Aİ Ukraynaya 20 milyard avro verilməsi üçün ehtiyat planı müzakirə edir - Media

Avropa İttifaqı, Avropa Birliyi

Avropa İttifaqı (Aİ) Ukraynaya 20 milyard avro məbləğində maliyyə yardımı göstərmək üçün ehtiyat plan hazırlayır.

Bizimyol.info xəbər verir ki, bu barədə çərşənbə axşamı "Financial Times" öz mənbələrinə istinadən məlumat yayıb.
Məqalədə qeyd olunduğu kimi, Macarıstanın Baş naziri Viktor Orbanın dekabrın ortalarında Aİ-nin sonuncu sammitində 2024-cü ildə Ukraynaya 50 milyard avro ayrılmasını nəzərdə tutan icma büdcəsinə düzəlişin qarşısını alması, yeni maliyyə imkanlarının axtarışına səbəb olub.
Müzakirə olunan yeni sxem, Aİ üzvlərinin təşkilatın büdcəsinə maliyyə zəmanəti verməsini nəzərdə tutur ki, bu da Avropa Komissiyasına (AK) Kiyev üçün kapital bazarlarından 20 milyard avro borc almağa imkan verəcək.
Məqalədə deyilir ki, bu sxem 2020-ci ildə, AK-nin pandemiya zamanı iş yerlərini dəstəkləmək üçün üzv ölkələrə 100 milyard avro ucuz kredit verdiyi zaman istifadə edilənə bənzəyir. Maliyyələşdirmənin yekun məbləğinin Ukraynanın ehtiyaclarından asılı olacağı vurğulanır.
Məqalədə deyilir ki, bu sxemin əsas üstünlüyü ondan ibarətdir ki, o, Aİ-nin bütün üzvlərinin razılığını tələb etmir və buna görə də Budapeştdən yeni veto riskini aradan qaldırır. Bununla belə, "Financial Times" qeyd edir ki, Almaniya və Hollandiya kimi bəzi ölkələrin bu cür zəmanətlər vermək üçün parlamentin təsdiqinə ehtiyacı olacaq. Nəşr qeyd edir ki, bu planla bağlı qərar fevralın 1-də keçiriləcək sammitdə verilə bilər və Brüssel ümid edir ki, vəsait 2024-cü ilin martına qədər Kiyevə çatmalıdır.
Qəzetin həmsöhbətləri bildiriblər ki, bu sxem qəbul olunarsa, Aİ Beynəlxalq Valyuta Fonduna zəmanət verə biləcək, o da öz növbəsində Kiyevə 900 milyon dollar yeni maliyyə vəsaiti ayıracaq. Məqalədə deyilir ki, bu, Ukrayna hakimiyyətinə inflyasiyanın artımı təhlükəsi yaradan emissiyanın maliyyələşdirilməsinə əl atmamağa imkan verə bilər. Bu planın mənfi tərəfi ondan ibarətdir ki, vəsaitlərin ayrılması qrantlar deyil, yalnız kreditlər şəklində mümkün olacaq.

---

---