Amerika Konqresinin Nümayəndələr Palatasının üç üzvü İlon Maskın həmtəsisçisi və rəhbəri olduğu “SpaceX” şirkəti ilə bağlı araşdırmaya başlamaq zərurətini açıqlayıb.
Yeniavaz.com xəbər verir ki, belə çağırışlar ABŞ-də “SpaceX” obyektlərində çoxlu sayda işlə bağlı xəsarətlər barədə məlumat verən “Reuters”in araşdırmasından sonra edilib.
Agentliyin məlumatına görə, 2014-cü ildən indiyədək tikinti sahəsində, montaj zavodlarında və “SpaceX”in digər obyektlərində ümumilikdə 600-ə yaxın işçi xəsarət alıb və insidentlərdən biri işçinin aldığı xəsarətlərdən ölümü ilə nəticələnib.
Jurnalistlərin danışdıqları şirkət əməkdaşları bildirirlər ki, nəticələrə nail olmaq üçün “SpaceX” zəif təhlükəsizlik standartlarına malikdir. Qeyd edilib ki, onlarla insan müxtəlif bədən xəsarətləri alıblar.
“Reuters” araşdırmasının dərcindən sonra ABŞ Nümayəndələr Palatasının Kaliforniya və Nyu Cersi kimi ştatları təmsil edən üç Demokrat üzvü bu məlumatların ciddi narahatlıq doğurduğunu söyləyib.
Nümayəndələr Palatasının Təhsil və Əmək Bazarı Komitəsinin üzvü, Kaliforniyalı Konqresmen Mark Takano qeyd edib ki, “SpaceX” obyektlərində (təhlükəsizlik) pozuntular qəbuledilməzdir.
