Tərtər Rayon İcra Hakimiyyətinin başçısı Müstəqim Məmmədov Milli Məclisin deputatı
Sahib Alıyevlə birlikdə 8 noyabr –Zəfər Günü münasibəti ilə Azərbaycan Silahlı
Qüvvələri tərəfindən Qarabağ iqtisadi rayonunda keçirilən lokal xarakterli antiterror
tədbirləri zamanı şəhid olmuş həmyerlilərimizin ailələrində olub, onları Zəfər Günü
münasibəti ilə təbrik edib, qayğıları ilə maraqlanıb, bayram sovqatı veriblər.Vətən
naminə canını fəda edən, torpaqlarımızın ərazi bütövlüyü yolunda öz qanı ilə adlarını
şəhidlik zirvəsinə yazan igid oğullarımıza Allahdan rəhmət, ailələrinə səbr diləyiblər.
Bildiriblər ki, Ali Baş Komandan cənab İlham Əliyevin rəhbərliyi ilə mənfur düşmənə ağır
zərbə vuran, düşmənə layiqli dərs verən, adlarını qəhrəmanlıq salnaməsinə yazmaqla
Vətənin bölünməzliyinə imza atan şəhidlərimizin adını uca tutmaq, əbədiləşdirmək,
onların doğmalarına, ailə üzvlərinə təskinlik verərək diqqət və qayğı göstərmək hər
birimizin vətəndaşlıq borcumuz, ən ümdə vəzifəmizdir. Hər birinin həyatı bir
qəhrəmanlıq dastanı olan şəhidlərimizlə qürur duyur, onların ruhunu ehtiramla yad
edirik.
Görüşlərdə Azərbaycan Respublikası Prezidenti, möhtərəm Ali Baş komandan İlham
Əliyevin rəhbərliyi ilə düşmən üzərində qazanılan şanlı qələbədən, ölkə rəhbərinin
antiterror əməliyyatlarından sonra işğaldan azad olunmuş ərazilərdə-Xankəndində,
Ağdərədə, Xocalıda, Xocavənddə Azərbaycan Bayrağını dalğalandırmasından, Ali Baş
komandanla bütün xalqımızın qürur duymasından da danışılıb, qalib ölkənin qalib
vətəndaşı olmağın gözəl hiss olduğu vurğulanıb.
Görüşlərdə həmçinin bildirilib ki, Azərbaycan Respublikası Prezidenti, möhtərəm Ali
Baş komandan cənab İlham Əliyevin müvafiq sərəncamı ilə lokal xarakterli antiterror
əməliyyatlarında şəhid olan həmyerlilərimiz Lalayev Ruslan Akif oğlu 3-cü dərəcəli
“Rəşadət” ordeni və “Vətən Uğrunda” medalı ilə, Ağayev Kənan Vahid oğlu, Vəlizadə
Rəşad Elşən oğlu, Abbaszadə Emin Faiq oğlu, Səfərov Cavid Rövşən oğlu və
İbrahimov Elnur Səxavət oğlu isə 3-cü dərəcəli “Vətənə xidmətə görə” ordeni və “Vətən
Uğrunda” medalı ilə təltif ediliblər.
Şəhidlərin ailə üzvləri şəhid ailələrinə göstərilən diqqət və qayğıya görə Azərbaycan
Respublikasının Prezidenti cənab İlham Əliyevə və Birinci vitse-prezident Mehriban
xanım Əliyevaya öz minnətdarlıqlarını bildiriblər.
Tarix: 8-11-2023, 17:43