yaşayan erməni sakinlərinin ərzağa olan ehtiyaclarının qarşılanması məqsədi ilə, RQXC tərəfindən ərzaq və qeyri-ərzaq məhsulları ilə dolu 1 TIR ərzaq yükü göndərilib. Son məlumatlara görə, Rusiya Qızıl Xaç Cəmiyyətinin göndərdiyi ərzaq yükü hazırda Bərdədədir.

Görünən odur ki, son zamanlar bölgəyə humanitar yük göndərilməsi adı altında dünya gücləri arasında sanki bir mübarizə gedir.

Bu mənada maraqlıdır, görəsən, Rusiyanın Ağdam yolu ilə Xankəndinə yardım göndərməsi nəyə hesablanıb? Proses nə ilə yekunlaşacaq?

Siam.az-ın məlumatına görə, Bizim.Media-ya açıqlamasında politoloq Tural İsmayılov bildirir ki, Rusiyanın humanitar yük şousunda iştirakı Qərbə ünvanlanmış addımdır və bununla Kreml regionda əsas geopolitik güc faktoru olduğu mesajını verir:

“Bu gün Xankəndidəki ermənilərə humanitar yük adı altında regionda çirkin siyasi oyunlar baş verir. Bu çirkin siyasi oyunların ən böyük səbəbkarı da ərazidə separatizmin olmasında maraqlı olan Rusiyadır. Rusiya indiyə qədər Fransa daxil olmaqla Qərbin Qarabağ separatçıları üzərindən manipulyasiyasına şərait yaradıb. Ən azından 30 illik işğal dövründə ATƏT-in Minsk qrupunda Rusiya Fransa və ABŞ-la birgə prosesin ölü nöqtədən tərpənməsinə imkan verməyib.

Amma bu gün Moskva görür ki, Qərb Ermənistanda Avropa İttifaqının mülki müşahidə missiyası adı altında cəsus şəbəkəsi yerləşdirir. Fransa daxil olmaqla beynəlxalq güclər Xankəndinə humanitar yük adı altında həm Azərbaycanın ərazi bütövlüyünü təhdid, həm də orada müvəqqəti yerləşən rus sülhməramlılarına hörmətsizlik edirlər. Başlıcası isə Qərb bu yolla bölgəyə daxil olmağa çalışır. Belə vəziyyət isə Rusiyanın siyasi-iqtisadi maraqlarına cavab vermir. Ona görə də Rusiya humanitar yük şousunda iştirak etməklə Qərbə regionda əsas geopolitik güc faktoru olduğu mesajını verir”.

Həmsöhbətimizə görə, Rusiyanın humanitar yük üçün Ağdam yolunu seçməsi onun həmin məsələdə Azərbaycanın təklif etdiyi modeli dəstəklədiyinə işarədir:

“Azərbaycan Ağdam-Xankəndi yolunun işləkliyini təklif edib. Rusiyanın həmin məsələdə tutduğu mövqe də onu göstərir ki, Moskva da Bakının təklif etdiyi bu modeli dəstəkləyir. Bu da Azərbaycan üçün pozitiv tərəfdir. Lakin bu heç də Moskvanın Azərbaycana hansısa sevgisindən doğan hadisə deyil. Sadəcə olaraq, Rusiya bununla Qərbə regionda özünün geopolitik güc olduğunu göstərmək istəyir”.

Ekspert düşünür ki, həmin yüklər əvvəl-axır Xankəndinə daxil olacaq:

“İstər Rusiya Qızıl Xaç Komitəsinin, istərsə də Azərbaycan Qızıl Aypara Cəmiyyətinin göndərdiyi humanitar yardımlar mütləq Xankəndinə çatdırılacaq. Azərbaycan səbr göstərir. Ya dinc yolla, ya da hərbi yolla Azərbaycan Ağdam-Xankəndi yolunun işləkliyinə nail olacaq”.
Tarix: 11-09-2023, 18:12
Xəbəri paylaş



Xəbər lenti

Gündəm

Əyalət

Siyasət

Cəmiyyət

Hadisə

Şou biznes

Sosial

İdman