NATO təyyarəsi Polşaya düşən raketin trayektoriyasını izləyib

F-35 döyüş təyyarəsi

Şimali Atlantika Alyansının təyyarəsi Polşa ərazisinə düşən raketin trayektoriyasını izləyə bilib.

Bizimyol.info xəbər verir ki, bu barədə çərşənbə axşamı "CNN" telekanalı məlumat yayıb.
"Raketin kursu ilə bağlı kəşfiyyat məlumatları NATO və Polşaya təqdim edilib", - telekanal alyans nümayəndəsinə istinadən məlumat verib. Lakin NATO nümayəndəsi raketin buraxılış yeri barədə məlumat verməyib.
Onun sözlərinə görə, raketi izləyən təyyarə çərşənbə axşamı Ukrayna ərazisi ətrafında müntəzəm kəşfiyyat uçuşu həyata keçirib və Polşa ərazisi üzərində uçub.
Bundan əvvəl Polşa Xarici İşlər Nazirliyi çərşənbə axşamı ölkənin şərqindəki Pşevoduv kəndi ərazisinə Rusiya istehsalı olan raketin düşməsi nəticəsində iki nəfərin həlak olması ilə bağlı bəyanat yayıb.
Eyni zamanda, respublika prezidenti Anjey Dudanın sözlərinə görə, sursatın dəqiq mülkiyyəti hələ müəyyən edilməyib.
Öz növbəsində ABŞ prezidenti Co Bayden qeyd edib ki, Polşaya düşən raketin Rusiyadan atıldığı barədə iddiaları təkzib edən ilkin məlumatlar var. Amerika liderinin sözlərinə görə, trayektoriya nöqteyi-nəzərindən onun Rusiyadan buraxılması ehtimalı azdır.
Rusiya Müdafiə Nazirliyi Ukrayna-Polşa sərhədi yaxınlığındakı hədəflərə Rusiya silahlarından heç bir zərbə endirilmədiyini bildirib. Departamentdə vurğulandığı kimi, Polşa mediasının hadisə yerindən yaydığı qalıqların fotoşəkillərinin Rusiya silahları ilə heç bir əlaqəsi yoxdur.

---

---