Bakıda həlli görünməyən ictimai nəqliyyat PROBLEMİ - NƏ ETMƏLİ?

“İctimai nəqliyyatda həll olunması gərəkən əsas problemlərdən biri də gecikmələrdir”.

Bu fikirləri Bakıda ictimai nəqliyyatın fəaliyyətində effektivliyin artırılmasının vacibliyi haqda danışan ekspert Ərşad Hüseynov Yenicag.az-a açıqlamasında deyib.

Onun sözlərinə görə, bu sahədə işlək sistemin yaradılması üçün dövlətin nəqliyyatla bağlı xüsusi siyasətinə ehtiyac var:

“Bakı şəhərinin təqdim olunan Baş planına baxsaq, möhtəşəm mənzərə ilə qarşılaşarıq. Bakının sandığımız qədər kiçik şəhər olmadığını nəzərə almaq lazımdır. Belə olduğu təqdirdə isə nəqliyyatla bağlı problemlərin aradan qaldırılmasının asan olmayacağı üzə çıxır.

Məsələn, dünyanın seçilən şəhərlərindən olan Berlin və Londonun sahəsinə nəzər yetirsək, onlar Bakıdan daha kiçikdir. İctimai nəqliyyatın əsas problemi iqtisadi məsələlərdir. Dünya praktikasına baxsaq, heç bir şəhərdə ictimai nəqliyyatın iqtisadi gəlir əldə etmək, yaxud öz-özünü maliyyələşdirmək öhdəliyinin olmadığını görərik.

Hətta Avropada bir neçə şəhərdə gediş haqqı belə tələb olunmur. Çünki ictimai nəqliyyatın öz-özünü maliyyələşdirdiyi halda gediş haqqının əlçatan olmayacağını anlayırlar. Əlavə olaraq, Bakıda ictimai nəqliyyatda həll olunması gərəkən əsas problemlərdən biri də gecikmələrdir. Düzdür, buna səbəb tıxaclardır. Ancaq bu hal ölkə iqtisadiyyatına ciddi zərər vurur.

Hər bir çalışanın işə gecikməsi arzuedilməzdir. İctimai nəqliyyatın gecikməsi dövlətin problemidir. Zəruri investisiya ayıraraq bu problemi aradan qaldırmaq lazımdır. O halda əvvəlkindən daha çox qazanc əldə etmək mümkündür.

Həmçinin yenə dünya praktikasına nəzər yetirsək, ictimai nəqliyyatda istifadə olunan bir avtobusun gündəlik neçə reys etdiyi əsas götürülür. Yəni avtobusun dolu, yaxud boş getməsinin fərqi yoxdur. Əgər bu rəqəm artıq olarsa, reyslərin sayı azaldılır, yaxud azdırsa, çoxaldılır. Azərbaycanda isə bu göstərici avtobusların reys sayı ilə yox, daşınan sərnişinlərin sayı ilə müəyyənləşir. Bu, düzgün prinsip deyil”.

---

---