Günelin suçlandığı qətl işində ilginc məqamlar: borc tələb edən "banditlər", kamera görüntüləri...

Qəsdən adam öldürməkdə təqsirli bilinən qadın hakim qarşısına çıxarılıb. O, qeyri-rəsmi münasibətdə olduğu şəxsi qətlə yetirib.

Musavat.com xəbər verir ki, Bakı Ağır Cinayətlər Məhkəməsinə adam öldürməkdə ittiham edilə Qasımova Günel Eldar qızının cinayət işi məhkəmə iclası başlayıb. Hakim Azər Paşayevin sədrliyi ilə keçirilən məhkəmə iclası yenə gərginliklə başlayıb. Mərhumun ailə üzvləri Günel Qasımovanın ünvanına təhqirlər səsləndiriblər.

G.Qasımovanın vəkili bununla bağlı məhkəməyə müraciət edib və tədbir görülməsini istəyib. Hakim sonuncu xəbərdarlığını edib və nəzarətçilərə tapşırıq verib ki, növbəti belə halın baş verməməsi üçün lazım olan bütün qanuni tədbirlər görülsün.

Məhkəmənin davamında Abşeron Rayon Polis İdarəsinin əməliyyatçısı Əli Almazov ifadə verib. Polis əməkdaşı cinayət hadisəsi baş verən zaman həyata keçirdikləri əməliyyatın təfərrüatlarından danışıb.

O, bildirib ki, hadisə yerinə gələn zaman yerdə uzanan şəxsin sinəsində bıçaq izi görüblər: "Bu hadisənin qətl olması qənaətinə gəldik. Ətrafa baxış keçirdik. Meyitin yanında mobil telefon tapdıq. Telefonun mərhuma məxsus olduğunu düşündük. Bu zaman telefona zəng gəldi. Mən telefonu açıb telefon sahibinin yaralandığını bildirdim. Məlum oldu ki, zəng edən həmin şəxsin xanımıdır".

Əli Almazov deyib ki, mərhumun həyat yoldaşı ilə danışan zaman ondan kimdən şübhələndiyini soruşub: "Həyat yoldaşı dedi ki, Günel adlı şəxslə qeyri-rəsmi münasibətdə olub. O, mərhumun Güneldən alacağının olduğunu, buna görə də öldürülə biləcəyini dedi. Biz də səhər Güneli polisə dəvət etdik. Ona mərhum Ramizin öldüyünü demədik. Bildirdik ki, Ramiz ondan şikayət edib və pulunu tələb edir. Günel əvvəlcə dedi ki, Ramizi 1 aydır görmür. Sonra Günel yola salındı və biz araşdırmalarımızı davam etdirdik. Kamera görüntüləri çıxarılan zaman Günelin hadisə yerinə yaxın ərazidə olduğu müəyyən edildi. Başqa bir görüntüdə isə mərhumla birlikdə yol getdiyini aşkar etdik. Bununla bağlı Güneli yenidən polisə dəvət etdik. Ona niyə yalan danışdığını deyib, kamera görüntülərini göstərdik. Günel fikrini dəyişdi və həmin gün Ramizlə görüşdüyünü təsdiqlədi. Bildirdi ki, 20 dəqiqədən sonra oradan ayrılıb. Daha sonra onun bəzi dediklərində də ziddiyətlər olduğu məlum oldu. Günel "Tale Yolları" restoranının yanından dönərək taksiyə mindiyini dedi. Amma kamera görüntüləri bunun da əksini göstərdi. Məlum oldu ki, o, restoranın qarşısından düz hərəkət edərək yoluna davam edib. Başqa bir kamera görüntüsündə Günelin yolu qaçaraq yox, iti addımlarla keçərək geri qayıtdığını müşahidə etdik".

Suallara cavab verən polis əməkdaşı deyib ki, Günel davranışları ilə onları aldatmağa çalışıb: "Özünü elə apardı ki, guya Ramizin ölməsindən xəbəri yoxdur. Biz də bunu demirdik. Mən 30 ildir şübhəli şəxs dindirirəm. Belə qənaətə gəldim ki, o, qətli törədib. Mən ona Ramizin öldüyünü deyəndə özünü narahat olmuş kimi göstərdi".

Polis əməkdaşının dediklərinə Günel Qasımova etiraz edib. Bildirib ki, saxlanılan zaman ona təzyiq edilib: "Mən hadisə günü haradan keçdiyimi, harada olduğumu özüm demişəm. Kameralar olan yerləri, mağazaları mən göstərmişəm. Yazılıb ki, guya uğurlu əməliyyatla aşkarlayıblar. Mən qətl törətməmişəm".

G.Qasımovanın vəkili bildirib ki, mərhumun başqa şəxslərə də borcu olub və telefonda olan mesajlar bunu sübut edir. Vəkil deyib ki, mərhumun danışdığı, mübahisə etdiyi şəxslər arasında "banditlər" də var. Müdafiəçi sual edib ki, niyə həmin borclular araşdırılmayıb? Polis əməkdaşı isə həmin şəxslərin müəyyən edilərək istintaqa çağırıldığını, dindirildiyini deyib.

Qeyd edək ki, hadisə ötən ilin oktyabr ayında Xırdalan şəhərində baş verib. Abşeron rayonunun Xırdalan şəhər sakini, 27-ci məhəllə ev 2, mənzil 9 da yaşayan, 1979-cu il təvəllüdlü Ramiz Rasim oğlu Hüseynov parkda naməlum şəxs tərəfindən bıçaqlanıb. O, çoxlu qan itirdiyindən hadisə yerində ölüb.

Rayon hüquq-mühafizə orqanlarının əməkdaşları tərəfindən keçirilən əməliyyat tədbirləri nəticəsində cinayətin Qasımova Günel Eldar qızı tərəfindən törədildiyi məlum olub. Günel Qasımova 39 yaşlı kişini gecə saatlarında parkda bıçaqlayaraq hadisə yerindən qaçıb. Daha sonra o polis əməkdaşları tərəfindən şübhəli şəxs qismində saxlanılıb.

Onun barəsində Cinayət Məcəlləsinin 120.2.11-ci (quldurluq, hədə-qorxu ilə tələb etmə, terrorçuluq və ya banditizmlə əlaqədar adam öldürmə) maddəsi ilə ittiham irəli sürülüb.