Mətanət Əsgərqızından prezidentə MÜRACİƏT: "Yaltaqlar sizi aldadır!"

Əsgər Ailələrinə Dəstək İctimai Birliyinin sədri Mətanət Əsgərqızı rezidenti İlham Əliyevə benzinin bahalaşması ilə bağlı müraciət ünvanlayıb.

Siam.az AFN-ə istinadən həmin müraciəti zəruri redaktələrlə təqdim edir:

Hörmətli cənab İlham Əliyev!

Siz bilirsiz ki, xalqımız kritik anlarda vaxtilə ulu öndər Heydər Əliyevin, daha sonralar hər prezident seçkisində Sizin yanınızda oldu. Prezidentimiz deyib, ətrafınızda sıx birləşdik. Lakin cənab İlham Əliyev, xəbəriniz varmı xalqımız necə yaşayır? Haqları, hüquqları necə pozulur? Dəniz bizim deyil. Kürü bizim deyil. İstirahət məkanlarında dincəlmək bizlik deyil. Maaşlarımız çox aşağı, müalicə haqlarımız sıfıra bərabər, şəhid, əlil və müharibə veteranlarına hər addımda hörmətsizlik. Bu siyahını uzada bilərəm. Müharibəyə cəlb olunmuş ölkənin hər bir vətəndaşının əhvalı, dolanışığı yüksək olmalıdı ki, o düşmənə qalib gəlsin. Bank borcunda məhv olan insanlar tez-tez baş verən qiymət artımları fonunda ancaq özlərini, ailələrini düşünməyə başlayıblar. Və ən qorxunc olan "hər şey cəhənnəmə olsun" ifadələrini insanlar daha çox işlətməyə başlayıblar. Niyə? Çünki insanlar madiyyatla sınağa çəkiliblər. Bu çox təhlükəlidir.
Hörmətli cənab İlham Əliyev! Bilirəm, sizə "millət əla yaşayır" arayışlarını tez-tez verirlər. Sabun köpüyündən ibarət siyahılar təqdim olunur. Çünki toxun acdan xəbəri yoxdur. Nəhayət, insanlarımızın həyat səviyyəsinin yüksəldilməsi üçün addımların atılması gərəkli deyilmi? Neft ölkəsində qaz və benzinin qiymətinin belə yüksək olması nə qədər doğrudur?
Mən həyət evində yaşayıram. Qazın qiymətinin artmasından sonra limit qoyuldu, 1800 kub, bilirsizmi belə evlərdə yaşayanlara iki aya kifayət edir. Bəs sonra? Aldığımız maaş ançaq kommunal xərclərə kifayət edir. Son benzin artımı ölkədə hər şeyin 50% artması deməkdir. Vətəndaşlar belə dönəmə girməyə hazırdılarmı? Əmrlər, qərarlar, sərəncamlar imzalanarkən ilk olaraq bunlara diqqət yönəldilməlidir. Əks halda, bu millətin dözümünün əbədi olacağına heç kim əmin olmasın. İnanıram ki, nəhayət çoxsaylı problemlər içərisində inləyən vətəndaşlarımızın həyat səviyyəsini yüksəldilməsi üçün addımlar atılacaq.
Dəyərli Prezidentimiz, bu müraciət bilirəm, birmənalı qarşılanmayacaq.Yaltaqlar, qorxaqlar hərəsi bir söz deyəcək. Amma dürüst və sədaqətli insanlar sözün düzünü deməlidilər. Mən də sizə hörməti və sevgisi olan bir Azərbaycan vətəndaşı kimi fikirlərimi bölüşdüm. Mən sizə güvənirəm, çünki bilirəm ki, xalqımızın yaşayışının hər zaman yüksək olmasını istəyən bir dövlət rəhbərisiz. Bir daha inanıram ki, vəziyyətin düzəlməsi üçün addımlar atılacaq. Çünki nicatımız birlikdədir".



Siam.az

---

---