Bodrumda azərbaycanlıların da olduğu oteldə kütləvi zəhərlənmə - oraya getməyin!

“VOGUE Hotel Bodrum” istirahət mərkəzində yüzlərlə turist naməlum virusa yoluxub; otel rəhbərliyi mikrobun sudan keçdiyini desə də, müştərilər qidalardan şübhələnir

Türkiyənin kurort şəhərlərindən olan Bodrumdakı otellərdən birində kütləvi zəhərlənmə baş verib. 10 gündən çoxdur oteldə istirahətə gələn turistlər arasında qusma, qızdırma, başağrısının yayıldığı bildirilir. Hadisənin baş verdiyi istirahət mərkəzinin adı “VOGUE Hotel Bodrum”dur.

Hazırda orda ailəsi ilə birlikdə istirahət edən azərbaycanlı turistlər musavat.com-a bildiriblər ki, gəldikləri gündən bu yana özləri və ailə üzvləri yataq xəstəsinə çevriliblər. “Otel rəhbərliyindən bunun səbəbini soruşduqda bildirir ki, virus hovuzdakı sudan keçib. Amma əminik bu, bəhanədi. Turistlərin ən azı 50 faizi hazırda xəstədir. Bu da o deməkdir ki, virus qidalardan, oteldə turistlərə verilən yeməklərdən yayılıb” – deyə “VOGUE Hotel Bodrum”da olan azərbaycanlılardan biri saytımıza bildirib.

Başqa bir azərbaycanlı isə musavat.com-a deyib ki, hazırda xanımı və qızı virusa yoluxaraq yatağa düşüblər. Oğlunun və digər qızının isə bu gün zorla ayağa qalxdığını söyləyib.

Azərbaycanlı turistlərin daha bir əndişəsi virusun növünü bilmədiklərindən yanadır. Onlar deyir ki, bəlkə bu, elə təhlükəli virusdur ki, tez bir zamanda müdaxilə edilməli, həkim müayinəsindən, analizlərdən keçmək lazımdır. Bu rahatsızlıqlarını otel rəhbərliyinə bildirsələr də indiyədək bir tədbirin görülmədiyini deyirlər.

Hazırda “VOGUE Hotel Bodrum”da olan azərbaycanlı turistlər Musavat.com vasitəsilə sözügedən otelə tətilə gəlmək istəyənlərə müraciət ediblər: "Əsla bu otelə gəlməyin. Özünüz, övladlarınız naməlum virusa yoluxacaq. Artıq bizim başımız dərddədir, barı siz gəlməyin".

Musavat.com olaraq “VOGUE Hotel Bodrum” istirahət mərkəzinin rəhbərliyi ilə əlaqə saxlayıb, baş verənlərə rəy almaq istəsək də, bu cəhdimiz baş tutmadı. Gedişatı təqib edib, gəlişmələr haqda oxuculara bilgi verməyə çalışacağıq.

Musavat.com