"Bu gün Baş Dövlət Yol Polis İdarəsinin sürücülərə yol hərəkəti qaydalarına riayət etmələri barədə xəbərdarlığını oxudum. İlk baxışdan çox yaxşı müraciətdir və məqsəd vətəndaşların təhlükəsizlik hərəkətini təmin etməyə yönəlib. Ən vacib məqam da vətəndaş cəmiyyəti institutları, o cümlədən kütləvi informasiya vasitələri nümayəndələrinin vətəndaşların maariflənməsi üçün əməkdaşlığa çağrılmasıdır. Amma və lakin. Bu müraciət o vaxt səmimi qəbul edilər ki, birinci növbədə DYP əməkdaşları özləri qanuna riayət etsinlər və anlasınlar ki, onların bir nömrəli vəzifələri vətəndaşların təhlükəsizliyini, rahatlığını təmin etməkdir. Çalışmalıdırlar, elə şərait yaratsınlar ki, vətəndaşlar qaydaları pozmasınlar, şəhərdə yaranan tıxacların sayı azalsın. Reallıqda isə tam əksi baş verir".
 
Pravda.az-ın xəbərinə görə, bunu tanınmış vəkil Aslan İsmayılov bildirib.
 
A.İsmayılovun sözlərinə görə, bəzi yol nişanları elə quraşdırılıb ki, sürücünün qaydaları pozmaması mümkün deyil: "DYP əməkdaşları da məhz həmin sahələrdə pusquda durub sürücü yaxalayırlar. Əksinə DYP-nin nəzarətinə ehtiyac olan yerlərdə isə onlar görünmürlər. Dəfələrlə yazmışam ki, Bibiheybətdən "Azneft" dairəsinə gələn yolda bir neçə müasir yeraltı keçid var. Vətəndaşlar isə həmin keçidlərin üstündən özlərini və sürücüləri təhlükəyə atmaqla hərəkət edirlər. Bir dəfə də həmin yerlər DYP əməkdaşlarının piyadalara irad bildirmələrini görməmişəm. Bundan başqa, DYP əməkdaşı qaydalar pozulmasa belə, bir çox hallarda sürücünü saxlayıb sənəd tələb edirlər. Nə üçün saxladığını soruşduqda isə min bir bəhanə uydurmağa, bəzi hallarda isə şərləməyə çalışırlar. Bu hal xüsusən axşam saatlarında restoran, şadlıq sarayları yaxınlığında baş verir. Sarı işığın qadağanedici işıq kimi qəbul edilib 60 manat 3 cərimə nəzərdə tutması isə tam absurddur. İnanmıram ki, dünyanın hansısa ölkəsində sarı işığı qadağanedici işıq kimi qeydiyyata alalar. Konkret yerlər var ki, polislər məhz bu sarı işıq üçün pusquda durub ucdantutma maşınları saxlayırlar. Bunun özü rüşvət mənbəyidir. Ən vacib məqam isə DYP əməkdaşlarının bir nömrəli vəzifə kimi vətəndaşları cərimələmək məqsədləridir. Sanki, xəbərdarlıq etmək kimi bir anlayış yoxdur. Hələ DYP əməkdaşlarının xüsusi yerlərdə qazanc məqsədilə dayanmalarını, bəzi yerlərin obyekt kimi bölüşdürülməsini demirəm".

---

---