Ukraya ordusu Xarkov vilayətinin Yuxarı Roqanka, Rus Lozovası, Sloboda və Prilesnoe yaşayış məntəqələrinə nəzarəti bərpa edib.
Bu barədə Ukrayna Ordusunun Baş qərargahı məlumat yayıb.
“Silahlı qüvvələrin əks hücumu nəticəsində Xarkov vilayətinin Yuxarı Roqanka, Rus Lozovası, Sloboda və Prilesnoe yaşayış məntəqələrinə nəzarət bərpa olunub” – məlumatda bildirilir.
Qeyd olunur ki, Rusiya hərbçiləri Slobojanski istiqamətində Xarkov şəhərinə aviazərbələr və artilleriya zərbələri endirməkdə davam edir. Bundan əlavə, qarşı tərəf İzyum-Barvenkovo və İzyum-Slavyansk istiqamətlərində hücuma cəhd edir.
Rusiya hərbçiləri, həmçinin Velka Kamışevaxa, İvanovka, Krasnı, Kurulka, Dovgenka, Novaya Dmitriyevka və Barvenkovo yaşayış məntəqələrində pilotsuz uçuş aparatlarından istifadə etməklə Ukrayna Silahlı Qüvvələrinin mövqelərinin havadan kəşfiyyatını həyata keçirir.
Bundan əvvəl Müdafiə Nazirliyi məlumat verib ki, Rusiya qoşunları Ukraynanın şərqində bütün istiqamətlərdə eyni vaxtda hücumun intensivliyini artırır, onların ən böyük fəallığı Slobojanski və Donetskdədir. Nazirliyə görə, eyni zamanda, Rusiya ərazisində tam səfərbərlik ehtimalı da istisna edilmir.
Ukrayna Silahlı Qüvvələrinin Baş Qərargahından isə bildirilib ki, Rusiyanın "İsgəndər-M" raketləri Belarus ərazisindən Ukraynaya doğru yerləşdirilib.
Bundan əlavə, Belarus silahlı qüvvələrinin bölmələri Ukrayna ilə sərhədin Brest və Qomel vilayətlərində hərbi tapşırıqları yerinə yetirir.

"Ukraynada Belarusla sərhəd ərazilərdə təxribatın mümkünlüyü istisna edilmir. Hərbi və mülki infrastruktura raket və bomba hücumları təhlükəsi hələ də qalmaqdadır", - Baş Qərargah qeyd edib.
Bundan əlavə, Severski istiqamətində Ukraynanın Rusiya ilə həmsərhəd rayonlarında, həmçinin Zaporojye, Dnepropetrovsk, Donetsk, Luqansk və Xarkov vilayətlərinin yaşayış məntəqələrində infrastruktur obyektlərini atəşə tutmaqda davam edir.
***
Ukrayna Rusiyanın hərbi itkilərini açıqlayıb. Bu barədə Ukrayna Silahlı Qüvvələrinin (SQ) Baş Qərargahının "Facebook" səhifəsində bildirilib.
Qeyd olunub ki, fevralın 24-dən bu gün səhər saatlarına qədər Rusiya Ordusunun 1 008 tankı, 2 445 zirehli döyüş maşını, 436 artilleriya sistemi, 151 reaktiv yaylım atəşi sistemi, 77 havadan müdafiə sistemi, 190 hərbi təyyarəsi, 155 helikopteri, 1 701 avtomobil texnikası, 8 gəmi/kateri, 76 yanacaq çəni, 232 dronu, 4 OTRK/TRK/ mobil SRBM sistemi, 32 xüsusi avadanlığı məhv edilib.
Ukrayna Silahlı Qüvvələrinin Baş Qərargahı Rusiya tərəfinin təxminən 23 200 canlı qüvvəsini itirdiyini bəyan edib.

Rusiya ordusunun Şərq Hərbi Dairəsinin bölmələri Belqoroddan Ukraynanın Xarkov vilayətinin İzyum şəhərinə köçürülür. Bu barədə Ukrayna Silahlı Qüvvələrinin Baş Qərargahı məlumat yayıb.
Məlumatda bildirilib ki, ruslar Slobojanski istiqamətində əsas səylərini işğal altında olan mövqeləri qoruyub saxlamağa və Ukrayna Silahlı Qüvvələrinin bölmələrini atəşə tutmağa yönəldib: “Düşmən qruplaşmanı gücləndirmək üçün Şərq Hərbi Dairəsinin bölmələrini Belqorod vilayətindən İzyum şəhəri ərazisinə köçürür”.
Baş Qərargahın məlumatına görə, rus qoşunları Sulıxivka və Dovxenke yaşayış məntəqələri istiqamətində hücuma keçməyə cəhd etsə də, buna nail ola bilməyib: “Düşmən Xarkov və İzyum istiqamətlərində öz qoşun qruplarını gücləndirmək üşün hava hücumundan müdafiə qüvvələri və vasitələrini bu ərazilərdə yerləşdirməyə çalışır”.
Eyni zamanda, bildirilib ki, Donetsk və Luqansk vilayətlərinə tam nəzarəti ələ keçirmək və işğal olunmuş Krımla quru dəhlizinin saxlanılması məqsədilə rus ordusunun şərqdə hücum əməliyyatları davam edir: “Rus ordusu Rubijne, Popasnyanski (Kalinovo və Popasna istiqamətində) və Kuraxivin (Alyonevka və Novomixayilovka) işğalını başa çatdırmağa çalışdığı Limanski (Yampil, Ozerna, Liman) və Severodonetskdə irəliləməyə cəhd edir. Amma düşmənin hücum əməliyyatları uğurlu deyil. Bu istiqamətlərdə döyüşlər davam edir”.
Məlumata görə, rus qoşunları şimal istiqamətində Kindrativka, Katerinivka, Svarkove və Bilokopıtove yaşayış məntəqələrində Ukrayna qoşunlarının mövqelərini atəşə tutub. Ukrayna Silahlı Qüvvələri Zaporojye istiqamətində rus qoşunlarına ağır artilleriya zərbələri endirib.
Ruslar cənubda aktiv hücum əməliyyatları keçirməyiblər. Amma Nikolayev istiqamətində hava kəşfiyyatını gücləndirib. Volın və Polissya istiqamətlərində isə fəallıq yoxdur. Bu ərazilərdə vəziyyətlə bağlı ciddi dəyişiklik olmayıb.

"Ukraynanın Donetsk vilayətində ümumilikdə Slavyanskdan şimalda, İzyum istiqamətində vəziyyət sabit-gərgin olaraq qalır. Qarşı tərəf çoxsaylı şəxsi heyət və texnikanı döyüşə atmaqla düşündükləri xəttə qədər irəliləməyə və bizi mühasirəyə almağa çalışır. Amma buna nail ola bilmirlər".
Bunu "Report"un Şərqi Avropa bürosuna açıqlamasında ukraynalı döyüş zabiti, Rusiya təbliğatı əleyhinə beynəlxalq mərkəzin sədri Yuriy Koçevenko bildirib.
O qeyd edib ki, artilleriyadan çox fəal istifadə olunmasına, aviasiyadan istifadə olunmaq cəhdlərinə baxmayaraq, Rusiya silahlı qüvvələrində heç nə alınmır: "Bizim hava hücumundan müdafiə qüvvələri hər cür yüksəklikdə onların təyyarə və helikopterlərinin öhdəsindən məharətlə gəlməyi əla öyrənib. Elə dünən “Stinger” DZRK ilə Rusiyanın “Ka-52” helikopterini vurduq. Bununla belə, ümumilikdə rəqib canlı qüvvə, texnika, artilleriyadakı üstünlüyündən istifadə edərək bizi gərginlikdə saxlaya bilir. Müharibənin başlamasından iki ay keçir. Amma gördüyünüz kimi, düşmən burada – Donbassda qarşıya qoyduğu məqsədlərin heç birinə nail ola bilməyib. Ukrayna ordusu yüksək döyüş hazırlığındadır, fəal döyüşlər aparır, qarşı tərəfin həmlələrini heçə çıxarır və düşməni canlı qüvvəsində və texnikasında ciddi itkilərə məruz qoymaqla əldən salır".
Y.Koçevenko vurğulayıb ki, hər gün Rusiyanın bir neçə texnikası – tanklar, PDM-lər, helikopterləri məhv edilir:
"Onlarda bu texnikanın sayı çoxdur deyə, hər dəfə hücum edirlər, amma düşmənin itkisi xeyli çoxdur. Əlbəttə, bizim də itkilərimiz var. Amma elə də çox deyil. Ordumuzda döyüş ruhu və döyüş bacarığı yüksək səviyyədədir", - deyə, Y. Koçevenko əlavə edib.

Qeyd edək ki, dünən, İzyum istiqamətində Ukrayna Milli Qvardiyasının xüsusi təyinatlıları son günlərin ən uğurlu hərbi əməliyyatını keçirib.
Yerli saytlarda və sosial mediada paylaşılan görüntülərdə Rusiya hərbi birliklərinin aramsız artilleriya zərbələrinə məruz qaldığı görünür.
Bildirilir ki, xüsusi təyinatlılar Ukrayna Silahlı Qüvvələri ilə birlikdə bir neçə dəqiqə ərzində işğalçı ordunun 30-dan çox hərbi texnikasını və onlarla hərbçisini məhv ediblər.

Qeyd edək ki, ötən gün Ukrayna Hərbi Hava Qüvvələri və Quru Qoşunlarının hava hücumundan müdafiə bölmələri 10 hava hədəfini vurub: 1 təyyarə və 9 ədəd “Orlan-10” tipli operativ-taktiki dronu.
Bildirilib ki, eyni dövr ərzində işğalçı qüvvələrin 11 tank, 7 artileriya sistemi, 28 zirehli texnikası və 14 avtomobili zərərsizləşdirilib.

Bundan başqa, ölkənin Donetsk və Luqansk vilayətlərində Rusiyanın 14 hücumu dəf edilib.
Xatırladaq ki, bu gün Ukrayna-Rusiya müharibəsinin 66-cı günü başlayıb.

---

---