Rusiya muzdluları arasında rəqabət artır - MTİ

Baxmut uğrunda döyüşlərdə Rusiyanın özəl hərbi şirkətləri (ÖHŞ) arasında rəqabət getdikcə artır.

Bizimyol.info xəbər verir ki, bu barədə Müharibənin Tədqiqi İnstitutunun (MTİ) analitiklərinin hesabatında deyilir. Rusiya ÖHŞ-ləri arasında rəqabət hər gün daha da artır və şirkətlərarası mabarizəyə çevrilir.
Özəl hərbi şirkətlər arasındakı rəqabəti muzdluların Putinə açıq video mesajları sübut edir. Bu yaxınlarda video "Qazprom"un yaratdığı "Potok" ÖHŞ-in silahlıları tərəfindən lentə alınıb. Son məlumatlara görə, “Qazprom” rəsmiləri Rusiya Müdafiə Nazirliyi ilə müqavilələr bağlayacaqlarına söz veriblər, lakin sonra "Redut" ÖHŞ ilə müqavilələr bağlamağa məcbur olublar.
"Potok"un döyüşçülərindən biri iddia edib ki, “Qazprom” Rusiya Müdafiə Nazirliyinə tabe olan daha iki “Fakel” və “Plamya” diviziyaları yaradıb.
Bundan əlavə, "Potok" döyüşçüləri təmas xəttindən uzaqlaşacaqları təqdirdə onları güllələməklə hədələyən "Vaqner" döyüşçülərinin pis rəftarından şikayətləniblər. Müxtəlif mənbələr "Potok" döyüşçülərinin Baxmutdakı mövqelərini tərk etdiklərini bildiriblər. Buna səbəb sursat çatışmazlığının olduğu bildirilir.
MTİ hesab edir ki, "Vaqner" maliyyəçisi Yevgeni Priqojin, çox güman ki, Baxmut ətrafında ÖHŞ-in sayının artmasına rəqabət kimi baxır və görünür, Baxmut ərazisində digər özəl hərbi birləşmələrin mövcudluğunun artması əhəmiyyətli mübahisələrə səbəb ola bilər.
Baş Qərargah Baxmutu cəbhənin ən qaynar nöqtələrindən biri adlandırır. Britaniya kəşfiyyat analitiklərinin fikrincə, son bir həftə ərzində Baxmutda baş verən əsas hadisə Ukrayna Silahlı Qüvvələrinin 0504 nömrəli “həyat xətti” üzərində nəzarəti saxlamaq üçün şəhərin kənarında, xüsusən də Xromovo kəndi yaxınlığında döyüşməsi olub.
Ruslar bu trasa aprelin 20-də daxil olublar. Ekspert Kovalenko iddia edib ki, işğalçılar atıcı silahlarla atəş məsafəsində mövqe tutmağı bacarıb, lakin şəhərdəki vəziyyət çox dinamikdir və hələ də Ukrayna müdafiəçilərinin xeyrinə kəskin şəkildə dəyişə bilər.
Dünən Müharibənin Tədqiqi İnstitutu “Vaqner”in Baxmutdan cənuba və qərbə doğru irəliləyə bildiyini iddia edib. Eyni zamanda, Ukrayna ordusu Xromovo yaxınlığında Rusiyanın nəzarətini azaltmaq üçün Baxmutun şimal-qərbində yerli xüsusi əməliyyat keçirməyə nail olub.
Eyni zamanda, "Edelweiss"in mətbuat katibi bildirib ki, hələ heç kim Ukrayna qoşunlarını Baxmutdan çıxarmayıb.

---

---