“Azəristiliktəchizat”a vaxt verildi: "Bir həftəyə 34 milyon manat ödənilməzsə..."

Bu günə “Azəristiliktəchizat” ASC-nin Dövlət Neft Şirkətinin (SOCAR) "Azəriqaz" İstehsalat Birliyinə 34,3 milyon manat borcu var.

İndex.az xəbər verir ki, bu barədə “Report”un sorğusuna cavab olaraq “Azəriqaz”ın İctimaiyyətlə əlaqələr şöbəsinin rəisi Eldəniz Vəliyev məlumat verib.

Bununla belə, onun sözlərinə görə, qarşı tərəf bu məbləğin bir hissəsini qəbul etmir, borcun deyiləndən 14 milyon manat az - 20,3 milyon manart olduğunu bildirir.

"Onların bizə dəfələrlə borcu yaranıb. Hər il qış aylarına yaxın bu barədə mübahisələr yaranır. Bu dəfə məbləğ daha böyükdür və cari ilin borcudur", - deyə o, qeyd edib.

E. Vəliyevin sözlərinə görə, İstehsalat Birliyi istilik mövsümü başlamazdan bir neçə gün əvvəl bu məsələni ictimailəşdirməyə başlayıb: “Çünki sabah qazanxanalara borca görə və haqlı olaraq qaz verilməyəndə insanlar istiliyin niyə olmamasının səbəbini soruşacaqlar. Bu zaman “Azəristiliktəchizat” deyəcək ki, “Azəriqaz” bizə qaz vermir, ona görə də biz qazanxanalardan istifadə edib sizi istiliklə təmin edə bilmirik. Yəni məsələni qınaq obyekti olaraq “Azəriqaz”ın üstünə yönləndirəcəklər. Biz mavi yanacağı “Azərkontrakt” ASC-dən alırıq. Satdığımız qazın pulunu yığmalıyıq ki, onların da pulunu tam ödəyək və nəticədə növbəti il üçün də qaz ala bilək. Hər qurumun müəyyən qədər borcunun olması böyük bir məbləğ edir. Biz bu borcu yığıb qaytarmaqla mavi yanacağı vaxtında ala, daha davamlı və daha təhlükəsiz qaz təchizatını təmin edə bilərik. Digər tərəfdən “Azəriqaz”ın çox sayda işçisi, xidməti sahələri var. Bunların hamısının saxlanılması, avadanlıqların yenilənməsi, dəyişdirilməsi böyük vəsait tələb edir”.

“Yekun olaraq “Azəristiliktəchizat”la noyabrın 14-də danışıqda belə razılıq ldə olundu ki, ayın 15-də “Azəriqaz” qazanxanalara qaz verəcək. Amma bir şərtlə ki, bir həftə müddətinə sözügedən borc ödənilməlidir. Qarşı tərəf razılaşmaya əməl etməsə, qazanxanalara mavi yanacağın verilməsini dayandırmaq məcburiyyətində qalacağıq. Bütün bunların da məsuliyyəti qarşı tərəfin boynunda olacaq”, - deyə şöbə rəisi fikrini tamamlayıb.

---

---