Paytaxtın Səbail rayonunda tikilən yeni bina görənləri heyrətə gətirir. Səbəb isə köhnə binanın eyvanının yeni tikilən binanın içərisində olmasıdır. Burada həm təhlükəsizlik qaydaları, həm də tikinti şərtləri kobud şəkildə pozulub və tikili sakinlər üçün potensial təhlükə mənbəyinə çevrilib.
 
Pravda.az-ın məlumatına görə, söhbət Səbail rayonu, Rastrapoviç küçəsindən gedir.
 
Buradakı üçmərtəbəli köhnə bina sovet dövründə tikilib. Təxminən 10 il öncə "Axundov Residence" adlı MTK tərəfindən burda 13 mərtəbəli yeni bina inşa edilməyə başlanıb. Əvvəlcə yeraltı qaraj adı ilə tikintiyə başlansa da, sonradan bu, çoxmərtəbəli binaya çevrilib.
 
Zemfira Məmmədova deyir ki, tikinti aparılan zaman bütün daş, qum, sement onların pəncərələrinə tökülür. Eyvanın qarşısındakı armaturlar isə potensial təhlükədir. Çünki külək zamanı eyvandan asılan paltarlar dəmir armaturlara ilişir. Ən qəribəsi isə binanın 2 balkonunun təzə tikilinin içərisində qalmasıdır.
 
Eyni problemi qonşu mənzilin sahibi Dinar Rəsulova da yaşayır. O da balkonundan istədiyi kimi istifadə edə bilmir.
 
 Bir neçə ildir ki, binanın tikintisi dayandırılıb. Səbəbsə vəsaitin olmamasıdır. Biz də tikintinin aparıldığı binaya yaxınlaşdıq. Məsul  şəxslərlə görüşüb vəziyyəti aydınlaşdırmağa çalışsaq da, suallarımıza cavab tapa bilmədik.
 
Sakinlər vəziyyətlə bağlı Səbail Rayon İcra Hakimiyyətinə də müraciət ediblər. Səbail Rayon İcra Hakimiyyətindən "Xəzər Xəbər"ə bildirilib ki, sakinlərin şikayəti dinlənilib, məsələ araşdırılır. Bununla bağlı müvafiq qurumlara müraciət ünvanlanacaq.
 

---

---