Bakıda yolu bağlamaqda ittiham olunan TIR şirkəti ilə Rəqəmsal İnkişaf və Nəqliyyat Nazirliyi arasında çəkişmə davam edir

Bir müddət öncə, Bakıda yolu bağlamaqda ittiham olunan TIR şirkəti və Rəqəmsal İnkişaf və Nəqliyyat Nazirliyi arasında çəkişmə davam edir.
 
Pravda.az-ın xəbərinə görə, növbəti proses Bakı Apellyasiya Məhkəməsinin hakimi Mehriban Qarayevanın sədrliyi ilə keçiriləcək.
 
İşin mahiyyəti inzibati orqanların aktları və hərəkətləri (hərəkətsizliyi) ilə əlaqədar mübahisələrdir.
 
Qeyd: 2022-ci ilin fevralın 17-i səhər saatlarında rəhbəri Rəmiş Cəfərov olan "R Group Azerbaijan" şirkətinin sürücüləri Heydər Əliyev prospektində yolu bağlayıblar. Nəticədə saatlarla süni tıxac yaranıb. Hadisə ilə bağlı Rəmiş Cəfərov, Mirələm Məmmədov, Bəxtiyar Məmmədov və Elvin Məlikov polis əməkdaşları tərəfindən saxlanılıblar. Faktla bağlı Nərimanov Rayon Polis İdarəsinin istintaq şöbəsində Cinayət Məcəlləsinin 233-cü (İctimai qaydanın pozulmasına səbəb olan hərəkətləri təşkil etmə və ya bu cür hərəkətlərdə fəal iştirak etmə) maddəsi ilə cinayət işi başlanılıb. Məhkəmənin qərarı ilə Rəmiş Cəfərovun barəsində 2 aylıq həbs qətimkan tədbiri qərarı çıxarılıb. Digər şəxslər isə 30 sutka həbs olunublar. Daha sonra Rəmiş Cəfərovun Belarus vətəndaşı Yuriy Qnoyanikə məxsus 37 min ABŞ dollarından çox dəyəri olan yükü ələ keçirdiyi, Anar İsgəndərov, Elman Əkbərov, İftixar Mehdiyev və Əlikram Məmmədov adlı vətəndaşlara məxsus ümumilikdə 68 min ABŞ dolları dəyərində mal və məhsulların daşınmasında onlara maddi ziyan vurduğu üzə çıxıb. Habelə analoji qanunazidd hərəkətləri ilə bağlı Alim Hüseynovun da şikayətçi olduğu məlum olub.

---

---