Məcnun Məmmədovun işçisi Salyanda `PAMBIQLA BAŞ KƏSİR`... - NARAZILIQ VAR...


“2017-ci ildə adıma olan 4 hektar yarım torpağı 3 il müddətinə 5500 manat qarşılığında icarəyə verdim. Daha sonra torpağımı tələb edəndə isə onun artıq mənim adıma olmadığını öyrəndim. İllərdir müraciət etmədiyim yer qalmayıb. Amma torpaqlarımı geri ala bilmirəm”.

Bu şikayətlə “Qafqazinfo”ya Salyan rayon Sarvan kənd sakini Mirsəhhət Sadıqov müraciət edib.

Rayonun Şorsulu kənd Pambıq məntəqəsinin direktoru Mərdan Cəlilovdan şikayətçi olan vətəndaş iddia edir ki, bu şəxs onları aldadaraq torpaqları ələ keçirir: “Mərdan 2014-cü ildə birdən-birə varlandı. Başladı camaata borca pul verməyə. Qarşılığında da kənd camaatının torpaqlarını icarəyə götürürdü. Mən də ehtiyac olduğu üçün 2017-ci ildə üz tutdum Mərdanın yanına. Onunla 3 illik müqavilə bağlayıb 5500 manat pul qarşılığında torpaqlarımı icarəyə verdim. Müqavilənin müddəti tamam olanda verdiyi borcu düzəldib yenidən yanına getdim.

Pulu verib torpağımı istəyəndə isə mənə dedi ki, “Nə torpaq? O torpaq mənim adımadır”. Elə hər şey bundan sonra başladı. Məlum oldu ki, mən nə ilkəm, nə də son... Kənddə nə qədər insanı belə aldadıb torpaqlarını alıb. Biz imzanı ağ vərəqə çəkmişik, kəndin adamıdır, haradan bilərdik ki, başımıza bu işi gətirər?! Biz söhbəti ancaq Mərdanla etmişik. Amma özü elə düz-qoş edib ki, guya onun qardaşına etibarnamə vermişik, qardaşı da torpaqları Mərdana bağışlayıb”.

M.Sadıqovun sözlərinə görə, baş verənlərdən sonra aidiyyəti qurumlara müraciət etməyə başlayıb. Lakin 7 il keçməsinə baxmayaraq, hələ də nəticə əldə edə bilməyib: “İcradan da bu adama dəstək olurlar, ona haqq verirlər. Bizim şikayətlərə baxan yoxdur. Salyan Rayon Məhkəməsinə şikayət verdim və Mərdanın xeyrinə qərar verildi. Bundan sonra Şirvan Apellyasiya Məhkəməsinə şikayət verdim. Bu dəfə mənim xeyrimə qərar verildi. Mərdan Cəlilov bu qərara əsasən Ali Məhkəməyə kassasiya şikayəti verdi. Bu zaman iş təzədən geri qaytarıldı ki, yenidən baxılsın. Yenə də Şirvan Apellyasiya Məhkəməsində iş mənim xeyrimə nəticələndi. Bundan sonra Mərdan yenə eyni cür müraciət etdi. Bu dəfə Ali Məhkəmədən iş Şirvan Məhkəməsinə gələndə mənim xeyrimə qərar verilən iş ləğv edildi. Bu, özü də bir müəmmadır. Biz kənd camaatıyıq, çörəyimiz bu torpaqlardan çıxırdı. İndi onlar da əlimizdən gedib. Bütün ailənin ümid yeri o torpaqlardır”.

Məsələ ilə bağlı Salyanın Sarvan kənd icra nümayəndəsi Təbriz İsmayılovla əlaqə saxladıq. O məsələni belə şərh etdi: “Hadisə ilə bağlı məlumatım var. Hazırda o iş məhkəmədədir. Mərdan Cəlilov o torpaqları rəsmi sənədlə alıb. Onlar arasında danışıqlar necə olub, bilmirəm. Çünki hadisə zamanı orada olmamışam. Amma rəsmi sənədləri olduğu üçün bu gün Mərdan haqlı çıxır. Onlar necə danışıb, necə razılaşıblar? Artıq özləri bilir”.

Vətəndaşların iddialarına cavab almaq üçün ittiham edilən sahibkar Mərdan Cəlilovun də mövqeyini öyrəndik: “Bu məsələ məhkəməyə də verilib, dəfələrlə hüquq-mühafizə orqanlarına da müraciət edilib və yoxlanılıb. Bütün bunlar dövlət idarəsində, notariusda olub. Ailəlikcə hamısı da iştirak edib. Bir-bir onlardan soruşulub ki, “Torpağı satırsan?” Onlar da razılaşıblar. Burada kimisə aldatmaq mümkün deyil. İndi bu insanlar mənə şər-böhtan atırlar”.
Tarix: 18-07-2024, 12:14
Xəbəri paylaş



Xəbər lenti

Gündəm

Əyalət

Siyasət

Cəmiyyət

Hadisə

Şou biznes

Sosial

İdman