Bizimlə birgə Neftçaladakı şəhid ailələrinin evinə rayon polis şöbəsinin işçiləri, bələdiyyə sədri, icra nümayəndəsi də çatdı. Onlar şəhid ailələrinin hansı şəraitdə yaşadığının çəkilməsini istəmirdilər. Uzun çək-çevirdən sonra əraziyə yığışan səlahiyyətlilər çıxıb getdilər. Şəhid ailələri qəzalı evlərdə necə yaşadıqlarından, onlara çatmalı olan 11 min manatı ala bilmədiklərindən və güzəranlarından danışdılar.

Onlar bir aydan çoxdur Milli Məclis, Prezident Administrasiyası, Əmək və Əhalinin Sosial Müdafiəsi Nazirliyinin qarşısında aksiya keçirirlər. Şəhid ailələri ölkə başçısı İlham Əliyevin 19 apreldə verdiyi fərmana əsasən 11 min manat müavinəti almaq istəyirlər. Amma rəsmi qurumlardan onlara deyilir ki, şəhid üçün ayrılan sığorta pulunu onlar 90-cı illərin əvvəllərində alıblar. Şikayətçilər isə bildirirlər ki, bu pulu almayıblar və almaları ilə bağlı rəsmi qurumlar onlara heç bir sənəd təqdim edə bilmir.