Rus oliqarxın 530 milyonluq meqayaxtası müsadirə edildi

İtaliya hüquq-mühafizə orqanları rusiyalı oliqarx Andrey Melniçenkonun meqayaxtasına həbs qoyublar. AzVision.az xəbər verir ki, bu barədə CNN İtaliya maliyyə qvardiyasının bəyanatına istinadən məlumat yayıb.
Qeyd olunur ki, superyaxta İtaliyanın şimal-şərqindəki Triest şəhərində imiş. Onun dəyəri təxminən 530 milyon avrodur.
Gəmini inşa edən “Nobiskrug” şirkətinin məlumatına görə, o, dünyanın ən böyük yaxtalarından biri sayılır.
Qeyd edək ki, Melniçenko Avropa İttifaqının martın 9-da tətbiq etdiyi sanksiyalara məruz qalanlar siyahısındadır. Avropa Komissiyasının qərarında qeyd edildiyi kimi, o, 35 digər iş adamı ilə birlikdə Rusiyanın Ukraynaya müdaxiləsindən sonra prezident Putinlə görüşərək sanksiyaların iqtisadi təsirini müzakirə edib.
"Onun bu görüşə dəvət olunması onu göstərir ki, iş biznesme Vladimir Putinin yaxın çevrəsinə mənsubdur və Ukraynanın ərazi bütövlüyünə, suverenliyinə, müstəqilliyinə, eləcə də sabitliyinə və təhlükəsizliyinə xələl gətirən və ya təhdid edən hərəkətləri dəstəkləyir", - Avropa Komissiyası bildirib.
Xatırladaq ki, bir müddət öncə İtaliya polisi sanksiyaya məruz qalmış Kremlin təbliğatçısı kimi tanınan Vladimir Solovyov və rusiyalı oliqarx Əlişir Usmanova məxsus villalar müsadirə edilmişdi. Almaniya hakimiyyəti Usmanovun Hamburqdakı 600 milyon dollarlıq yaxtasını da müsadirə edib.
Bundan başqa Fransada “Rosneft” şirkətinin rəhbəri və Rusiya prezidentinin dostu kimi tanınan İqor Seçinə məxsus yaxta müsadirə edilib.

---

---