Tərtərdə hərbçilərimizi zorladanlar bütövlükdə xalqın ruhunu zorlamağa çalışır...

“Vətəndaş, qazi, intiharları da imanı, iradəsi zəiflərin “KQB”-“PKK”-QRU”-korrupsiya şəbəkəsi tərəfindən yönlənidirilən bu zorlamaya cavab reaksiyasıdır...”
 
“Axı ölkənin gerçək sərvətlərini, qazancını, elə yalnız neftdən-qazdan olan gəlirlərini nəzərə alanda xalqımız bundan dəfələrlə yaxşı, gerçəkdən firavan yaşamalıdır...”
 
“Nə qədər ki, məmləkətdə insana, xüsusən də vicdanlı, ziyalı düşüncəli insana dəyər verilmir, heş bir tərəqqidən, inkişafdan söhbət gedə bilməz...”
 
-FİKİR SAVAŞI...-
 
Son onilliklərdə  məmləkətdə hər hansı bir neqativ olay, proses baş verən kimi sanki buna xüsusi hazır qruplar dərhal malalama işinə  başlayır. Axı dövlət başçısı özü də çıxışlarında deyir ki, nöqsanları, problemləri malalamaq yox, həll etmək lazımdır? Bəs niyə əksi baş verir? Ona görə ki, Azərbaycanı hər tərəfdən sarmış “KQB”-“QRU”-“PKK”-korrupsiya şəbəkəsinin sovet dövründən bəri xalqın gözünə kül üfürərək arxalarında duran imperiyaların və öz klanlarının planlarına uyğun şəkildə ölkənin yeraltı-yerüstü sərvətlərini, büdcəmizi rahatca talamaları, xalqı maksimum manqurtlaşdırıb qanını içmələri  üçün qurduğu bərli-bəzəkli, yarlı-yaraşıqlı dekorasiyanı pozmaq olmaz... 
 
“Azərbaycanda hər şey əladır. Xalqın 99,9 faizi yüksək maaş alır, kef içində dolanır. Elə bir ciddi problem yoxdur. Ərazi bütövlüyümüz bərpa olunub. İşğaldan azad ərazilərdə infrastruktur yenidən qurulur, yollar çəkilir. Artıq didərginlər arasından ilk insanlar öz yurdlarına – “ağıllı” kəndlərə qayıdır. Və s. və i.a. Ancaq ölkədə və xaricdəki bəzi yabançı ünsürlərin Azərbaycanın bu inkişafını gözü götürmədiyindən hər cüzi(!) problemdən, məsələn, bu günlərdə aktual olan qazi intiharları, yaxud “Tərtər işi” məsələsindən dövlətimizə qarşı yararlanmağa, onu ləkələməyə çalışırlar...”
 
Məhz bu sxemdən yararlanaraq haqqı deyən insanlar korrupsiya şəbəkəsi tərəfindən ləkələnir, şərlənir, həbs olunur. Bir adam, məsələn, qazilərin niyə intihar etməsi haqda mediada-filanda danışırsa, dərhal özləri həmin şəbəkəyə, “5-ci kalon”a xidmət edən filan “ziyalı”, yaxud qazandığı pullardan aradabir  özünü reklam üçün Milli Qəhrəman, şəhid ailələrinə xərcləyən mandatlılar hay qaldırır ki, bunlar “5-ci kalon”a xidmət edir, ölkənin inkişafını gözləri götürmür və s. və i.a.
 
Bu müdafiə sxemləri artıq hər kəsə bəllidir... Və hansısa məclisdə, rəsmi və ya qeyri-rəsmi tədbirdə imkan tapan kimi bundan mütəmadi istifadə edən məddahlar, yalançılar maddi cəhətdən gündən-günə yüksəlir, varlanır, hallanır, vəzifələrə irəli çəkilir, məşhurlaşır. Gerçəyi deyənlər, dövlət və hökumət qurumlarını haqlı, obyektiv tənqid edənlər isə əksinə, mənəvi cəhətdən Allahın, xalqın gözündə yüksəlsə də, “qara siyahı”ya salınır,  “pozucu ünsür”, “filan ölkənin agenti” və s. adlanır, maddi, sosial cəhətdən gündən-günə 40 arşın quyunun dibinə yuvarlanır... Hətta bir az da dərinə getsə, müxtəlif yollarla başı əkilir, ən yaxşı variantda şərlənərək tutulur... Və nə qədər ki, dediyimiz şəbəkə mövcuddur və biz öz düşüncə, niyyət və əməllərimizlə onun möhkəmlənməsinə xidmət edirik, heç nə dəyişməyəcək, belə də davam edəcək, hətta bundan da pis olacaq... 
 
On illərdir deyirik ki, Azərbaycanda zahiri, kosmetik inkişaf daha çoxdur, nəinki mahiyyətcə, məzmunca inkişaf... İlk baxışdan çağdaş dünyanın durumunu seyr edəndə deyirsən ki, şükür Allaha, 10-dan pis yaşayırıqsa, 5-dən də yaxşı dolanırıq... Şükürlər olsun, artıq işğaldan azad torpaqlarımızda quruculuq işləri gedir, yollar çəkilir, hava limanları tikilir, didərginlər yavaş-yavaş torpaqlarına - dövlət tərəfindən tikilmiş “ağıllı” kəndlərə qayıdır...
 
 Lakin axı ölkənin gerçək sərvətlərini, qazancını, elə yalnız neftdən-qazdan olan gəlirlərini nəzərə alanda xalqımız bundan dəfələrlə yaxşı, gerçəkdən firavan yaşamalıdır... Və o, buna layiqdir... Nə yazıqlar ki, hələ sovet dövründən bəri “KQB”-“QRU”-“PKK” -korrupsiya şəbəkəsi Azərbaycan xalqını əks mənada dolandırmaqla, yəni barmağına dolamaqla məşğuldur... 
 
Prezident də son çıxışında “Mənim hər şeydən xəbərim var” deyərək etiraf etdi ki, ölkədə kölgə iqtisadiyyatı mövcuddur... Və bu da büdcədən yayınmalara gətirib çıxarır... Bəli, var, özü də yüksək səviyyədə... Hər iki mənada yüksək səviyyədə... Bu, on illərdir ki, qiymətlərin, demək olar ki, hər il fasiləsiz artmasında və pensiya və maaşların isə qeyri-adekvat artımında da özünü büruzə verir. Kim bunu təkzib etmək istəyirsə, gəlsin bu sətirlərin sahibinin yerinə bircə ay ailəsi ilə birgə yataqxanın darısqal otağına sığınsın və yalnız oliqarxların, zərgərlilərin, röyaların, pərvinlərin təkbaşına bir günlük restoran xərclərini belə, ödəyə bilməyən maaş və qonorar hesabına dolanmağa çalışsın... 
 
Bəs bu kölgə iqtisadiyyatını kim fırladır, kim idarə edir, kim gerçək iqtisadiyyatın əksər sahələrini, hətta kartof, banan, saqqız satışını da inhisara alır? Elə həmin “KQB”-“PKK” -korrupsiya şəbəkəsinin ali(!) nümayəndələri... 
 
Məmləkətdə insanları öncə ruhi-mənəvi, sonra fiziki baxımdan yandıran bütün mənfilikləri formalaşdıran məhz bu iyrənc şəbəkədir. 2017-ci ildə Tərtərdə hərbçilərimizi, mülki kişi və qadınlarımızı zorladanlar bununla həm də bütövlükdə xalqın milli-mənəvi dəyərlərini məhv etməyə, onun ruhunu zorlamağa çalışırlar. Vətəndaş, qazi, itiharları da imanı, iradəsi zəiflərin “KQB”-“PKK”-QRU”-korrupsiya şəbəkəsi tərəfindən yönlənidirilən bu zorlamaya cavab reaksiyasıdır. Bəs həmin neqativ amillər əsasən hansılardır?
 
-Birincisi, öncə xatırlatdığımız subyektiv səbəblərdən formalaşan iqtisadi-sosial çətinliklər. Əksəriyyət gözəl anlayır ki, cəmi 10 milyonluq, ancaq yetərincə yeraltı-yerüstü sərvətlərə malik bir ölkədə bu dərəcədə bahalıq və yoxsulluq olmamalıdır. Artıq dağdakı çoban da bu çətinliklərin əsas səbəbinin ölkədəki talançılıq, korrupsiya, rüşvətxorluq və inhisarçılığın olduğunu gözəl başa düşür... “Dünyanın hər yerində qiymət artımı, inflyasiya var” deyənlərə isə cavab veririk ki, Azərbaycanı sivil ölkələrlə müqayisə etmək istəyirsinizsə,  bir  daha xatırladırıq ki, həmin ölkələrdəki bahalıq müqabilində maaşlar, pensiyalar da yetərincə yüksəkdir və adətən inflyasiyaya uyğun qaldırılır. İkincisi və bəlkə də ən əsası da, ABŞ-da, Almaniyada, Britaniyada, Yaponiyada və s. Azərbaycandan fərqli olaraq qanunlar-qaydalar ən azı 80-90 faiz işlədiyindən insanlar, vətəndaşlar öz zəhmətləri, bilik, istedad, qabiliyyətləri hesabına ağırlaşa bilən durumlarını tezliklə düzəltməyə imkan tapırlar...
 
Digər tərəfdən, kimsə yenə deyə bilər ki, ölkənin kəndlərində də tənbəllik etməyənlər  taxıl, pambıq, soğan əkir,  mal-qara, qoyun-keçi saxlayır -dolanır. Düzdü, belə dolananlar da xeylidir. Amma hansı zülm-əziyyətlə? Eyni zamanda lap kiçik və orta sahibkarlar dolansa da, söhbət yalnız maddi cəhətdən yaşamaqdan getmir. Məsələ ondadır ki, məmləkətdə nəinki yoxsulların, orta, bəzən hətta yüksək səviyyəli sahibkarların, imkanlı insanların, vətəndaşların da haqqı tapdanır. Buna çoxsaylı misallar gətirmək olar. Elə gömrük xidmətinin bircə mobil telefon üstündə, yaxud Almaniya zibilxanalarından gətirilən “Mersedes”ə görə vətəndaşların dərisini necə soyduğunu misal göstərmək olar... Deməli, söhbət insana, vətəndaşa dəyər verilməsindən, onun hüququnun qorunmasından gedir. Eybi yox, öz zəhmətim hesabına tikdiyim sadə bir daxmada yaşayım, amma bir insan, vətəndaş kimi dəyərim, hüququm olsun, azad, sərbəst yaşayım... 
 
*** ***
 
Son günlər məddahlar daha bir müdafiə sistemi tapıblar. Sosial şəbəkələr də xəbər çıxır ki, filan rayonda filan qazi kasıbçılıqdan intihar etdi. Araşdırmalardan sonra bəlli olur ki, o, qazi deyilmiş. Nəticədə həmin məddahlar sevincək şivən qoparırlar ki, görürsüz, yalandı – intihar edən qazi deyilmiş... Qəribə məntiqdir. Məgər qazi olmayan adi bir vətəndaş insan deyil, onun haqqı, hüququ qorunmamalıdır. Onun intiharının səbəbləri araşdırmamalıdır. Bir sözlə, nə qədər ki, məmləkətdə insana, xüsusən də vicdanlı, ziyalı düşüncəli insana dəyər verilmir, heş bir tərəqqidən, inkişafdan söhbət gedə bilməz... Və ifrat haqsızlıq qiyamətədək davam edəcək...
 
İkincisi, ən savadsız, sadədil vətəndaş da aydın görür ki, onun bu gün normal, adam kimi dolana bilməməsinə əsas səbəb məmləkətdəki ifrat sosial ədalətsizlikdir. Yəni əhalinin 1-2 faizi talançılıq, vergilərdən, gömrükdən, kommunal xərclərdən yayınma, rüşvət, korrupsiya və s. hesabına ifrat dərəcədə varlanır, 15-20 faizi həmin ali talançı və rüşvətxorların qurduğu mexanizmə canla-başla xidmət göstərərək manıslıq, mütrüflük, təlxəklik, “şestyorka”lıq, işverənlik və s. edərək özləri də onların kölgəsində onlara nisbətdə orta səviiyyədə varlanıb dolanır. Və bütün bunların nəticəsində də xalqın əksər hissəsi maddi çətinlik içində çabalayır... Fəqət, elə həmin əksəriyyətin əksəriyyəti də “nəyimə lazım – hamı necə, mən də elə” , yaxud vəzifədəki və ya deputat olan qohumunu, keçmiş dostunu nəzərdə tutaraq “əşşi, dinməyin, filankəsdən ayıbdır, bizə görə onu da işdən çıxararlar” deyərək beləcə maddi cəhətdən sürünə-sürünə həyatlarını başa vururlar...
 
Üçüncüsü, yoxsul, ehtiyaclı insanları, xüsusilə də vicdanlı, namuslu ziyalı təbəqəni, həmçinin I və II Qarabağ savaşı qazilərini daha çox sarsıdan ruhu, mənəviyyatı, əməli ilə anti-milli olduğu aşkar bilinən, Azərbaycanın dini, milli-mənəvi dəyərlərini açıq-açığına həyasızcasına tapdayan ünsürlər və onlara yüksək səviyyədə meydan verilməsidir... Məsələn, geyim, yaşam, əxlaq tərzi ilə anti-milliliyi göz önündə olan Aygün Kazımova, Röya kimilərinə “xalq artisti” adı verilir. Demək olar ki, gündə onların, nə bilim, on minlik alt geyimi, yüz minlik üst geyimi, neçə milyonluq villaları nümayiş olunur. Yaxud Roza Zərgərli kimisi deyir ki, günə 600-700 manat qazanıram, sonra da dövlət onun yetimxanadan götürdüyü ingilisləşmiş Con oğluna ev verir. Bu yanda isə hələ ziyalıları, alimləri, müəllimləri, jurnalistləri demirəm, Vətən, Qarabağ, dövlət, bayraq uğrunda canını-qanını vermiş şəhidlərin ailələri, veteranlar, qazilər, əlil döyüşçülərin xeylisi adi gündəlik dolanışıqdan, müalicədən-filandan ötrü nazirliklərin, icra hakimiyyətlərinin qapılarında günlərlə, aylarla sürünür, sonda isə bəziləri dözməyərək canına qıyır, intihar edir...
 
Hansı bir rəhbər məmur dediyimin əksi olaraq sübut etmək istəyir ki, yox, Aygün Kazımovalar, Röyalar, Roza Zərgərlilər, Pərvinlərin və s. əxlaq və həyat tərzi Azərbaycanın milli-mənəvi dəyərlərinə uyğundur və onlara fəxri adları qazancları halaldır, qazilər, əsl ziyalılar dövlət, xalq üçün onlardan dəyərsizdir  – buyursunlar, çıxaq debata...
 
Dördüncüsü, həmin “KQB”-“QRU”-“PKK”-korrupsiya şəbəkəsi öz dayaqlarından yararlanaraq hüquq-mühafizə, məhkəmə sistemindəki bir sıra rüşvətə meyilli vəzifəliləri öz cinayətlərini ört-basdır etmək üçün alətə çevirməyə çalışır. Nəticədə də ölkəni çapıb-talayanların cinayətləri ört-basdır edilir və onlar daha da irəli çəkilir, mükafatlandırılır, gerçəyi deyənlər isə şərlənərək tamamilə haqsız və qanunsuz şəkildə zindanlara atılır...  Məsələn,  5 ildən çoxdur istintaqı aparılan, ötən ilin sonunda yenilənən, lakin hələ də əsas təşkilatçı, icraçı və günahkarları bayırda vəzifələrdə kef edən Tərtər işgəncələri ilə bağlı işi götürək. Dediyim kimi, əsas təşkilatçı, icraçılar kefdə-damaqda... İllərlə xalqın, ordumuzun məhvinə, alçaldılmasına yönəldilmiş bu faciənin ictimai istintaqını aparanlar isə müxtəlif yollarla şərlənərək həbsə atılır... Halbuki, bu faciənin rəsmən açılması və onun günahkarlarının qanun, məhkəmə qarşısında mühakimə edilməsi xalqın, ordunun, dövlətin ən taleyüklü məsələsidir. Bütün təhlillər, araşdırmalar göstərir ki, Tərtər qətliamı  xarici xüsusi xidmət orqanlarının, çox güman ki, Rusiya və Ermənistan kəşfiyyatının sifarişi və həm də onların dövlətimizə, ordumuza yerləşdirdiyi agentlərinin, yəni elə həmin “KQB”-“QRU”-“PKK”-korrupsiya şəbəkəsi bir sıra cinayətlərini ört-basdır etmək üçün elə bu şəbəkənin əli ilə  törədilib. Yüzlərlə, minlərlə nəinki hərbçi, üstəlik, onların ailələri, doğmaları işgəncələrə, təhqirlərə məruz qalıb. Və bütün bu cinayəti ört-basdır etmək istəyən də eyni şəbəkədir... Deməli, məntiqlə Tərtər  qətliamına cınqırını çıxarmayanlar, onun təşkilatçı və icraçılarını müdafiə edən, onları mediada təbliğ etdirən və edənlər də yenə həmin “KQB”-“QRU”-“PKK”-korrupsiya şəbəkəsinə, başqa sözlə Rusiya imperiyasına, Moskvaya xidmət edir...
 
Beşincisi, elə həmin şəbəkə tərəfindən Azərbaycan mediasında elə şərait yaradılır ki, 1998-ci ildən bəri rəsmən ləğv edilmiş senzura faktiki olaraq daha kəskin şəkildə fəaliyyət göstərir. Vay o haldan ki, hansısa yüksək vəzifəli məmur hər hansı saytda, qəzetdə, kanalda tənqid edilsin,  vətəndaşların onun rəhbəri olduğu sahəyə aid şikayətləri işıqlandırılsın. Dərhal görürsən, onun özü, yaxud başqa bir yüksək vəzifəli məmir tərəfindən həmin media qurumu rəhbərinə necə təzyiq edilirsə, artıq o ehtiyatlanaraq bir daha həmin məmurun adını çəkmir. Məhz bu səbəbdən haqqı tapdanan, o cümlədən vətəndaş sözünü, dərdini deyə bilmir, yalnız sosial şəbəkələrə və “qara siyahı”ya salınmış, düşmən elan edilmiş bir neçə internet kanalına müraciət etməli olur ki, bu da ciddi effekt vermir və hətta əksinə, həmin vətəndaşın özünün də qaralanmasına səbəb olur...
 
Başa düşmək olmur;  2011-ci ildən korrupsiyaya qarşı mübarizə elan etmiş dövlət başçısı illərdir ki, dəfələrlə öz çıxışlarında vətəndaşlara müraciət edir ki, korrupsiyaya, məmur özbaşınalığına qarşı mübarizədə fəal olun, bizə dəstək verin, amma haqqını tələb edənlər gözümçıxdıya salınır, təqib olunur, ən yaxşı halda “psixi xəstə” adlandırılır?..
 
*** ***
 
İnsanları, o cümlədən qaziləri intiharlara sürükləyən mənfi amilləri sadalamaqla bitmir...
 
Bəs çıxış yolu nədədir? Həmin mənfilikləri necə aradan qaldırmaq olar? Əvvəla, heç bir halda intiharlara haqq qazandırmaq olmaz. Bu, imansızların, acizlərin yoludur... Dinimiz də, milli dəyərlərimiz də insanın öz həyatına, sağlamlığına qəsd etməsinə qadağa qoyur... Ən son imkanadəki mübarizə aparmaq gərəkdir... 
 
Və öncə dediyim kimi, bayaqdan barəsində danışdığımız “KQB”-QRU”-“PKK”- korrupsiya şəbəkəsi məhv edilməyincə, onun başçıları cəzalandırılmayınca məmləkətdə haqsızlıq, ədalətsizlik meydan sulayacaq... Həmin şəbəkənin varlığı isə bir Allah bəndəsi, insan, vətəndaş olaraq hər birimizin nəfsinə, sözünə və əməlinə bağlıdır. Bu şəbəkə dinc etiraz mitinqlərinə də maksimum imkan verməyəcək.  Hətta kütləvi aksiyaları öz hazırlanmış agentləri vasitəsilə radikal siyasi, yaxud dini-ekstremist zəmində iğtişaşlara çevirərək ölkəni xaosa da sürükləyə bilərlər. Odur ki, öncələr də dediyim kimi, ən optimal yol hər kəs öz haqqını, öz hüququnu piket, mitinqlərdə yox, gündəlik həyatda, işdə tələb etməli, məhz özü, rüşvətdən, yalandan, saxtakarlıqdan, dələduzluqdan və s. mümkün qədər uzaq durmalıdır. Yəni hər kəs ölkədə, cəmiyyətdə müsbət dəyişiklik - rüşvətin, korrupsiyanın, məmur özbaşınalığının, sosial ədalətsizliyin aradan qaldırılmasını istəyirsə, öncə özündən başlamalı, özünü dəyişməlidir... Yalnız bu halda bəhs edilən şəbəkə qısa müddətə çökə bilər... Əks halda işimiz qalıb Allaha. Bəlkə Ukraynada Rusiya hərbi və siyasi cəhətdən məğlub ola və sonra Moskvada yalnız Putin rejimi yox, bütövlükdə sistem dəyişə, demokratik bir hakimiyyət qurula və bundan sonra  bizdəki şəbəkənin xaricdəki əsas dayaqları sarsıla...   
 
Hələlik isə hər kəs fədakarlıq göstərərək hər addımda haqqını-hüququnu qorumağa çalışmalı və ən əsası, öz nəfsinə KQB-“QRU”-“PKK”-korrupsiya şəbəkəsinin xeyrinə olacaq, ona qazanc, enerji verəcək işlər görməyə imkan verməməlidir...
 
Bu şəbəkə isə hələlik təmiz, vicdanlı insanların üzərinə gəlməkdə davam edəcək...
 
Gəlin, gəlin haqq sözü deyənlərin hamısını yenə tutun, şərləyin. 30 ildən çoxdur işğalçı, terrorçu hayların vasitəsi ilə doğma torpağından, yurdundan didərgin saldığınız, yataqxanada ata olan, baba olanların da özünü, övladlarını, doğmalarını şərləyin, tutun. Axtarın, arayın, şərləmək üçün bir “qulp” taparsınız... Bu, sizə böyük şərəf gətirəcək və bununla “Azərbaycan dövlətçiliyinin inkişafına, xalqın rifahının yüksəldilməsinə böyük töhfə verəcəksiniz”... 
 
Gəlin, gəlin, haqqı, gerçəyi hakimiyyət, vəzifə, pul, ev xatirinə yox, yalnız Allah rizası üçün deyən yoxsul, evsiz bəndələrin üstünə, onları da əzin, tapdayın. Məhz bu halda özünüzü tam ifşa edəcəksiniz və sizlərin – yəni Azərbaycan xalqının, dövlətinin əsl  düşmənlərinin kimliyi bizim və xalqımız üçün dəqiq bəlli olacaq...
 
Sultan Laçın

---

---