Bir ildə neçə dəfə cərimələri artırmaq olar ? Cərimə (almanca Strafe — cəza) — cəza növüdür.
Cinayət törədildiyinə görə hüquq normalarına əsasən dövlətin NƏFİNƏ keçirilən pul vəsaiti.
Yəni lap qədim dövrlərdən bu günədək müxtəlif cərimələr cəzanın bir növü kimi tətbiq olunur və məqsəd qarşı tərəfi islah etmək, əməldən çəkindirməkdir.
Məqsəd insanları islah etməkdir, vətəndaşların cibinə girmək deyil.
Həm də cərimələr dövlətin büdcəsinə köçürülməlidir.
Bu məsələ dəfələrlə Milli Məclisdə də qaldırılıb ki, bəzi qurumların ayrıca fond yaradaraq cərimələri orada toplayır və cərimə gətirən əməkdaşa fonddan “mükafat” verirlər.
Əlbəttə, belə olan halda kimlərsə “mükafat” almaq üçün vətəndaşları cərimələməkdə maraqlı olacaqlar.
Dünyanın heç bir yerində belə hal ola bilməz.
İkinci vacib məqam ildə 2-3 dəfə cərimələrin məbləğinin artırılmasıdır.
Ay cənablar, başa düşmürsünüz ki, CƏRİMƏ MƏQSƏD ola bilməz, CƏRİMƏ VASİTƏDİR...
Əlbəttə, cərimələri artırmaqda MƏQSƏD bəzi məmurların cibini doldurmaqdır.
Daha vacib bir məqam. Cərimələrin məbləği ölkədəki minimal əmək haqqına uyğun olmalıdır.
Təqaüdçü maska taxmadığına görə, onu necə 200 manat cərimə edə bilərsiniz..?
Bu adam aldığı təqaüdü cəriməyə versə, nə yeməli, nə içməlidir ?
Bütün günü paytaxtın küçələrində müxtəlif qurumların nümayəndələri CƏRİMƏ etməklə məşğuldurlar.
Hətta vətəndaşlar qəzəblə deyir ki, deyəsən bunlar CƏRİMƏ ilə dövlətin büdcəsini doldurmaq istəyirlər.
Bizim normal səhiyyə sistemimiz yoxdur deyə yoluxma artır.
Bizim normal təcili yardım sistemimiz bərbaddır, çağaırışa 3 gün sonra, xəstə öləndən sonra gəlir....biz də maska taxmamağa görə, 100, hətta 200 manat cərimə edirik...
Problemi aradan qaldırmaq əvəzinə vətəndaşın dərisini soymaq olmaz.
Yaxud neçə illərdir Bakı şəhəri sözün həqiqi mənasında “probkaya” düşüb, bunu aradan qaldırmaq əvəzinə güc veriblər sürücüləri cərimələməyə...
Bunun heç bir nəticəsi ola bilməz, bu nə metodudur, nədir belə...
Şəhərdəki cəhənnəm əzabını xatırladan “probka”nı aradan qaldırmaq, nizamlamaq məmurların işidir. Küçələri, səkiləri satanda belə olmalı idi də..
Vətəndaş öz evinin qarşısında maşın saxlaya bilmir, o dəqiqə tökülüşüb gəlirlər və cərimə edirlər...
Ölünü cərimə edirlər, dirini cərimə edirlər, toyu-vayı cərimə edirlər. Bunun bir sonu olmalıdır.
Bir çox ölkələrdən nümunə götürək də.
Yazılan cərimələrin çoxunu ilin sonunda silirlər.
Bizdə isə hamı cərimə yarışına çıxıb.
Vətəndaş küçədə asqırmağa da qorxur ki, bu dəqiqə gəlib cərimə edəcəklər.
Bu tip məsələrlə bağlı Milli Məclisdə müzakirələr tez-tez olmalıdır. Qanun layihələrində dəyişikliklər olmalıdır. Vətəndaşlarımıza Konstitusiyamızın verdiyi hüquqları qoruyub saxlamalıyıq. Hər addım başı vətəndaşlarımızı cərimələməklə çətin tərbiyə olunan uşaqlar kimi qələmə verməməliyik. Sivil dövlətdə yaşayaraq, tam hüquqlu olmağımızı bütün Avropaya göstərməliyik.
Tarix: 4-03-2022, 10:07