İqtisadiyyat Nazirliyi yanında Əmlak Məsələləri Dövlət Xidməti iyulun 19-21-də dövlət əmlakının özəlləşdirilməsi ilə bağlı növbəti dəfə hərrac keçirəcək.
Məlumata görə, 1-ci hərraca 16 kiçik dövlət müəssisəsi, 1 yarımçıq tikili, 39 nəqliyyat vasitəsi, 2-ci hərraca isə 3 helikopter çıxarılıb. 
Hərraca çıxarılan kiçik dövlət müəssisəsi və obyektləri iqtisadiyyatın müxtəlif sahələrinə aiddir. 
Belə müəssisələr paytaxt Bakı ilə yanaşı, bölgələrimizdə də yerləşir. Digər üstün cəhət isə əksəriyyətinin torpaq sahələri ilə birgə özəlləşdirilməyə çıxarılmasıdır. Paytaxtın Suraxanı rayonunda yerləşən 42 saylı mağaza 400 min manata satılır. Rayonun Yeni Günəşli qəsəbəsi, AB massivi, 137 ünvanında yerləşən bu obyektin ümumi faydalı sahəsi 1 664 kvadratmetrdir. 
Hərracda iştirak etmək üçün 40 min manat beh məbləği ödənilməlidir. Şəkidə yerləşən hamam xidmət sahəsi üçün əlverişlidir. Şəki şəhəri, B.Məmmədov küçəsi, 29 ünvanında yerləşən 2 saylı hamam ilkin start qiyməti ilə 17 500 manata təklif olunur. Bu əmlakı almaq üçün isə öncədən 1 750 manat beh məbləği ödənilməlidir. 
Obyektin ümumi faydalı sahəsi 151 kvadratmetr, torpaq sahəsi isə 213 kvadratmetrdir. 
Özəlləşdirilməyə çıxarılan nəqliyyat vasitələrinin əksəriyyəti Koreya və Amerika istehsalıdır. 
Avtomobillərin buraxılış tarixləri isə 2005-2013-cü illəri əhatə edir. İyulun 21-də təkrar keçiriləcək hərraca çıxarılan hər 3 helikopterin ilkin start qiyməti 2 milyon manatdır. Bunlardan 1-i buraxılış ili 2009-cu il olan “Airbus EC-135P2”, digərləri isə istehsal tarixi 2005-ci il olan “Airbus EC-155B1” markalı helikopterlərdir. 
Maraqlıdır, dövlət əmlakının özəlləşdiirlməsi ilə bağlı təşkil olunan bu hərraclar nə dərəcədə realdır və hərraca çıxarılan yüksək məbləğli əmlakları, o cümlədən helikopterləri açıq şəkildə alacaq imkanlı şəxslər varmı? 
İqtisadçı-ekspert Natiq Cəfərli Cebhe.info-ya bildirdi ki, bu hərrac dəfələlərlə, uzun illərdir ayda bir dəfə təkrarlanır və daha çox formal xarakter daşıyır:

"Obyekt sahiblərinin, yaxud kollektivinin adına özəlləşdirilir, onlara üstünlük verilir. Çox zaman da köhnə, qeyri-rəsmi sahibləri həmin obyektlərin rəsmi sahibinə çevrilir. O ki qaldı helikopterlərin satışa çıxarılmasına, bu, ilk dəfə deyil. Bundan öncə də 2 helikopter satışa çıxarılmışdı. Onların taleyinin necə olduğunu bilmirəm. 
Deyəsən, heç kim almamışdı. İndi də yəqin ki, həmin 2 helikopterdir. Azərbaycanda bunu ayrı-ayrı  şəxslərin alması mümkün deyil. Çünki bizdə avidaşımacılıqla bağlı özəl sektorun hansısa bir formada şəxsi aviaparkının olması nəzərdə tutulmayıb. Yəni qanunvericilikdə bununla bağlı boşluqlar var. Onu Azərbaycanda fəaliyyət göstərən xarici, yaxud yerli şirkətlər ala bilər. 
Məsələn, Neft Şirkəti, BP ala bilər ki, öz fəaliyyətində istifadə etsin. Ancaq ötən dəfə olmayıbsa, indi bunun reallaşacağını demək çətindir". 

---

---